ރާއްޖޭގެ އެކި ހިސާބުތަކުން އަރަމުން އަންނަ އުދައާ ގުޅިގެން ދިވެހިންނަށް ރައްކާތެރިކަން ދެއްވުން އެދި ދުއާ ދަންނަވާ ކަމަށް ފޮރިން މިނިސްޓަރު އަބްދުﷲ ޝާހިދު ރޭ ވިދާޅުވެއްޖެއެވެ.
ހުޅަނގު މޫސުމުގެ ވިއްސާރާއާ ގުޅިގެން އުދަ އަރައި ގެއްލުނު ލިބުނު އަތޮޅުތަކުގެ އަދަދު ހަތަކަށް އަރާއިރު މީގެ ތެރޭގައި ހިމެނެނީ، ތ. އަތޮޅުގެ ނުވަ ރަށަކާއި ގދ. އަތޮޅުގެ ހަތަރު ރަށަކާއި އދ. ފެންފުއްޓާއި ޅ. ކުރެންދޫ އާއި ލ. މާވަށާއި ގއ. ކޮލަމާފުށީގެ އިތުރުން އައްޑު ސިޓީގެ އެކި ރަށްތަކަށެވެ. އެ ރަށްތަކުގެ ތެރެއިން އެންމެ ބޮޑަށް ގެއްލުން ލިބިފައިވަނީ އައްޑޫ މަރަދޫ، މަރަދޫ ފޭދޫ އަދި ގދ. މަޑަވެއްޔަށެވެ.
އދ. ގެ އާންމު މަޖިލިހުގެ ރައީސް ރައީސް ކަން ވެސް ކުރައްވާ ޝާހިދު ކުރެއްވި ޓުވީޓެއްގައި ވިދާޅުވީ ރާއްޖޭގެ އެކި ރަށްރަށަށް އުދަ އެރުމާ ގުޅިގެން އެ ރަށްރަށުގެ ރައްޔިތުންނަށާއި މުދަލަށް ލިބެމުންދާ ގެއްލުމުގެ ސަބަބުން ރައްޔިތުން ތަހަންމަލު ކުރާ ހިތްދަތިކަމުގައި ބައިވެރިވެވަޑައިގަންނަވާ ކަމަށެވެ.
ރާއްޖޭގެ އެކި ރަށްރަށަށް އުދައެރުމާ ގުޅިގެން އެ ރަށްރަށުގެ ރައްޔިތުންނަށާއި މުދަލަށް ލިބެމުންދާ ގެއްލުމުގެ ސަބަބުން ރަައްޔިތުން ތަހައްމަލުކުރަމުންދާ ހިތްދަތިކަމުގައި ބައިވެރިވެ، އަޅުގަނޑުމެން އެންމެންނަށް ރައްކާތެރިކަން ދެއްވުން އެދި މާތްﷲ ގެ ހަޟްރަތުގައި ދުޢާ ދަންނަވަން pic.twitter.com/K5vxo3uJE7
— Abdulla Shahid (@abdulla_shahid) July 1, 2022
މޫސުމަށް އަންނަ ބަދަލުތަކުގެ ސަބަބުން ޝާހިދު ކުރެއްވި މި ޓްވީޓުގައި އިތުރަށް ވަނީ ދިވެހިންނަށް ރައްކާތެރިކަން ދެއްވުން އެދި މާތް ﷲ ގެ ހަޟްރަތުގައި ދުއާ ދަންނަވާ ކަމަށެވެ.
އުދައިގެ ސަބަބުން ރާއްޖޭގެ 300 ވަރަކަށް ގެއަށް އެކި ވަރުގެ ގެއްލުންވެފައިވާ ކަމަށް ނެޝަނަލް ޑިޒާސްޓާ ސެންޓަރުން ބުނެފައިވާއިރު، މޫސުމާ ބެހޭ ގައުމީ އިދާރާއިން ވަނީ އުދަ އަރާނެ ކަމަށް މެދު ރާއްޖޭގެ އަތޮޅުތަކުން ފެށިގެން ދެކުނުގެ ހިސާބުތަކަށް ރީނދޫ އެލާޓް ނެރެފައެވެ.