މިއަދު ބޭއްވި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިހާބު ކާމިޔާބު ކުރި އެމްޑީޕީގެ ކެންޑިޑޭޓުންނަށް އެޕާޓީއިން މަރުހަބާ ކިޔައިފިއެވެ.
އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި އއ ތޮއްޑޫ އިން އިންތިހާބުވެފައިވާ އައިމިނަތު މަޖުދާ އާއި ށ ޅައިމަގު އިން މަރްޔަމް ޒުހުރާ އަދި ށ ކޮމަންޑޫ އިން އިންތިހާބު ކާމިޔާބު ކޮށްފައިވަނީ އައިޝަތު ވަހީދާއެވެ.
އެތިންރަށުގައި އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ވޯޓްލުން ކުރިއަށް ގެންގޮސްފައިވަނީ މިއަދު ހެނދުނު 8 އިން ހަވީރު 4 އަށެވެ.
އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުން މެމްބަރުން އިސްތިއުފާ ދޭ މައްސަލައިގައި އިލެކްޝަންސް ކޮމިޝަނުން ވަނީ ކަންބޮޑުވުން ފާޅުކޮށްފައެވެ. އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ އިންތިހާބުގެ ބައި އިލެކްޝަން ތަކަކީ ތަރުހީބު ކުޑަ އިންތިހާބު ތަކެއް ކަމަށާއި އެކަން ކުރުމަށް ބޮޑު ހަރަދެއް ހިނގާ ކަމަށް އެކޮމިޝަނުން ބުނެފައިވެއެވެ.
