ރުކުން ބަހައްޓާ! ވެރިކަމަށް ކުރިމަތިލާން ޝާހިދުގެ ’އަބްއާދު ސުންނަތެއްވެސް‘ ވެސް ހަމަ ނުވޭ: ޝައިހު ޝަހީމް

އދގެ އާންމު މަޖިލީހުގެ ރައީސް އަދި ފޮރިން މިނިސްޓަރ އަބްދުﷲ ޝާހިދު، ދިވެހިރާއްޖޭގެ ވެރިކަން ކުރުމަށް ރުކުން ހަމަވާކަމަށް މަޖިލީހުގެ ރައީސް މުހައްމަދު ނަޝިދު ފާހަގަކޮށްފައިވަނިކޮށް، މިނިސްޓަރު ޝާހިދުގެ އަބްއާދު ސުއްނަތްވެސް ހަމަނުވާކަމަށް ކުރީގެ އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އދގެ އާންމު މަޖިލީހުގެ ރައީސްގެ މަގާމުގައި ހުންނަވާ، ރާއްޖޭގެ ފޮރިން މިނިސްޓަރު އަބްދުﷲ ޝާހިދު، އދގައި އަދާކުރައްވާ މަގާމުގެ ދައުރު ހަމަވަމުންދާކަމަށް ފާހަގަކުރައްވާ ޝަހީމް ވިދާޅުވީ، ޝާހިދުވަނީ، ދިވެހިރާއްޖޭއަށް މާލީ ދަތިކަމެއް ކުރިމަތިވެފައިވާ ދަނޑިވަޅުގައި، ބޭރު ގައުމެއްގައި ހުންނަވައިގެން، ބޮޑު ހަރަދުތަކެއް ކުރައްވާފައިކަމަށެވެ.

ދިވެހިރާއްޖޭގެ މާލިއްޔާތުން، މިނިސްޓަރު ޝާހިދުވަނީ ބޮޑު ހަރަދުތަކެއް ކުރައްވާފައިކަމަށް ދޭހަވާ މޭރުކަމަކުން ވާހަކަދައްކަވަމުން، ޝަހީމްވަނީ، ހަރަދުތަކެއް ކުރެއްވުމަށް ފަހު، ދައުރު ހަމަވެގެން، ޝާހިދު އެނބުރި ރާއްޖެ ވަޑައިގަންނަވާއިރު، ދިވެހިންނަށް އެ މަނިކުފާނުގެ ފަރާތުން ވެފައިވާ ފައިދާއެއް އޮތްތޯ ސުވާލުކުރައްވާފައިއެވެ.

ފޮރިން މިނިސްޓަރު އަބްދުﷲ ޝާހިދު، އދގެ އާންމު މަޖިލީހުގެ ރައީސްގެ މަގާމުގައި ހުންނަވައިގެން ކުރެއްވި ހަރަދުތަކުން ދިވެހިރާއްޖެއަށް ލިބިފައިވާ ފައިދާތަކެއްވޭތޯ ސުވާލުކުރައްވާ ޝަހީމުވަނީ، ޝާހިދު ވެރިކަމަށް އައުމަށް ރުކުން ހަމަވާކަމަށް ރައީސް ނަޝިދު ވިދާޅުވި، ވިދާޅުވުމަށް ރައްދުދެއްވާފައިއެވެ. އެގޮތުން ޝަހީމުވަނީ، ޝާހިދުގެ ރުކުންތައް ހަމަވޭތޯ ސުވާލުކުރައްވާފައިއެވެ. އަދި ރުކުން ހަމަނުވާކަމަށް ސިފަކުރައްވާ، ޝާހިދުގެ އަބްއާދު ސުންނަތްވެސް ހަމަނުވާކަމަށް ޝަހީމްވަނީ ފާހަގަކުރައްވާފައިއެވެ.

އދގެ އާންމު މަޖިލީހުގެ ރައީސްގެ މަގާމުގައި ފޮރިން މިނިސްޓަރު ޝާހިދު ހުންނަވައިގެން، ދިވެހިރާއްޖެއަށް ވެފައިވާ ފައިދާއެއް ނެތްކަމަށާއި، ވެރިކަމަށް އައުމަށް ހަމަވާންޖެހޭ ރުކުންތުކުގެ އިތުރުން، އަބްއާދު ސުންނަތްވެސް ހަމަނުވާކަމަށް ފާހަގަކުރައްވާ ޓްވީޓެއްކުރައްވުމަށްފަހު، ޝަހީމްވަނީ އެ ޓްވީޓް ޑިލީޓުކޮށްލާފައެވެ.