ރައީސް ނަޝީދު ހުށައަޅާފައިވާ ބަރުލަމާނީ ނިޒާމުގެ ގަރާރާއި ގުޅިގެން އުފެދިފައިވާ ދެބަސްވުންތަކަށް ހައްލެއް ލިބިފައިނުވާކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު ވިދާޅުވީ، ޕާޓީގެ ތެރޭގައި އެކި ކަންކަމުގެ ހިޔާލުތަފާތުވުންތައް ހުންނާނެކަމަށެވެ. އެހެން ނަމަވެސް ރައީސް ސާލިހު ވިދާޅުވީ، ޕްރައިމަރީ ބޭއްވުމަށްފަހު، ރިޔާސީ ކެނޑިޑޭޓެއް ހޮވުމާއި ގުޅިގެން، ޕާޓީ އެއްކޮށް، އެ ކެނޑިޑޭޓެއްގެ ފަހަތުގައި އޮންނާނެކަމަށެވެ. އަދި ގަރާރާއި ގުޅިގެން އުފެދިފައިވާ ދެބަސްވުންތައް ހައްލުވެފައިނުވާކަމަށްވެސް ރައީސް ސާލިހު ފާހަގަކުރެއްވިއެވެ.
ރައީސް ސާލިހު ވިދާޅުވީ، ރިޔާސީ ރޭހުގެ ކުރިން ބަރުލަމާނީ ނިޒާމެއް ގެނައުމަށް ވޯޓެއް ނެގުމަށް ފާސް ނުކުރި ނަމަވެސް، ރައީސް ނަޝީދު ވިދާޅުވިފަދައިން، އެމްޑީޕީއަށް ލިބިގެންދާ ވޯޓު މަދުވާނެކަމަށް ގަބޫލު ނުކުރައްވާކަމަށެވެ. އަދި އެ މަނިކުފާނު ގަބޫލު ކުރާގޮތުން ރާއްޖޭގެ ހިންގުން އޮންނަންވާނީ، ގިނަ ބައެއްގެ ވިސްނުން އެކުލެވޭ ގޮތަކަށް ކަމަށްވެސް ރައީސް ސާލިހު ފާހަގަކުރެއްވިއެވެ.
މީގެ އިތުރުން ރައީސް ސާލިހު ވިދާޅުވީ، އެ މަނިކުފާނު ކުރިންވެސް ވިދާޅުވި ގޮތަށް، އެ މަނިކުފާނު ހުންނެވީ، ކުރިއަށް އޮތް ރިޔާސީ އިންތިހާބުގައި އެމްޑީޕީގެ ފަރާތުން ބައިވެރިވުމަށް ތައްޔާރަށް ކަމަށެވެ. އެހެން ނަމަވެސް، އެމްޑީޕީގެ ފަރާތުން ނުކުންނާނީ އެ މަނިކުފާނު ކަމެއް ނުވަތަ އެހެން ފަރާތެއް ކަމެއްވެސް އަދި ސާފުވެފައި ނުވާކަމަށްވެސް ރައީސް ސާލިހު ފާހަގަކުރެއްވިއެވެ.
ރައީސް ނަޝީދު ހުށައަޅާފައިވާ ބަރުލަމާނީ ނިޒާމުގެ ގަރާރާއި ގުޅިގެން، އެމްޑީޕީގެ ތެރޭގައިވަނީ ބައިބައިވުންތަކެއް އުފެދިފައެވެ. އެގޮތުން ރައީސް ސާލިހަށް ތާއީދު ކުރާ މެމްބަރުން ރިޔާސީ ނިޒާމު ދެމެހެއްޓުމަށް ވަކާލާތު ކުރަމުންދާއިރު، ރައީސް ނަޝީދުގެ ފެކްޝަނުގައި ތިބި މެމްބަރުންދަނީ، ބަރުލަމާނީ ނިޒާމެއް ގެނައުމަށް، ނިޒާމީ ވޯޓަކަށް އެހުން މުހިންމުކަމަށް ފާހަގަކޮށް އެ ނިޒާމަށް ވަކާލާތުކޮށް ވާހަކަދައްކަވަމުންނެވެ.
