ދިވެހިރާއްޖެ، ކޮމަންވެލްތު ޖަމާއަތުގެ ޕާލިމެންޓަރީ އެސޯސިއޭޝަނާއި ގުޅުމަށް ހުށައަޅާފައިވާ ހުށައެޅުން އެ ޖަމާއަތުގެ އާންމު މަޖިލީހުގައި ބަލައިގަނެފިއެވެ.
ރާއްޖެ ކޮމަންވެލްތު ޖަމާއަތުން ވަކިވެފައިވާތާ ގިނަ އަހަރުތަކަކަށްފަހު، އަނބުރާ ގުޅިފައިވަނީ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުގެ އިސްނެގުމުގެ މަތިންނެވެ. ކޮމަންވެލްތު ޖަމާއަތުގެ ޕާލިމެންޓަރީ އެސޯސީއޭޝަނުން، ރާއްޖޭގެ ހުށައެޅުން ބަލައިގަނެފައިވަނީ، ކެނެޑާގެ ހެލިފެކްސްގައި ބޭއްވި 65 ވަނަ ކޮމަންވެލްތު ޕާލިމެންޓަރީ ކޮންފަރެންސް ބައްދަލުވުމެ ތެރެއިންނެވެ.
ކެނެޑާގައި ކުރިއަށް ގެންދިޔަ ކޮމަންވެލްތުގެ އާންމު ބައްދަލުވުމުގައި ދިވެހިރާއްޖެ ތަމްސީލުކޮށްދެއްވީ ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ހިތަދޫ އިތުރު ދާއިރާގެ މެމްބަރު މުހައްމަދު އަސްލަމްއެވެ.
ދިވެހިރާއްޖެ ކޮމަންވެލްތު ޖަމާއަތާއި ވަކި ވެފައިވަނީ، ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ދައުރުގައެވެ.
The General Assembly of Commonwealth Parliamentary Association has formally confirmed Maldives' bid to rejoin CPA and form CPA Maldives Branch. Majority Leader Honorable MP @aslamdp is representing the Maldives at 65th Commonwealth Parliamentary Conference in Halifax, Canada. pic.twitter.com/cbM9pbWB7V
— People's Majlis (@mvpeoplesmajlis) August 25, 2022
ދިވެހިރާއްޖެ ކޮމަންވެލްތުގެ ޕާލިމެންޓަރީ އެސޯސިއޭޝަނާއި ގުޅުމަށް އެދުނު އެދުން ބަލައިގަނެފައިވާއިރު، މަޖިލީހުގެ ރައީސް މުހައްމަދު ނަޝީދުވަނީ ދާދި ފަހުންވެސް އެ ޖަމާއަތަށް ނިސްބަތްކޮށް ބަހުގެ ހަމަލާތަކެއް އަމާޒު ކުރައްވާފައެވެ. އެގޮތުން އެ ޖަމާއަތަކީ، އެއްވެސް ގައުމަކަށް އެހީތެރިކަން ފޯރުކޮށްދިނުމުގެ ގާބިލުކަން ލިބިފައިވާ ޖަމާއަތެއް ނޫންކަމަށާއި، ޖަމާއަތުގެ އެންމެ ބޮޑު އެއް މައްސަލައަކީ ބޭންކެއް ނެތުންކަމަށްވެސް އެ މަނިކުފާނުވަނީ ފާހަގަކުރައްވާފައެވެ.