އިދިކޮޅުގެ ރިޔާސީ ކެނޑިޑޭޓު، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހއ. އަތޮޅަށް ކުރައްވާ ދަތުރުފުޅުގެ ތެރެއިން މިއަދު ތުރާކުނު އަދި ކެލާއަށް ވަޑައިގަންނަވާނެކަމަށް ޕީޕީއެމް އިން ބުނެފިއެވެ.
މި ދަތުރުފުޅުގައި ހއ އަތޮޅުން ފަސް ރަށަކަށް ރައީސް ޔާމީން ވަޑައިގެންނެވުމަށް ހަމަޖެހިފައިވާއިރު، އިއްޔެ އެމަނިކުފާނު ހުންނެވީ އިހަވަންދޫގައެވެ. އިހަވަންދޫއިން ރައީސް ޔާމީން އަށް ހޫނު މަރުހަބާއެއް ކިޔާފައިވާއިރު. ރޭ އެރަށުގައި ވަނީ ބޮޑު ޖަލްސާއެއްވެސް ބާއްވާފައެވެ. މި ޖަލްސާގައި ރައީސް ޔާމީން ވަނީ ސަރުކާރުން އެ ރަށަށް އިހުމާލުވެފަިއވާކަމަށް ފާހަގަކުރައްވާ، ސަރުކާރުގެ ސިޔާސަތުތައް އަދި އެމްޑީޕީގެ އިސްވެރިންނަށް ގިނަ ތުހުމަތުތަކެއްވެސް ކުރައްވާފައެވެ.
ރައްޔިތުންގެ ރައީސް 😊#RY2023 pic.twitter.com/DJ1d2O0ZBV
— Ahmed Shiyam (@Shiyamaldives) October 15, 2022
ހދ. ހަނިމާދޫ މަގުން ހއ. އަށް ކުރައްވާ މި ދަތުރުފުޅުގައި އެމަނިކުފާނު ވަނީ ހަނިމާދޫގައި ތިއްބެވި އިދިކޮޅުގެ ހަރަކާތްތަކުގައި އިސްކޮށް އުޅޭ ފަރާތްތަކާއިވެސް ބައްދަލު ކުރައްވައިފައެވެ.
ޕީޕީއެމުން ބުނީ މިއަދު ރައީސް ޔާމީން ތުރާކުނު އަދި ކެލާއަށް ވަޑައިގަންނަވާނެކަމަށާއި، ކެލާގައި އެމަނިކުފާނު ބައިވެރިވެވަޑައިގަންނަވާ ޖަލްސާއެއް މިރޭ އޮންނާނެކަމަށެވެ.
ޕީޕީއެމުން ބުނެފައިވާ ގޮތުގައި ޔާމީންގެ މި ދަތުރުފުޅުގައި އެންމެ މުހިއްމު އެއް ކަމަކަށް އޮތީ 2023 އަށް އެ ޕާޓީގެ މެނިފެސްޓޯ ތައްޔާރުކުރުމުގައި އާންމުންގެ ހިޔާލާއި މަޝްވަރާ ހޯދުމެވެ. އޭގެ ތެރޭގައި މަސްވެރިންނާއި ސަރުކާރު ހިންގުމުގެ ދާއިރާއަށް ގެންނަންޖެހޭ ބަދަލުތައް ކަހަލަ އެކި ކަންކަމުގައި ރައްޔިތުންގެ ހިޔާލު ހޯދުން އޮންނާނެ އެވެ. އަދި ރައްޔިތުންގެ ހާލަތު ދެނެގަތުމަށްޓަކައި މަސައްކަތްތަކެއް ކުރައްވާނެކަމަށް ބުނެފައިވެ އެވެ.
