އިދިކޮޅުގެ ރިޔާސީ ކެނޑިޑޭޓު ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ޖަލުގައި ބާއްވައިގެން ނުވާނެކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް ކާނަލް ރިޓަޔާޑް މުހައްމަދު ނާޒިމް ވިދާޅުވީ ރައީސް ޔާމީންގެ ސަޕޯޓަރުންގެ ތާއީދު ހޯއްދެވުމުގެ ނިޔަތުގައި ނަމަ އެ ވާހަކަ ދެއްކުން ހުއްޓާލުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) ގޮވާލައިފި އެވެ.
2023 ގެ ރިޔާސީ އިންތިހާބުގައި ވާދަ ކުރައްވާނެކަމަށް އިއުލާނު ކުރައްވާފައިވާ، ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު ނާޒިމް ދަނީ ކެމްޕެއިން ޖަލްސާތަކާއި ބައްދަލުވުންތައް ބާއްވަމުންނެވެ. ސަރުކާރާއި އެއްކޮޅު، އަދި ސަރުކާރާއި ދެކޮޅު ވާހަކަތައް ވެސް ދައްކަވާ ނާޒިމަކީ މީގެ ކުރިން ރައީސް ޔާމީންގެ ސިޔާސަތުތަކަށް ވަރަށް ބޮޑަށް ފާޑުވިދާޅުވި ބޭފުޅެކެވެ. ހާއްސަކޮށް ރައީސް ޔާމިން ސަރުކާރުގެ ޑިފެންސް މިނިސްޓަރުކަމުގައި، އެމަނިކުފާނު އޭނާއަށް ދެއްވީ އަނިޔާކަމަށް ވެސް ވިދާޅުވެފައި ވެއެވެ.
ޕާޓީ އޮފީހުގައި ރޭ އޮތް ކެމްޕެއިން ޖަލްސާއެއްގައި ނާޒިމް ވިދާޅުވެފައި ވަނީ، ރިޔާސީ އިންތިހާބު ގާތްވެފައިވާއިރު އިދިކޮޅުގެ ލީޑަރު ރައީސް ޔާމީން ޖަލު ހުކުމެއްގައި ހުންނެވުމުން ކަންބޮޑުވާކަމަށެވެ. ރައީސް ޔާމީނަކީ އިދިކޮޅު ކޮންގްރެސް ކޯލިޝަނުން ކަނޑައަޅާފައިވާ ރިޔާސީ ކެނޑިޑޭޓުކަން ފާހަގަކުރައްވައި ނާޒިމް ވިދާޅުވީ، ރައީސް ޔާމީން ޖަލުގައި އޮންނަވަން ޖެހޭކަމަށް ގަބޫލު ނުކުރާކަމަށެވެ.
ނާޒިމްގެ ވާހަކަތަކާއި މެދު ގިނަ ބަޔަކު ސުވާލު އުފައްދަމުން ގެންދާތީ، ތާރިގު ވިދާޅުވީ ނާޒިމް ބޭނުން ވަނީ ރައީސް ޔާމީނަށް ތާއީދު ކުރާ މެމްބަރުންގެ ވޯޓު ނަމަ އެކަމާއި މެދު ހިތާމަ ކުރާކަމަށެވެ.
ނާޒިމްއެވެ. ތިއީ ރައީސް ޔާމިންގެ ސަޕޯޓަރުންގެ ވޯޓްލިބޭނެކަމަށް ދައްކަވާ ވާހަކައެއް ނަމަ ހިތާމަހުއްޓެވެ. ރައީސް ޔާމިން ކުރައްވަނީ ރާއްޖެ މިނިވަންކުރުމުގެ ޖިހާދެކެވެ. ‘އިންޑިޔާ ސިފައިން މިހާރުން މިހާރަށް ފައިބަން ގޮވާލަބަލާށެވެ.’ ތިހުރި ދިމާލެއް ސާފުވާނީ އޭރުންނެވެ. @nazim7878 pic.twitter.com/aXjvEBz8Bo
— Ahmed Thariq (@AhmedThaariq) February 17, 2023
ތާރިގު ވިދާޅުވީ، ރައީސް ޔާމީނަކީ ދިވެހިރާއްޖެ މިނިވަން ކުރެއްވުމަށްޓަކައި ޖިހާދު ކުރައްވަމުންދާ ބޭފުޅެއްކަމަށެވެ. އެހެންކަމުން ނާޒިމް ރައީސް ޔާމީން ދިފާއު ކުރައްވާ ވާހަކަދެއްކެވީ ކޮން މަގުސަދެއް ހާސިލު ކުރެއްވުމަށްތޯ ހާމަވަގެންދާނެ ގޮތެއްގެ މަތިން އަމަލު ކުރެއްވުމަށް ގޮވާލި އެވެ.
ތާރިގު ވިދާޅުވީ، އިންޑިއާ ސިފައިން މިހާރުން މިހާރަށް ރާއްޖެއިން ފޭބުމަށް ގޮވާލަންވީކަމަށެވެ. އެހިސާބުން ނާޒިމު ހާސިލު ކުރައްވަން ބޭނުންވާ މަގުސަދު ހާމަަވެގެންދާނެކަމަށް ވިދާޅުވިއެވެ.