ރައީސް އިބްރާހިމް މުހައްމަދު ސޯލިހުގެ އެޑްވައިޒަރުގެ މަގާމުގައި ހުންނެވި މުހައްމަދު ޝިހާބް މަގާމުން އިސްތިއުފާ ދެއްވައިފި އެވެ.
ރައީސުލްޖުމްހޫރިއްޔާގެ އޮފީހުން ވަނީ ޝިހާބު މަގާމުން ވަކިވުމަށް، ސިޓީ ފޮނުވާފައިވާކަން ކަށަވަރުކޮށްދެއްވާފަ އެވެ.
ޝިހާބު ސަރުކާރުގެ މަގާމުން އިސްތިއުފާ ދެއްވި ސަބަބެއް ސާފެއް ނޫނެވެ.
އެމްޑީޕީގެ އެތެރޭގެ މައްސަލަތަކުގެ ތެރޭގައި ވެސް ވަކިކޮޅެއް ނަންގަވައި ވާހަކަ ދައްކަވާފައި ނުވާ ޝިހާބަކީ ރައީސް މުހައްމަދު ނަޝީދާއި އަރިސް ބޭފުޅެކެވެ. އަދި ޑިމޮކްރެޓްސް އުފެއްދުމުގެ މަސައްކަތް ފެށުމުގެ ކުރިން، މެމްބަރުން ޖުމްހޫރީ ޕާޓީއާއި އެކު ކުރިޔަށް ގެންދިޔަ ބައްދަލުވުމެއްގައި ޝިހާބު ހުންނަވާ ފޮޓޯއެއް އޭރު އާއްމުވި އެވެ. އަދި އެކަމަށް ސަރުކާރުގެ މެމްބަރުން ޝިހާބަށް ވަރަށް ބޮޑަށް ފާޑުވިދާޅުވެ ވާހަކަ ދެއްކެވި އެވެ.
ރައީސްގެ ސްޕެޝަލް އެޑްވައިޒަރުގެ މަގާމަށް ޝިހާބް އައްޔަން ކުރެއްވީ ނޮބެމްބަރު 15، 2019 ގަ އެވެ.
ޝިހާބް ވަނީ ކުރިން ރައްޔިތުންގެ މަޖިލީހުގެ މެމްބަރު ކަމާއި ހޯމް މިނިސްޓަރުގެ މަގާމާއި މާލޭގެ މޭޔަރުގެ މަގާމު ވެސް އަދާކުރައްވައިފަ އެވެ.
