އިދިކޮޅު ކޮންގްރެސް ކޯލިޝަންގެ ރިޔާސީ ކެންޑިޑޭޓު މާލެ ސިޓީގެ މޭޔަރ ޑރ މުހައްމަދު މުއިއްޒު އަކީ ރައީސް އިބްރާޙިމް މުހައްމަދު ސާލިހުގެ އެޖެންޓެއްކަމަށް މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
އިދިކޮޅުގެ ރިޔާސީ ޓިކެޓު ހަވާލުކުރެވިފައިވާ ރައީސް ޔާމީންއަށް އިންތިހާބުގައި ވާދަނުކުރެވޭނެކަމަށް ސުޕްރީމް ކޯޓުން ކަނޑައެޅުމާއިއެކު، އެމަނިކުފާނުވަނީ އެ ޕާޓީއިން ރިޔާސީ އިންތިހާބު ބޮއިކޮޓުކުރުމާއިމެދު ގޮތެއް ނިންމުމަށް އިރުޝާދު ދެއްވާފައެވެ. ހަމަނުޖެހުންތަކަކަށްފަހު ޕީއެންސީގެ ރިޔާސީ ކެންޑިޑޭޓު މޭޔަރ މުއިއްޒުއަށް ތާއީދުކުރުމަށް އިދިކޮޅު ލީޑަރޝިޕުންވަނީ ނިންމާފައެވެ. އަދި ރިޔާސީ ކެމްޕެއިންއަށް ތައްޔާރުވުމުގެ ގޮތުން މޭޔަރވެސް ހިމެނޭހެން ލީޑަރޝިޕުން ހަރަކާތްތައްވެސް ކުރިއަށް ގެންދަން ފަށައިފިއެވެ.
އިދިކޮޅުގެ ހަރަކާތެއްގައި މޭޔަރ މުއިއްޒު ވާހަކަދައްކަވާ ވީޑިއޯއެއް ސޯޝަލްމީޑިއާގައި ހިއްސާކުރައްވާ އާޒިމްވަނީ މުއިއްޒުއަށް ފާޑުވިދާޅުވެފައެވެ. އޭނާ ވިދާޅުވީ، މުއިއްޒުއަކީ ރައީސް ސާލިހުގެ އެޖެންޓެއްކަމަށެވެ. އާޒިމް ވިދާޅުވީ، ކޯޓުތަކުގައި ހުރި މުއިއްޒުގެ މައްސަލަތައް ނައިގައިދިނީ އަދި އޭނާއަށް އިންތިހާބުގައި ކުރިމަތިލުމަށް ބޭނުންވާ ރެކޯޑު ސާފުކޮށްދިނީ ސަރުކާރުންކަމަށެވެ.
މިއީ @ibusolih ގެ އެޖެންޓެއް. ކޯޓުތަކުގައި ހުރި @MMuizzu ގެ މައްސަލަތައް ނަގައިދީގެން ރެކޯޑް
ސާފުކޮށްދިނީ ސަރުކާރުން، ނޫމަޑި މައްސަލަ ރައީސުލް
ޖުމްހޫރިއްޔާ ކޯޓުތަކަށް އަތްބާނައިގެން ނިންމަދިނީ.
ޕީޕީއެމް ގެ ސެނެޓް މުއިޒް ގަތީ އިބްރާހިމް ފައިސާ ދީގެން. pic.twitter.com/Ds4fXhocB8
— 𝐀𝐥𝐢 𝐀𝐳𝐢𝐦 (@aliaazim) August 9, 2023
އާޒިމް ވިދާޅުވީ، މުއިއްޒުގެ މައްޗަށް ތުހުމަތުތައް ކުރެވިފައިވާ ނޫމަޑި މައްސަލަ ނިމިގެންދިޔައީ ރައީސް ސާލިހު ކޯޓަށް ”އަތްވާނައިގެން“ ނުފޫޒު ފޯރުއްވައިގެންކަމަށެވެ. އޭނާ ވިދާޅުވީ، މުއިއްޒު ހުންނެވީ ޕީޕީއެމްގެ ސެނެޓު ގަނެލައިގެންކަމަށާއި އެކަން ކުރެއްވީ ރައީސް ސާލިހުގެ ފައިސާގެ ބާރުގައިކަމަށެވެ.
އިދިކޮޅުގެ ރިޔާސީ ކެންޑިޑޭޓު މުއިއްޒުގެ މައްޗަށް އާޒިމް ތުހުމަތުތަކެއް ކުރެއްވިއިރު، މޭޔަރަކީ ރައީސް ޔާމީންއާއި ދެކޮޅަށް މަސައްކަތްކުރައްވަމުންދާ ފަރާތެއްކަމަށް ބުނެ މީގެ ކުރިން ސޯޝަލްމީޑިއާގައި އެކި ފަރާތްތަކުން ތުހުމަތުތައް އަމާޒުކޮށްފައިވާކަން ފާހަގަކުރެވެއެވެ.
