ރައްޔިތުންގެ މަޖިލީހުގެ ހުސް ގޮނޑިތަކެއް ހިމަަނައިގެން މެމްބަރުން ގުނަން ޖެހުމަކީ ބުއްދި ހަމަޖެހޭކަމަށް ނޫންކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެ އެވެ.
ރައީސުލްޖުމްހޫރިއްޔާ އަޒުލު ކުރުމުގެ މައްސަލަ ހިމެނޭހެން، މަޖިލީހުގެ މެމްބަރުން ގުނުމުގައި އަމަލު ކުރާ ގަވައިދަށް ގެނައި އިސްލާހުގެ މައްސަލަ ސުޕްރީމް ކޯޓަށް ބަންޑާރަ ނައިބުގެ އޮފީހަށް ހުށަަހެޅުމުން އެ ގަވައިދަށް އަމަލު ކުރުން މަޑުޖައްސާލުމަށް ވަގުތީ އަމުރެއް ވަނީ ނެރެފަ އެވެ. އެހެން ނަމަވެސް މަޖިލީހުގެ ނިންމުންތަކަށް އިތުރު އެއްވެސް ބަޔަކަށް ބަސް ނުބުނެވޭނެކަމަށް ތަކުރާރުކޮށް ވިދާޅުވެ އެކަމާ މެދު ގޮތެއް ނިންމަން މަޖިލީހުގެ މިއަދުގެ ޖަލްސާ ފެށުމާއި އެކު ރިޔާސަތުގައި ހުންނެވި މުހައްމަދު އަސްލަމް ހުށަހެޅި އެވެ.
ރިޔާސަތުން ހުށަހެޅި މައްސަލައިގެ ބަހުސަށް ހުޅުވާލުމުން، ރޮޒެއިނާ ވިދާޅުވީ މަޖިލީހުގައި ނެތް ބަޔަކު ހިމަނައިގެން ގޮނޑިތައް ގުނުމަކީ ބުއްދި ހަމަޖެހޭ ވާހަކައެއް ނޫންކަމަށެވެ. އަދި މަޖިލީހުގެ މެމްބަރުންގެ ގޮނޑިތައް ހުސްވެފައި ވަނީ، ގާނޫނުގައި ބުނާ މުއްދަތު ވެސް ނެތުމާއި އެކު ދެން އަލުން އިންތިހާބު ނުކުރެވޭނެ ހާލަތްތަކުގެ ތެރެއިންކަމަށް އޭނާ ވިދާޅުވި އެވެ.
ރޮޒެއިނާ ވިދާޅުވީ މިވަގުތު، މަޖިލީހުގައި ނެތް މެމްބަރުން ހިމަނައިގެން މަސައްކަތް ކުރެވޭނެ ހަމައެއް ނެތްކަމަށާއި ސަރުކާރުގެ މަގާމުތަކަށް ދިއުމުގެ ގޮތުން އިސްތިއުފާ ދެއްވި މެމްބަރުން ވޯޓަށް އަހާ ގަޑިތަކުގައި ނުތިބޭނެކަމަށެވެ.
ދެން އެހެން ވިއްޔާ ވޯޓު ނަގާއިރު ވެސް އެ ގޮނޑީގައި ކޮންމެވެސް ބަޔަކު ތިބެން ޖެހޭނެ، ބަހުސް ކުރާއިރު ވެސް ކޮންމެވެސް ބަޔަކު ތިބެން ޖެހޭނެ.. މިއިން އެއްވެސް ކަމެއްގައި ބައިވެރިނުވެވޭ ބަޔަކު ވޯޓަކު ބައިވެރި ނުވެވޭ، ބަހުސަކު ބައިވެރި ނުވެވޭ.. އެކަމަކު އަދަދު ގުނާއިރު ހަމަ މި މީހުން ހިމަނައިގެން.. އެހެންވިއްޔާ މީހަކު މަރުވީމަ ވެސް ހަމަ އެ މީހާ ހިމަނައިގެން ގުނަން ޖެހޭނީ، މަސައްކަތް ކުރިޔަށް ގެންދަން ޖެހޭނީ.. ދެން މިއަހަރު ކަދުރު ބަހާއިރުގައި ވެސް ގޭގޭގައި މަރުވެފައި ތިބި މީހުން ލައިގެން އަދަދު ގުނަން ވާނީ
ރޮޒެއިނާ ވިދާޅުވީ ސަރުކާރުތައް ބަދަލުވުމާއި އެކު އެއާއި އެއްވަރަށް ކޯޓުތައް ވެސް ބަދަލުވާ މަންޒަރު ފެންނަކަމަށެވެ.
އަޅުގަނޑު ހަމަ ވަރަށް ބޮޑަށް ރެސްޕެކްޓު ކުރަން މިވަގުތު ހަމަ ކޯޓު އަމުރު ނެރުނުއިރުގާ، އެއްވެސް ސިޔާސީ ކަމެއް ނެތި ބުނަން ޖެހޭ އެއްޗެއް ބުނަން ކެރޭ ފަނޑިޔާރުންނަށް. މިއީ ވަކި ފަނޑިޔާރެއްގެ ވާހަކައެއް ނޫން.. ހުރިހާ ފަނޑިޔާރުންގެ ވާހަކަ މިދައްކަނީ.. ބުއްދި ހަމަ ނުޖެހޭކަމެއް ކުރަން މި މަޖިލީހުގެ މައްޗަށް އަމުރު ކުރީމާ، މި މަޖިލީހަކީ ގާނޫނު ހަދާ މަޖިލީހަށްވެފައި…
ސުޕްރީމް ކޯޓުގެ އަމުރަށް ފާޑުވިދާޅުވެ ވާހަކަ ދައްކަވަމުން ގެންދަވާތީ، ރޮޒެއިނާގެ ވާހަކަ ހުއްޓުވައި ފޮނަދޫ ދާއިރާގެ މެމްބަރު މޫސާ ސިރާޖު ވަނީ ނިޒާމީ ނުކުތާއެއް ނަންގަވާފަ އެވެ. ސިރާޖު ވިދާޅުވީ މަޖިލިސް ގަވައިދުގެ 175 ވަނަ މާއްދާގެ (ބ) އާއި 181 ވަނަ މާއްދާގެ (ބ) އަދި 234 ވަނަ މާއްދާގެ އެއްވަނަ ނަމަބަރު ބުނާ ގޮތުގައި ޝަރީއަތުގައި ހިނގަމުން ދާ އެއްވެސް މައްސަލައެއްގެ މައްޗަށް ބަހުސް ނުކުރެވޭނެ އެވެ. އަދި ޝަރީއަތުގައި ހިނގަމުންދާ އެއްވެސް މައްސަލައަކަށް ބަހުސް ނުކުރެވޭނެކަމަށާއި، ސުޕްރީމް ކޯޓުގައި ގޮތް ނިންމުން ކުރިޔަށް އޮތްވައި މިގޮތަށް ބަހުސެއް ކުރިޔަށް ނުގެންދެވޭނެކަމަށް ސިރާޖު ވިދާޅުވި އެވެ.
ސިރާޖުގެ ނިޒާމީ ނުކުތާއަށް ފަހު، ކުޑަވަގުތުކޮޅަކަށް މަޖިލީހުގެ އަމީން އާންމު ފާތިމަތު ނިއުޝާއާއި އަސްލަމް މަޝްވަރާތަކެއް ކުރެއްވިތަން ފެނެ އެވެ.
ބެލެވޭ ގޮތުގައި ނިއުޝާ މެދުވެރިކޮށް އަސްލަމް ބެއްލެވީ، ސިރާޖު ވިދާޅުވެދެއްވި މަޖިލިސް ގަވައިދުގެ މާއްދާތަކެވެ. އެއަށް ފަހު އަސްލަމް ވިދާޅުވީ އޭގެ ތެރެއިން 180 ގައި ހިމެނެނީ ޝަރުތުގެ ވާހަކަތައްކަމަމަށާއި 175ގައި ބުނަނީ ކުއްލި މައްސަލައިގައި ފުރިހަމަވާން ޖެހޭ ސިފަތައް ކަމަށެވެ.
އަސްލަމް ވިދާޅުވީ ސުޕްރީމް ކޯޓުގެ ނިންމުމަށް ފަހު، މަޖިލީހުން ގޮތެއް ކަނޑައެޅުމަށް ހުށަހެޅީ މިއީ މުޅި މަޖިލީހުގެ މަސްލަހަތު އޮތް އިމްތިޔާޒު އޮތްކަމަކަށް ވާތީކަމަށެވެ. އަދި ރިޔާސަތުގެ ހުށަހެޅުމުގައި ވެސް ވިދާޅުވީ ގޮތަށް މަޖިލީހުގެ ތަރަހައިން ކުރާ އެއްވެސް ކަމެއްގެ މައްޗަށް އިތުރު ބަޔަކަށް ބަސް ނުބުނެވޭނެ ކަމަށެވެ.
އެއްވެސް އެހެން ފަރާތަކުން މަޖިލީހުން މިވެނި، މަސައްކަތެއް ކުރަން ޖެހޭނެއޭ.. އެވެނި މަސައްކަތެއް ކުރަން ޖެހޭނެއޭ.. އެކަން މަޑުކޮށްލަން، މިކަން މަޑުކޮށްލަން ބުނާ ބުނުމަކީ ދަތިކަމެއް.. އެހެންނަމަވެސް ދިވެހިރާއްޖޭގެ ސުޕްރީމް ކޯޓަށް އިހުތިރާމް ކުރުމުގެ ގޮތުން، މިވަނީ 87 އެއީ ޖުމްލަ އަދަދުކަމަށް މިއިނީ ކަނޑައަޅައިގެން މިއަދު..
އެހެން ނަމަވެސް ރައްދުގައި، އޭނާ ހުށަހެޅި ގަވައިދުތަކުގެ ރޫހަކީ ކޮބައިކަން ވަރަށް ސާފުކޮށް އެނގެން އެބައޮތް ކަމަށެވެ. އެހެންކަމުން ކުރިޔަށް މިދާ ބަހުސަކީ އެއްވެސް ހާލަތެއްގައި ކުރެވޭނެކަމެއް ނޫންކަމަށް ތަކުރާރުކޮށް ސިރާޖު ވިދާޅުވި އެވެ.
ސިރާޖު ވިދާޅުވީ މަޖިލީހުގެކަމެއްގައި ސުޕްރީމް ކޯޓުން ގޮތެއް ކަނޑައެޅި މިއީ ފުރަތަމަ ފަހަރު ނޫންކަމަށާއި އެކަން ވަރަށް ރަނގަޅަށް މެމްބަރުންނަށް އެނގިވަޑައިގަންނަވާނެ ކަމަށެވެ.
އެހެންކަމުން ކަނޑައެޅިގެން ޝަރީއަތަށް ނުފޫޒު ފޯރުވުމަށް އެއްވެސް އަމަލެއް ނުހިންގަން ސިރާޖު ގޮވާލެއްވި އެވެ.
