ބިރުވެރިކަން އަލުން އިޔާދަވެފައިވާކަމަށާއި، އިދިކޮޅު ލީޑަރުން ހައްޔަރުކުރުމުގެ ތައްޔާރީތައް ސަރުކާރުން ދަނީ ވަމުންކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އެ ޕާޓީގެ ކެމްޕެއިން ޖަލްސާއެއްގައެވެ. ރައީސް ސާލިހު ވިދާޅުވީ މި ސަރުކާރުން ދަނީ ވަޒީފާގެ ނުފޫޒުވެސް ފޯރުވަމުންކަމަށެވެ. އަދި ސިޔާސީ ހަރަކާތްތައް ހުއްޓުވުމަށް މަސައްކަތް ކުރަމުންދާކަމަށް ވިދާޅުވިއެވެ.
ސިޔާސީ ލީޑަރުންނާއި ދިމާކުރަން ފަށާފައިވާކަމަށް ފާހަގަކޮށް، އެމަނިކުފާނު އިޝާރާތް ކުރެއްވީ އެމްޑީޕީގެ ޗެއާޕާސަން ފައްޔާޒް އިސްމާއީލް ފުލުހަށް ހާޒިރުވުމަށް އަންގާފައިވާކަމަށެވެ.
މިކަންކަމުން ސަލާމަތްވުމަށްޓަކައި އެމްޑީޕީއަށް މަޖިލީހުގެ މެޖޯރިޓީ މުހިންމުކަމަށް ރައީސް ސާލިހު އަންނަނީ ވިދާޅުވަމުންނެވެ.
ރިޔާސީ އިންތިހާބަށް ކުރި ކެމްޕެއިންގައިވެސް ރައީސް ސާލިހު އަދި އެމްޑީޕީއިން އެންމެ ބޮޑަށް ދެއްކެވި ވާހަކައަކީ މިއީއެވެ. ޕީޕީއެމް/ޕީއެންސީގެ ވެރިކަމެއް ގާއިމްވެއްޖެނަމަ ގައުމުގެ އަމާންކަން ގެއްލި، ސިޔާސީ މައިދާން އެކީ ހަލަބޮލިވާނެކަމަށް ވިދާޅުވެ އެމަނިކުފާނު ވާހަކަދެއްކެވިއެވެ. އަދި ސިޔާސީ މިނިވަންކަމާއި، ހިޔާލުފާޅުކުރުމުގެ މިނިވަންކަންވެސް ގެއްލިގެންދާނެކަމަށް ވިދާޅުވިއެވެ.
ނޫސްވެރިންގެ ގަލަމުގައި ހިފަހައްޓާ، ސިޔާސީ ލީޑަރުން ޖަލުގެ ތޭރިތަކުގެ ފަހަތަށް ލާނެކަމަށް އެމަނިކުފާނު ވަނީ ވިދާޅުވެފައެވެ. މިއީ ޕީޕިއެމް/ޕީއެންސީގެ ފުރަތަމަ ވެރިކަމުގައިވެސް ފެނިގެން ގޮސްފައިވާ ސިފަތައްކަމަށް އެމަނިކުފާނު ވިދާޅުވިއެވެ.
