އެއްވެސް ފަރުދަކު ޕާޓީއަށް ވުރެ ބޮޑުނުވާނެ ކަމަށާއި، އަދި އެއްވެސް ޕާޓީއެއް މިގައުމަށްވުރެ ވެސް ބޮޑު ނުވާނެ ކަމަށް ކުރީގެ ރައީސް އިބްރާހީމް މުހައްމަދު ސާލިހް ވިދާޅުވެއްޖެއެވެ.
އެމްޑީޕީގެ ކޮންގްރެސްގައި ރައީސް ސާލިހް ވިދާޅުވީ، މިއަދު ޕާޓީގެ ތެރޭގައި އެންމެ ބޮޑަށް ހިނގަނީ، ކުރިއަށް އޮތް ރިޔާސީ އިންތިހާބަށް ވަމުންދާ ތައްޔާރީގެ ތެރެއިން ރިޔާސީ ޓިކްޓު ހޯދުމަށް ކުރަމުންދާ މަސައްކަތް ކަމަށެވެ. އަދި އިންޓާރނަލް އިންތިހާބުތަކުގައި ހަރުދަނާ ވާދަވެރިކަމެއް އޮންނަންޖެހޭ ކަމަށް އެމަނިކުފާނު ވިދާޅުވިއެވެ.
އެއް ކެންޑިޑޭޓު އަނެއް ކެންޑިޑޭޓުގެ ސިޔާސަތުތައް ތަފާތުވެދާނެ ކަމަށާއި، އަދި ވަކި ކެންޑިޑޭޓުންނަށް އާންމު މެމްބަރުން ކުރާ ތައީދުވެސް ތަފާތުވެދާނެ ކަމަށް ރައީސް ސާލިހް ވިދާޅުވިއެވެ.
އެހެންނަމަވެސް، އެ ވާދަވެރިކަން ނިމުމުން އަލުން އެކުގައި މަސައްކަތް ކުރުމުގެ ހިތްވަރު ކޮންމެ މީހެއް ގައިގައި ވެސް ހުންނަންވާނެ ކަމަށް ރައީސް ސާލިހް ވިދާޅުވިއެވެ. ޕާޓީގެ ތެރޭގައި ހިޔާލުތަފާތުވާ ދެ މީހުންނަކީ ދުޝްމަނުން ނޫން ކަމަށް ފާހަގަކުރައްވައި ރައީސް ސާލިހް ވިދާޅުވީ އެއީ ހަމަ އެއް ސިޔާސީ އާއިލާއެއްގެ މީހުން ކަމަށެވެ.
”އެއީ މިދެންނެވި ދިގު ދަތުރު އެކުގައި ކުރި އެކުވެރިން. އެތައް އަހަރެއް ވަންދެން އޮތް ގުޅުންތައް ވަގުތީ ސިޔާސީ ކަމަކުން ވަގުތުން ފަނޑުވެގެން ދިޔަ ނުދިނުމަށް އަޅުގަނޑުމެން މަސައްކަތް ކުރަންވާނެ. އަޅުގަނޑުމެންގެ ތެރޭގައި އުފެނދޭ ހިޔާލު ތަފާތުވުންތަކެއް ހުރި ކަމަކު އާންމު ރައްޔިތުންގެ މަސްލަހަތާ ދެކޮޅަށް އަޅުުގަނޑުމެންގެ ސަމާލުކަން އެނބުރިގެން ނުވާނެ،“
ރައީސް ސާލިހް ވިދާޅުވީ، އެއްވެސް ފަރުދަކު ޕާޓީއަށްވުރެ ބޮޑު ނުވާނެ ކަމަށާއި، އަދި އެއްވެސް ޕާޓީއެއް މި ގައުމަށްވުރެ ބޮޑު ނުވާނެ ކަމަށެވެ. އަލުން ވެރިކަން ހޯދުމަށްޓަކައި ދިވެހި ރައްޔިތުންގެ އިތުބާރު އަލުން ހޯދަންޖެހޭ ކަމަށް ވެސް އެމަނިކުފާނު ވިދާޅުވިއެވެ.
މީގެ އިތުރުން، އެމަނިކުފާނު ވިދާޅުވީ، އެމަނިކުފާނު ސިޔާސީ ކާމިޔާބީ ދެކެވަޑައިގެންފި ކަމަށާއި އަދި ސިޔާސީ ނާކަމިޔާބީވެސް ދެކެވަޑައިގެންފި ކަމަށެވެ. ވެރިކަމުގެ ބޮޑު ޒިންމާވެސް ނަންގަވައިފި ކަމަށާއި އަދި އެ ޒިންމާ އެހެން ފަރާތަކަށް ހަވާލުކުރުމުގެ މާނަވެސް އެނގިވަޑައިގެންފި ކަމަށް އެމަނިކުފާނު ވިދާޅުވިއެވެ.
