ރައީސުލްޖުމްހުރިއްޔާ ޑރ މުހައްމަދު މުއިއްޒުގެ މި ވެރިކަމުގެ މިސްރާބު ހުރީ ހުދުމުހުތާރު ވެރިކަމަކަށްކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އެމްޑީޕީއިން ”ލާމަރުކަޒީ ގުޅުން“ ނަމުގައި ކުޅުއްދުފުށި ސިޓީގައި ބޭއްވި ކޮންފަރެންސެއްގައެވެ. ރައީސް ސާލިހު ވިދާޅުވީ، ޑިމޮކްރަސީގައި މަސައްކަތް ކުރާނީ ރައްޔިތުންނާއި ގާތުންކަމަށެވެ. ނަމަވެސް މި ސަރުކާރުގެ މަސައްކަތްތައް ހުރީ އެއާއި އިދިކޮޅަށްކަމަށް ފާހަގަކޮށް ރައީސް ސާލިހު ވިދާޅުވީ ސަރުކާރުން މަސައްކަތް ކުރަމުން ދަނީ ބާރުތައް ޖަމާކުރުމަށްކަމަށެވެ.
މި ވެރިކަމުގައި ރައްޔިތުންގެ ވާހަކަތައް ގަބޫލުނުކުރާނެކަމަށާއި، މަސައްކަތްތައް ބައްޓަން ކުރާނީ އަމިއްލަ މަންފާއަށްޓަކައި އެކަނިކަމަށް އެމަނިކުފާނު ވިދާޅުވިއެވެ. އަދި ވިދާޅުވީ ސަރުކާރުން ހަދާ ދޮގުތައް ރައްޔިތުން ގަބޫލު ނުކުރާނެކަމަށެވެ. ވެރިމީހާއަށް ބާރުތައް ޖަމާކުރުމުން ފަސޭހަވާނެކަމަށް ވިދާޅުވީ ނަމަވެސް، އެއީ ކަން ހިނގާ ގޮތް ނޫންކަމަށް އެމަނިކުފާނު ވިދާޅުވިއެވެ. މިކަމާއި ދެކޮޅަށް ކުރަން ޖެހޭ މަސައްކަތްތައް އަބަދުވެސް ކުރާނެކަމަށް ރައީސް ސާލިހު ވިދާޅުވިއެވެ.
މި ސަރުކާރުން ވެރިކަމަށް އައުމަށްޓަކައި ހެދީ ދޮގުކަމާއި، އުފެއްދީ ފިތުނަކަން މިހާ ހާމަވަމުންދާކަމަށް ފާހަގަކޮށް އެމަނިކުފާނު ވިދާޅުވީ، ވައުދުތައްވެސްވީ ހިސާބެއް ކިތާބެއް ބެލުމެއް ނެތިކަމަށެވެ.
އަޅުގަނޑު މިދެންނެވިހެން އައީ ދޮގުވެރި، މަކަރުވެރި، ހީލަތްތެރި ރޭވުންތަކުގެ ތެރެއިން. މިއަދު އެދަނީ އެކަން ސާފުވަމުން.
އެމަނިކުފާނު ވިދާޅުވިއެވެ.
”ލާމަރުކަޒީ ގުޅުން“ ކޮންފަރެންސް އެމްޑީޕިއިން ކުރިއަށްދަނީ ރާއްޖޭގެ އެކި ސަރަހައްދުތަކަށް ބަލައިގެންނެވެ. މި ކޮންފަރެންސް ބޭއްވުމަށްޓަކައި އެމްޑީޕީގެ ލީޑަޝިޕުން މިހާރު ކުރާ ދަތުރަކީ އަންނަ އަންގާރަ ދުވަހުގެ ނިޔަލަށް ކުރާ ދަތުރެކެވެ.
