ހ. ޝީރީންވިލާގައި އަނިޔާވެރި ގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދުގެ މަރުގެ މައްސަލައިގައި ކުށުގެ ވެށިން ހައްޔަރު ކުރި އަލީ ޝާހިލް ތަހުގީގަށް ދިން ބަޔަނާތަކަށް އިންކާރުކޮށްފި އެވެ.
ހ. ޝީރިންވިލާގެ 09 ވަނަ ފަންގިފިލާގައި، ޝިއާއު މަރާލާފައި އޮއްވައި ފެނުނީ މިދިޔަ އަހަރުގެ އޮގަސްޓު މަހުގެ 06 ވަނަ ދުވަހު އެވެ. ހަށިގަނޑަށް ބޮޑެތި ގެއްލުންތަކެއް ދީ، ޝިއާއު މަރާލި މައްސަލައިގައި ކުށުގެ ވެށިން ހައްޔަރު ކުރީ އަލީ ޝާހިލް އެވެ. އިތުރު މީހެއް ނުވަތަ، ބައެއްގެ ބައިވެރިވުމެއް އޮތްކަމަށް ނުބެލެވޭ މި މައްސަލައިގައި ޝަރީއަތް ކުރިޔަށް ގެންދެވޭ ގޮތެއްވެފައި ނުވަނީ ޝާހިލް އެއްބާރުލުން ނުދޭތީ އެވެ.
ރާއްޖޭގެ ތާރީހުގައި ވެސް ހިނގައިދިޔަ އެންމެ އަނިޔާވެރި އެއް މަރުގެ މައްސަލައިގައި ޝާހިލްގެ މައްޗަށް ފަސް ދައުވާއެއް ކުރާއިރު، ބައެއް ދައުވާތައް ސިއްރުކޮށް އަޑުއެހުންތައް ވެސް ގެންދަނީ ސިއްރުކޮށްގެންނެވެ.
މައްސަލައިގައި ކަރިމިނަލް ކޯޓުގައި ބޭއްވި އަޑުއެހުމުގައި ޝާހިލް ވަނީ ދައުވާތަކަށް ޖަވާބުދާރީވުމަށް އުޒުރުވެރިވެފަ އެވެ. އޭނާ ބުނީ ދައުވާތަކަށް އިންކާރު ކުރާކަމަށާއި، ތަހުގީގު ބަޔާންތައް ބަލައިނުގަތުމަށް ހުށަހެޅުމަށް ބޭނުންވާކަމަށެވެ.
ދައުލަތުން ވަނީ މި މައްސަލައިގައި ބައެއް ހެކިންގެ ހެކި ބަސް ސިއްރުން ނެގުމަށް ބޭނުންވާކަމަށް ބުނެފަ އެވެ. އެހެންވެ ސިއްރު ހެކި ބަސް ހިމެނޭ ތިން ދައުވާގެ ޝަރީއަތުގެ ކުރީގެ ހުށަހެޅުންތަކަށް މިއަދު ފުރުސަތު ދިނެވެ.
ޝާހިލްގެ މައްޗަށް ދެން އުފުލާފައިވާ ދައުވާއަކީ އޮރިޔާން ކާޑު ގެންގުޅުމުގެ ކުށުގެ ދައުވާއާއި، މަސްތުވާތަކެތި ބޭނުން ކުރުމުގެ ކުށުގެ ދައުވާ އެވެ. މި ދެ ދައުވާއަށް ދެން އޮންނާނީ އިފްތިތާހީ ބަޔާން އިއްވައި ހެކި ބަސް ނެގުމެވެ.
މައްސަލައިގައި މިދިޔަ އަހަރު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، ޝާހިލްގެ މައްޗަށް ކުށް ސާބިތު ކުރެވޭ މިންވަރަށް އެކަށީގެންވާ ހެކި ލިބިފައިވާ ކަމަށެވެ. އަދި މަރާލި ގޮތުގެ ތަފްސީލާއި، މޯޓިވްކަމަށް ބެލެވޭ ބައެއް ގަބޫލު ކުރެވޭ ސަބަބުތައް ވެސް އެބަހުރި ކަމަށެވެ. މި މައްސަލައިގައި ގަސްތުގައި މީހަކު މެރުމުގެ ކުށުގެ ދައުވާ ޝާހިލްގެ މައްޗަށް ސާބިތު ކުރެވޭ މިންވަރަށް ހެކި ލިބިފައިވާކަމަށް ފުލުހުން ބުނެ އެވެ.
މައްސަލައިގައި ފުލުހުންނަށް އެންމެ ބޮޑަށް ދަތިވީ، ޝާހިލްގެ ފަރާތުން އެއްބާރުލުމެއް ނުލިބުމުންނެވެ. ނަމަވެސް މިހާރު ތަހުގީގަށް އޭނާ ވާހަކަ ދައްކަމުން ދާކަމަށް ފުލުހުން މައުލޫމާތު ދެ އެވެ.
ފުލުހުން ބުނީ ޝިއާއު މަރާލާފައި ވަނީ، ރާވައިގެންކަމަށް ނުބެލެވޭކަމަށާއި އެއީ ދިމާވި ކުއްލިކަމެއްގެ ތެރެއިން ހިނގައިދިޔަ ހާދިސާއެއްކަމަށް ބެލެވޭ ކަމަށެވެ. ޝާހިލް ހައްޔަރު ކުރިއިރު އޭނާ ހުރީ މަސްތުގެ ހާލަތުގަ އެވެ.
