ދުންފަތުގެ ބާވަތްތަކުން ނަގާ ޑިއުޓީ ބޮޑުކޮށްގެން، ސިނގިރޭޓު ބޭނުން ކުރާ މީހުންގެ އަދަދަށް އައި ބަދަލެއް ނެތްކަމަށް އިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.
ސަރުކާރުގެ ފަރާތުން މި ބިލު ހުށަހެޅުމުގެ ބޭނުމަކީ އެކްސްޕޯޓު އިމްޕޯޓު ގާނޫނުގެ ދަށުން ދުންފަތާއި ދުންފަތުން ތައްޔާރުކޮށްފައި ހުންނަ ބާވަތްތަކާއި ދުންފަތުގެ ބަދަލުގައި ބޭނުން ކުރާ ބާވާތްތަކުން ނަގަމުން އަންނަ އިމްޕޯޓު ޑިއުޓީ ބޮޑު ކުރުމަށެވެ. އަދި ދުންފަތް ކޮންޓްރޯލް ކުރުމާއި ބެހޭ ގާނޫނުގެ ދަށުން އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުން ކުރާ އެފަދަ އާލަތްތައް ދިވެހިރާއްޖެއަށް އެތެރެ ކުރުން މަނާކުރެވޭ ތާރީހާއި ހަމައަށް ހިނގާ މުއްދަތުގައި އެފަދަ ތަކެތިން ނަގާ އިމްޕޯޓު ޑިއުޓީ ބޮޑުކޮށް އިމްޕޯޓު ޑިއުޓީއާއި ރޯޔަލްޓީ މައާފު ކުރެވޭނެ އުސޫލުތައް ބިލުގައި ވަނީ ބަޔާންކޮށްފަ އެވެ.
ސަރުކާރުގެ ފަރާތުން ހުށަހަޅާފައިވާ ބިލުގައި ވަނީ، ސިނގިރޭޓާއި ބިޑި، އަދި އީ ސިނގިރޭޓާއި ހީޓެޓް ޓޮބޭކޯ ޕްރޮޑަކްޓުތަކުން 50 އިންސައްތަ ޑިއުޓީ ނެގުމަށެވެ.
ބިލަށް ބަހުސް ކުރައްވަމުން ޒިޔާދު ވިދާޅުވީ، އިމްޕޯޓު ޑިއުޓީ ނުވަތަ ރޯޔަލް ޑިއުޓީ މައާފު ކުރުމުގެ ބާރު ރައީސުލްޖުމްހޫރިއްޔާއަށް ލިބިދޭ ގޮތަށް ބިލު ފަރުމާ ކުރަން ޖެހޭ ސަބަބެއް ނުވިސްނޭ ކަމަށެވެ.
ދުންފަތުން ނަގާ ޑިއުޓީއާއި ގުޅޭގޮތުން ޒިޔާދު ވިދާޅުވީ މުދަލެއްގެ އަގަށް ގެންނަ ބަދަލުން ބޭނުންވާ ނަތީޖާ ނެރެވޭތޯ ސުވާލު އުފައްދަން ޖެހޭކަމަށެވެ. އަދި ރާއްޖޭގެ ތާރީހުގައި މިއަދާއި ހަމައަށް އައިއިރު ދުންފަތް ކޮންޓްރޯލް ކުރުމަށް ކުރި މަސައްކަތާއި، ސިނގިރޭޓު ބޭނުން ކުރާ މިންވަރު ދަށްކުރުމަށް ކުރެވުނު އެއްވެސް މަސައްކަތެއް ނުވަތަ އެކަމުގެ ނަތީޖާއެއް އެއްވެސް ފެނިފައި ނުވާކަމަށް ޒިޔާދު ވިދާޅުވި އެވެ.
އަޅުގަނޑުމެންނަށް ފެންނަން އޮތީ ކަސްޓަމްސްގެ ހިސާބުތަކުންނާއި، މިހެން ނެރޭ ހިސާބުތަކުން ފެންނަނީ އަގަށް ގެންނަ ބަދަލަލުން މިއަކަށް ބަދަލެއް ނާންނަކަން.. މިއީ ހަގީގަތް.. ވަރަށް ރަނގަޅު ވާހަކައެއް މިއީ ދައްކާލަން، ޒުވާނުން ދުންފަތާ ޖެހި ހަލާކުވެ ދަނީއޭ.. ހެދޭ ގާނޫނު ފޮތެއްގައި އޮންނަކަން އެކަނި، ލިޔާ ލިއުމެއް.. މިއަދާއި ހަމައަށް މިއިން ގާނޫނެއް ތަންފީޒެއް ނުކުރެވޭ..
ޒިޔާދު ވިދާޅުވީ ދުންފަތުގެ ބާވަތްތަކުގެ އަގު ބޮޑުކޮށްގެން، އެ ބޭނުން ކުރާ މީހުންގެ އަދަދު މަދު ނުވާކަން އެއީ ފެންނަން އޮތް ހަގީގަތްކަމަށާއި އެކަން ކަސްޓަމްސްގެ ތަފާހިސާބުތަކުން އެނގޭ ކަމަށެވެ.
ޒިޔާދު ވިދާޅުވީ މިއީ ދައުލަތުގެ އާމްދަނީ އިތުރު ކުރުމަށްޓަކައި އަޅާ ފިޔަވަޅެއް ނަމަ، މިއީ ރަނގަޅު ނިންމުމެއްކަމަށާއި އެ ނޫން ނިޔަތެއް ވެސް މިކަމުގައި އޮވެދާނެކަމަށް ގަބޫލު ނުކުރެވޭކަމަށެވެ.
ކިތަންމެ ބޮޑު ވެސް ކުރެވިދާނެ އަގު.. އެކަމަކު ލިބޭ އާމްދަނީ ހަރަދު ކުރަނީ ކޮން ގޮތަކަށްތޯ..
ޒިޔާދު ވިދާޅުވީ 19 ވަނަ މަޖިލީހުން ގާނޫނަށް ގެނައި އިސްލާހުގައި ވެސް އިމްޕޯޓު ޑިއުޓީ ބޮޑުކޮށްގެން ލިބޭ އާމްދަނީގެ ވަކި އިންސައްތައެއް ދުންފަތާ މީހުން ދުރު ކުރުމަށް މަސައްކަތް ކުރަން ބޭނުން ކުރުމަށް ހިމަނާފައި އޮތްކަމަށެވެ. ޓެކްސް ބޮޑުކޮށްގެން ބިލިއަނެއްހާ ރުފިޔާ ލިބޭނެކަމަށް ލަފާކުރާއިރު، އެ ފައިސާ ހަރަދު ކުރާނެ ގޮތެއް އަދި ދުންފަތާ މީހުން ދުރުހެލި ކުރުވުމަށް ކުރާނެ މަސައްކަތުގެ އެއްވެސް ވާހަކައެއް ބިލުގައި ނެތްކަމަށް ޒިޔާދު ވިދާޅުވި އެވެ.
ގާނޫނުގެ ދަށުން ހަދާ ގަވައިދުތައް ހަރުކަށިކޮށް، އުސޫލު އެކުލަވާލާއިރު އެ ނިންމުންތައް ތަންފީޒު ކުރެވޭ މިންވަރާއި މެދު ސުވާލު އުފައްދައި ޒިޔާދު ވިދާޅުވީ ވަކީން ސިނގިރޭޓު ވިއްކުން މަނާކަމަށާއި އެހެން ނަމަވެސް މިއީ ވެސް ތަންފީޒު ކުރެވޭ ގަވައިދެއް ނޫންކަމަށެވެ.
