ރާއްޖެ ބަނގުރޫޓުވާނީ ރައީސް ޑރ މުހައްމަދު މުއިއްޒު ވެވަޑައިގެންފައިވާ ވައުދުތަކުގެ ސަބަބުންކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ނޫސްވެރިންގެ ބައްދަލުވުމެއްގައި، 2025 ވަނަ އަހަރުގެ ބަޖެޓާ ގުޅޭގޮތުން ވާހަކަފުޅު ދައްކަވަމުން އަމީރު ފާހަގަކުރެއްވީ، މި މަހުގެ ތެރޭގައި ބަޖެޓުގެ މަސައްކަތްތައް ފެށުމަށް ހަމަޖެހިފައިވާ ކަމަށާއި، ސަރުކާރުގެ ވަޢުދުތައް ފުއްދުމަށް އިސްކަންދޭންވާނެ ކަމަށް އުންމީދު ކުރައްވށ ކަމަށެވެ.. އަދި މި ވަޢުދުތައް ބަޖެޓުގައި ހިމެނޭނެ ކަމަށް ޤަބޫލުކުރައްވާ ކަމަށް ވިދާޅުވިއެވެ.
އަމީރު އިތުރަށް ވިދާޅުވީ، އެމްޑީޕީން ގޮވާލަނީވެސް މި ކަމަށް ކަމަށާއި، ރައީސް މުޢިއްޒުގެ ވަޢުދުތައް ބަޖެޓުގައި ހިމަނަންޖެހޭނެ ކަމަށެވެ. ކުދި އަދަދުތަކުން ބަޖެޓު އެކުލަވާލުމުގެ ބަދަލުގައި، 2025 ވަނަ އަހަރުގެ ބަޖެޓުގައި 65,000 ޔުނިޓުގެ ބޯހިޔާވަހިކަމުގެ މަޝްރޫޢު ފުރިހަމަކުރުމަށް ބޭނުންވާ ފައިސާ ހިމެނޭނެ ކަމަށް އެމަނިކުފާނު ޔަޤީންކުރައްވާ ކަމަށް ވިދާޅުވިއެވެ.
މި މަޝްރޫޢުގެ ޖުމުލަ އަގު 60 ބިލިއަން ރުފިޔާއަށް އަރާނެ ކަމަށް އަންދާޒާކުރައްވާ ކަމަށާއި، އެހެންކަމުން 2025 ވަނަ އަހަރުގެ ބަޖެޓުގައި މަދުވެގެން 15 ބިލިއަން ރުފިޔާ ބޯހިޔާވަހިކަމުގެ މަޝްރޫޢުތަކަށް ކަނޑައެޅޭނެ ކަމަށް އަމީރު ލަފާކުރައްވާ ކަމަށް ވިދާޅުވިއެވެ.
މީގެ އިތުރުން، ރަސްމާލެ ޕްރޮޖެކްޓަށް ބޭނުންވާ 18.2 ބިލިއަން ރުފިޔާގެ ތެރެއިން އަހަރަކު 5 ބިލިއަން ރުފިޔާއާ ގާތްކުރާ އަދަދެއް ބަޖެޓުގައި ހިމެނހިމެނެންޖެހޭނެ ކަމަށާއި، އައްޑޫގައި ބްރިޖެއް އެޅުމަށް ބޭނުންވާ ގާތްގަނޑަކަށް 1 ބިލިއަން ޑޮލަރުގެ ޚަރަދުވެސް ހިމަނަންޖެހޭނެ ކަމަށް އަމީރު ފާހަގަކުރެއްވިއެވެ.
އޭނާ ވިދާޅުވީ، އެއީ ގާތްގަނޑަކަށް 15 ބިލިއަން ރުފިޔާކަމަށާއި އައްޑޫގެ ބުރިޖު ނިންމުމަށްޓަކައި ބަޖެޓުގައި 5 ބިލިއަނާއި ގާތްކުރާ އަދަދެއް ހިމެނެން ޖެހޭކަމަށެވެ. އަމީރު ވިދާޅުވީ ތިލަމާލެ ބުރިޖުގެ މަސައްކަތްތައް ކުރިއަށް ގެންދިއުމަށްޓަކައި އިތުރު 7 ބިލިއަން ރުފިޔާ ދޫކުރާނެކަމަށް ބެލެވޭކަމަށާއި އެ އަދަދުވެސް 2025 ވަނަ އަހަރުގެ ބަޖެޓުގައި ހިމަނާނެކަމަށް ގަބޫލުކުރައްވާކަމަށެވެ.
އަމީރު ވިދާޅުވީ، އިތުރު މަޝްރޫޢުތައް ހިންގުމަށްޓަކައިި 20 ބިލިއަން ހަރަދުވެގެންދާނެކަމަށް އަންދާޒާކުރައްވާކަމަށާއި އެހެންކަމުން އަންނަ އަހަރުގެ ބަޖެޓުގައި އެކަމަށް 4 ނުވަތަ 5 ބިލިއަން ހިމެނިފައިވާނެކަމަށް ދެކިވަޑައިގަންނަވާކަމަށެވެ. އަދި ކުރިއަށް އޮތް އަހަރުގެ ބަޖެޓު އެކުލަވާލެވެންވާނީ އިސްވެ ދެންނެވި ކަންކަން ހިމަނައިގެންކަމަށް އެމްޑީޕީއިން ގަބޫލުކުރާކަމަށާއި އެހެންނަމަވެސް ރައީސް މުއިއްޒުގެ ވައުދުތަކުގެ ދަށުވެގެން ރާއްޖެ ބަނގުރޫޓުވެގެންދާނެކަމަށް ދެކިވަޑައިގަންނަވާކަންވެސް ހިއްސާކުރެއްވިއެވެ.
އަމީރު ވިދާޅުވީ، އެހެން ވިދާޅުވާ ސަބަބަކީ ފިނޭންސް މިނިސްޓްރީގެ ފިސްކަލް ޕޮލިސީގެ އަމާޒަކީ ރައީސް މުއިއްޒުގެ ވައުދުތައް ފުއްދުންކަމަށް ބުނެފައިވުމުންކަމަށާއި ރާއްޖެ ބަނގުރޫޓުވެގެންދާނީ ރައީސް މުއިއްޒުގެ ހުރިހާ ވައުދެއް ރަނުން ރަނަށް ފުއްދަން ކުރާ މަސައްކަތްތަކުގެ ސަބަބުންކަމަށެވެ.
