ސިނގިރޭޓުގެ އަގު ބޮޑުކުރުމާއިއެކު ދިވެހިރާއްޖޭގައި އެކަމުގެ ސަބަބުން ނުކުމެގެން އަންނާނެ މައްސަލަތަކާއިމެދު ސުވާލު އުފެދޭކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ގަފޫރް މޫސާ ވިދާޅުވެއްޖެއެވެ.
ދުންފަތުގެ އިސްތިއުމާލުކުރުމާއި ދެކޮޅަށް ސަރުކާރުން ކުރަމުންދާ މަސައްކަތްތަކާއި ގުޅޭގޮތުން ރައްޔިތުންގެ މަޖިލީހުގެ ތަޅުމުގައި ވާހަކަދައްކަވަމުން މެމްބަރު ގަފޫރުވަނީ ގެނައުމަށް ކަނޑައެޅިފައިވާ އިސްލާހުތަކާއިމެދު ވަރަށް ބޮޑަށް ވިސްނުމަށްފަހު ގޮތް ނިންމުން މުހިންމުކަމަށް ފާހަގަކުރައްވާފައެވެ. ގަފޫރު ވިދާޅުވީ، ދުންފަތުން ގެއްލުން ލިބޭކަމަކީ ޝައްކެއް ނެތްކަމެއްކަމަށާއި އެއީ ދެބަސްވެވެން ނެތް ހަގީގަތެއްކަމަށެވެ.
އެހެންނަމަވެސް ސިނގިރޭޓާއި ދުންފަތުގެ ޑިއުޓީ ބޮޑުކުރާއިރު އެކަމަކީ ރައްޔިތުންނަށް ތަހައްމަލުކުރެވޭނެ ކަމެއްތޯ ވިސްނާލަންޖެހޭކަމަށާއި މިއަދު ރައްޔިތުންގެ މަޖިލީހުން ދަނީ ހާލަތާއި ނުބައްދަލު ބާރެއްގެ ބޭނުންކުރުމާއި ދިމާލަށް ކަމަށް ގަބޫލުކުރައްވާކަމަށެވެ. އޭނާ ވިދާޅުވީ، އޮސްޓްރޭލިއާ އަކީ ޖީސެވެންގެ ގައުމެއްކަމަށާއި އެއީ ދުނިޔޭގެ އެންމެ ސިނގިރޭޓު އަގުބޮޑު އެއް ގައުމުކަމަށެވެ. އޭނާ ވިދާޅުވީ، ދެވަނަ ގައުމަކަށް މިވަނީ ދިވެހިރާއްޖެކަމަށާއި އެހެންނަމަވެސް ރާއްޖެއަކީ ތިންވަނަ ދުނިޔޭގެ ގައުމެއްކަމަށެވެ.
ގަފޫރު ވިދާޅުވީ، ސިނގިރޭޓުން ޑިއުޓީ ބޮޑުކުރުމަށް ދެކޮޅު ނޫންކަމަށްވީނަމަވެސް މިހާރު ބޮޑުކުރުމަށް މަސައްކަތްކުރަމުންދާ މިންގަނޑަށް ބޮޑުކުރުމަށް ކަނޑައެޅިގެން ދެކޮޅުކަމަށެވެ. އޭނާ ވިދާޅުވީ، ރާއްޖޭގެ 18 އަހަރުން މަތީގެ އާބާދީގެ 40 އިންސައްތައަކީ ދުންފަތުގެ ބޭނުން ކުރާ ބައެއްކަމަށާއި އެހެންކަމުން ފިޔަވަޅުތައް އެޅުމުގައި ވިސްނުންތެރިކަމާއިއެކު އަމަލުކުރަން ޖެހޭކަމަށެވެ.
އޭނާ ވިދާޅުވީ، ކަންކަން ހުރި ގޮތުން ރައްޔިތުންނަށް ތަހައްމަލުނުކުރެވޭ ވަރުގެ ބޮޑު އަގެއް ކަނޑައެޅުމުން ދެން އެކަމުގެ ސަބަބުން ގައުމަށް ވެގެންދާނެ ގޮތާއިމެދު ދެވަނަ ފަހަރަކަށް ވިސްނާލުން މުހިންމުކަމަށެވެ. އަދި އޮޅިގެން ނަމަވެސް ބިލު ހުށައެޅުމުގެ ތެރެއިން މި މަސައްކަތްތަކަކީ ދައުލަތުގެ އާމްދަނީ އިތުރުކުރުމަށްޓަކައި ކުރެވިގެންދާ މަސައްކަތްތަކެއްކަން ހާމަވެފައިވާކަމަށްވެސް އިޝާރާތްކުރެއްވިއެވެ.
ގަފޫރު ވިދާޅުވީ، ދައުލަތަށް އާމްދަނީވެސް އިތުރުކުރަންޖެހޭނެކަމަށެވެ. އެހެންނަމަވެސް ރައްޔިތުންނާއި ހަވާލުކުރަންވާނީ އުފުލޭނެ ވަރުގެ ބުރައެއްކަމަށާއި ސިނގިރޭޓަކުން ނަގާ ތިން ރުފިޔާ އަށް ރުފިޔާއަށް ބަދަލުވެގެންދިއުމުނާއި 50 އިންސައްތައިގެ ބަދަލެއް ޑިއުޓީއަށް އައުމުން ގާތްގަނޑަކަށް 270 އިންސައްތައަށް ޑިއުޓީ ބޮޑުވެގެންދާކަަމަށާއި އެކަމަކީ ވިސްނާލަންޖެހޭ ކަންބޮޑުވުމެއްކަމަށެވެ.
އޭނާ ވިދާޅުވީ، ރާއްޖޭގައި ވޭޕް މަނާކުރުމުގެ މަސައްކަތްތައް ކުރަމުންދާއިރު އެކަމުގެ ތެރެއަށް ފުޅާ ދާއިރާއެއްގައި އިންވެސްޓުކޮށްފައިވާ ފަރާތްތައްވެސް ތިބިކަމަށެވެ. އެހެންކަމުން މާދަމާ ފިހާރަތަކުގައި ތަޅުއެޅިގެންދާއިރު އެ ފަރާތްތަކަށް ލިބޭ ގެއްލުމުގެ ބަދަލެއް ދޭނެކަމާއިމެދުވެސް ވިސްނާލަންޖެހޭކަމަށެވެ.
ގަފޫރު ވިދާޅުވީ، ރާއްޖެއަކީ މިނިވަން ވިޔަފާރި ކުރާ ގައުމެއްކަމަށާއި މަސައްކަތްތައް ކުރެވެންޖެހޭނީ އެ ސިނާއަތުގެ ތެރޭގައިކަމަށެވެ. އޭނާ ވިދާޅުވީ މި ކަންކަމާއިމެދު ވިސްނާލަންޖެހޭކަމަށާއި ރާއްޖެއަށް އަންނަ ފަތުރުވެރިންގެ ތެރެއިން 60 އިންސައްތަ މީހުން ވޭޕު ބޭނުންކުރާކަމަށެވެ. އެހެންކަމުން ވޭޕު މަނާކުރުމުގެ މަސައްކަތްތަކުގެ ތެރޭގައި ފަތުރުވެރިންނަށްވެސް މަނާކުރާނެތޯވެސް ވިސްނާލަންޖެހޭކަމަށާއި ދުންފަތާއި ވޭޕުންވާނެ ގެއްލުންތަކަށް އިންކާރުނުކުރައްވާކަމަށެވެ.
