ވޭޕް އެތެރެކުރުން މަނާކުރުމާއި ދުންފަތް ކޮންޓްރޯލްކުރުމާ ބެހޭ ގާނޫނަށް ގެންނަ ބަދަލުތައް ތަންފީޒުކުރައްވާނެ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ އިހުސާން ވިދާޅުވީ ދުންފަތް ކޮންޓްރޯލްކުރުމާއި ބެހޭ ގާނޫނަށް ގެންނަ އިސްލާހުތައް ތަންފީޒު ކުރައްވާނެ ކަމަށާއި އަދި އެ ގާނޫނުން ނިކުންނަށް ބަދަލުތައްވެސް މަގުމަތިން ފެންނާނެ ކަމަށެވެ. އިހުސާން ވިދާޅުވީ ގާނޫނަށް ގެންނަ އިސްލާހުތަކާއެކު ދުންފަތް ކޮންޓްރޯލްކުރަން ޔުނިފޯމް އެޅި މުއައްސަސާތަކަށް އިތުރު ދައުރެއް އޮންނާނެ ކަމަށެވެ.
މަސްތުވާތަކެތީގެ މައްސަލައަށް އަލިއަޅުވާލައްވާ މިނިސްޓަރ ވިދާޅުވީ ތަންފީޒީ އިންދާރާތަކުން އާއްމުކުރާ ސްޓެޓިސްޓިކްސްއަށް ބަލާނަމަ ކުރިއަށްވުރެ ބޮޑަށް އިންޓަރސެޕްޝަން އިތުރުވެގެން ދާކަމަށެވެ. ލޯ އެންފޯސްމެންޓު އެޖެންސީތަކުގެ ކެޕޭސިޓީ އަށް ބަލާއިރު ހާއްސަކޮށް ކަސްޓަމްސްގެ ދޮރުތަކުގެ ތެރެވާ އެތެރެވުންވެސް އިތުރު ކުރަމުންދާ ކަމަށް މިނިސްޓަރ ވިދާޅުވިއެވެ.
އަންނަ މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން މަނާކުރުމާއި އެ ތަކެތި ބޭނުންކުރުން އަންނަ ޑިސެމްބަރު 15 އިން ފެށިގެން މަނާކުރަން މަޖިލީހަށް ވަނީ ބިލެއް ހުށަހަޅައިފައެވެ. އަދި ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް ބޮޑުކުރުމާ އެކު ދުންފަތުން ނަގާ އެޑްވަލޮރަމް ރޭޓް 50 ޕަސެންޓް މަތިކުރުން ވެސް ވަނީ ނިންމައިފައެވެ.
