މަރުގެ އަދަބު ވީހާވެސް އަވަހަށް ތަންފީޒު ކުރުމަށް ސަރުކާރުން މަސައްކަތް ކުރަމުންދާކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ، މަރުގެ އަދަބު ތަންފީޒު ކުރުމަށްޓަކައި އަމަލު ކުރަން ޖެހޭ ބައިނަލްއަޤުވާމީ މިންގަނޑުތަކެއް އެބަހުރިކަމަށެވެ. އަދި އޭގެ ތެރޭގައި ކޯޓުގެ ހުރިހާ މަރުހަލާއެއް އެއްކޮށް ނިމުމާއި އެކު، ފުރިހަމަ ކުރަން ޖެހޭ އިޖުރާއަތުތަކެއް ހުންނަކަމަށް ވެސް އިހުސާން ވިދާޅުވި އެވެ.
އިހުސާން ވިދާޅުވީ އދ. ގައި ބޭއްވި ހިއުމަން ރައިޓްސް ރިވިއުގައި ވެސް ރާއްޖެއަކީ އިސްލާމީ ގައުމެއްކަމަށާއި ގާނޫނުތައް ވެސް އިސްލާމް ދީނުގައި އޮންނަ ގޮތަށް ތަންފީޒު ކުރެވޭނެ ކަމަށެވެ.
އދ. ގެ ހިއުމަން ރައިޓްސް ކައުންސިލްގައި އިންސާނީ ހައްގުތަކާއި ބެހޭ ޔުނިވާސަލް ޕީރިއަޑިކް ރިވިއުގައި ދާދި ފަހުން ބައިވެރިވެ ދެއްކެވި ވާހަކައިގައި އިހުސާން ވިދާޅުވީ ރާއްޖޭގައި މަރުގެ އަދަބު އުވާލުން އިސްލާމީ ޝަރީއަތާއި ގާނޫނުއަސާސީއާއި ހިލާފުކަމަށެވެ. ރާއްޖޭގައި މަރުގެ އަދަބު އުވާނުލެވޭނެކަން ހާމަކުރައްވައި، އިހުސާން ވިދާޅުވީ ރާއްޖޭގައި އެކަން ކުރަނީ ގާނޫނުގެ ދަށުންކަމަށްވީ ނަމަވެސް ގައުމުގައި އަމަލު ކުރަމުންދާ ގާނޫނުގެ މައިގަނޑު މަސްދަރަކީ އިސްލާމީޝަރީއަތް ކަމަށެވެ.
އިހުސާން ވިދާޅުވީ ރާއްޖޭގައި މަރުގެ އަދަބު އިއްވޭނީ ވަރަށް މަދު ހާލަތެއްގައިކަމަށާއި، އެ ހުކުމް އެ މީހެއްގެ މައްޗަށް އިއްވަނީ ޝައްކެއް ނެތް މިންވަރަށް ކުށް ސާބިތުވުމުން ކަމަށެވެ. އަދި ތިން މަރުހަލާ ނިންމައި، އެ ހުކުމަށް ސުޕްރީމް ކޯޓުން ވެސް ތާއީދު ކުރުމުންކަން ފާހަގަކުރެއްވި އެވެ.
ރާއްޖޭގައި 1954 ގެ ފަހުން މަރުގެ ހުކުމް ތަންފީޒުކޮށްފައި ނުވާއިރު، މިހާތަނަށް 14 މީހެއްގެ މައްޗަށް މަރުގެ އަދަބުގެ ހުކުމް ވަނީ އިއްވާފަ އެވެ. އަދި އޭގެ ތެރެއިން ހަތަރު މީހަކު ތިބީ، ހުކުމް ތަންފީޒު ކުރުމުގެ މަރުހަލާގަ އެވެ.
