ވޭޕް ބޭނުން މަނާކޮށް ދުންފަތުގެ ވިޔަފާރި ކުރެވޭނެ އެންމެ ހަގު އުމުރު ކަނޑައެޅުމަށް ދުންފަތުގެ ކޮންޓްރޯލް ކުރުމާއި ބެހޭ ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަކުގެ މަސައްކަތް މަޖިލީހުގެ އިޖްތިމާއީ ކޮމިޓީން ދިރާސާކޮށް ފާސްކޮށްފި އެވެ.
ސަރުކާރުގެ ފަރާތުން ހެންވޭރު އުތުރު ދާއިރާގެ މެމްބަރު އަހުމަދު އައިފާން ހުށަހެޅި އެ އިސްލާހުގައި ވަނީ މި މަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެ ކުރުން މަނާކޮށް ޑިސެމްބަރު މަހުގެ 15 އިން ފެށިގެން ބޭނުން ކުރުން ވެސް މަނާ ކުރުމަށެވެ.
ގާނޫނާއި ހިލާފުވުމުން ބޮޑެތި ޖުރިމަނާގެ އަދަބު ހިމަނާފައިވާ އެ އިސްލާހުގައި ވަނީ ވޭޕް ކުރުމަށް ބޭނުން ކުރާ އާލަތްތަކާއި، އުފެއްދުންތައް އެތެރެކޮށްފި ނަމަ 50،000 ރުފިޔާއިން އަދި އެތެރެ ކުރާ އިލެކްޓްރޯނިކް ސިނގިރޭޓަށް 10،000 ރުފިޔާގެ މަގުން ޖުރިމަނާ ކުރުމަށެވެ.
އެފަދަ އާލަތެއް ވިއްކައި ވިޔަފާރި ކުރާކަން ފާހަގަވާ ހާލަތުގައި އެ މީހެއްގެ މައްޗަށް އަންނަ ޖުރިމަނާގެ އަދަބަކީ 20،000 ރުފިޔާގެ ޖުރިމަނާއެކެވެ. އަދި ހިލޭ ބަހާނަމަ ވެސް ޖުރިމަނާތައް ހިމަނާފައި ވެއެވެ.
އެ މީހަކު ވޭޕް ވިއްކަނީ، ކުޑަކުއްޖަކަށް ނަމަ ޖުރިމަނާ ކުރާނެ އަދަދަކީ 50،000 ރުފިޔާ އެވެ.
ދުންފަތް ކޮންޓްރޯލް ކުރުމާއި ބެހޭ ގާނޫނުގެ ދަށުން، މި އިސްލާހު ހުށަހަޅާފައި ވަނީ އިލެކްޓްރޯނިކް ސިނގިރޭޓާއި ވޭޕްއާއި ގުޅުން ހުރި އާލަތްތައް ރާއްޖެއަށް އެތެރެކުރުން މަނާކުރާ ތާރީހާ ހަމައަށް ހިނގާ މުއްދަތުގައި ގެންނަ ތަކެތިން އިމްޕޯޓް ޑިއުޓީގެ މިންވަރު އިތުރުކުރުމަށެވެ. މި ބިލުގައި ޑިއުޓީއާއި ރޯޔަލްޓީ އަދި ރެވެނިއު މައާފު ކުރެވޭނެ ހާލަތްތަކަށް އިސްލާހު ގެނައުން ވެސް ހިމެނެ އެވެ.
އިސްލާހުގައި ވަނީ އީ ސިނގިރެޓުން 50 އިންސައްތައާއި، ސްޓިކާއަކުން 8 ރުފިޔާ ނެގުމަށެވެ، އަދި ވޭޕް ފްލޭވާތަކުން 08 ރުފިޔާ ނެގުމަށެވެ.
