އިންޑިއާގައި 25 އަހަރުގެ މީހަކު މަރުވެފައިވާކަމަށް ބަލައި އެ މީހާގެ ހަށިގަނޑު އަންދާލުމަށް ފޮނުވި މައްސަލައިގައި 3 ޑޮކްޓަރަކު ސަސްޕެންޑްކޮށްފިއެވެ.
ބައިނަލްއަގުވާމީ މީޑިއާތަކުން ބުނާގޮތުން މި ހާދިސާ ހިނގާފައިވަނީ އިންޑިއާގެ ރާޖަސްތާން ސަަރަހައްދުގައެވެ. އަދި 25 އަހަރުގެ ވާހަކަދެއްކުމާއި އަޑުއެހުމުގެ ދަތިތައް ހުރި މީހާ މަރުވެފައިވާކަމަށް ނިންމީ އެ ސަރަހައްދުގެ ސިއްހީ ހިދުމަތްތެރިންކަމަށްވާއިރު ނިންމުން ނުބައިކަން އެނގިގެންދިޔައީ އަންދާލުމާއި ހިސާބަށް ގެންގޮސްފައިވަނިކޮށް ކުއްލި ގޮތަކަށް އެ މީހާ ހޭލުމާއިއެކުކަމަށެވެ. މި މައްސަލައިގައި ތިން ޑޮކްޓަރަކު ސަސްޕެންޑް ކޮށްފައިވާކަމަށް އިންޑިއާގެ ނޫސްތަކުން ރިޕޯޓުކުރެއެވެ.
ރޯހިތޭޝް ކުމާރް ކިޔާ އެ މީހާ ދިރިއުޅެމުން އައިސްފައިވަނީ ގެދޮރު ނުތިބޭ ފަރާތްތަކަށް ސަރުކާރުން ބިނާކޮށްދީފައިވާ ޝެލްޓަރެއްގައިކަމަށްވާއިރު އާއިލާ އެއްވެސް މީހަކުވެސް ނެތްކަން ފާހަގަކުރެއެވެ. އޭނާ ހޮސްޕިޓަލަށް ގެންދިޔައީ ހާލު ދެރަވުމާއިއެކުކަމަށްވާއިރު ހޮސްޕިޓަލުން ދިން ފަރުވާތަކަށް އޭނާގެ އެއްވެސް ހިލަމެއް ވެފައިނުވާކަމަށާއި އެކަމާއި ގުޅިގެން އޭނާ މަރުވެފައިވާކަމަށް ނިންމީކަމަށް ރިޕޯޓުތަކުގައިވެއެވެ. އެހެންކަމުން އޭނާ ސަހަރާއެއްގައި ވަގުތުތަކެއް ވަންދެން ބޭއްވުމަށްފަހު އަންދާލުމަށް ފޮނުވިކަމަށެވެ.
ނަމަވެސް އަލިފާންގަނޑުގެ ތެރެއަށް އޭނާ ލަމުންދަނިކޮށް ކުމާރް ކުއްލިޔަކަށް ހޭލިކަމަށާއި ނޭވާ ލާން ފެށިކަން އިންޑިއާގެ ނޫސްތަކުން ފާހަގަކުރެއެވެ. އެއީއެކު އެމްބިއުލާންސެއްގައި ހޮސްޕިޓަލަށް ގެންގޮސްފައިވާއިރު މިހާރު ހާލަތު ރަނގަޅުކަމަށާއި އައިސީޔޫގައި ފަރުވާ ދެމުންދާކަމަށް ރިޕޯޓުތަކުގައިވެއެވެ.
