2024 ވަނަ އަހަރުގެ ބަޖެޓުން 40 ބިލިއަނަށްވުރެ އިތުރު އަދަދެއް ބޭނުންކޮށްފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ފިނޭންސްއިންވަނީ ނޮވެމްބަރު މަހުގެ 14 ވަނަ ދުވަހުގެ ނިޔަލަށް މި އަހަރުގެ ބަޖެޓުން ކޮށްފައިވާ ހޭދައިގެ ތަފްސީލުތައް އާންމުކޮށްފައެވެ. ތަފާސް ހިސާބުން ދައްކާގޮތުން ސަރުކާރުންވަނީ މި ދުވަހުގެ ނިޔަލަށް 40.4 ބިލިއަން ހޭދަކޮށްފައެވެ. ޖުމުލަ އާމްދަނީ މި އަހަރުގެ މި މުއްދަތުގެ ނިޔަލަށް އިތުރުވެފައިވާކަންވެސް ފެނިގެންދެއެވެ. ނިމިދިޔަ އަހަރުގެ މި މުއްދަތުގައި ގްރާންޓުތައްވެސް ހިމަނައިގެން ޖުމުލަކޮށް ލިބުނީ 29.3 ބިލިއަންކަމަށްވާއިރު މި އަހަރު 29.6 ބިލިއަން ލިބިފައިވެއެވެ. ނިމިދިޔަ އަހަރު ގްރާންޓުގެ ގޮތުގައި ލިބިފައިވާ އަދަދުތައް މި އަހަރަށްވުރެ އިތުރެވެ. މި އަހަރުގެ ތެރޭގައި ޓެކްސްގެ ގޮތުގައި ލިބުނު އާމްދަނީވަނީ އިތުރުވެފައިކަންވެސް ހިސާބުތަކުން ދައްކައެވެ.
ނިމިދިޔަ އަހަރުގެ މި މުއްދަތުގައި ސަރުކާރުން ޖުމުލަކޮށް ހަރަދުކޮށްފައިވަނީ 39.8 ބިލިއަންކަމަށްވާއިރު މި އަހަރު ހޭދަކޮށްފައިވަނީ 40.4 ބިލިއަނެވެ. 2023 ވަނަ އަހަރުގެ މި މުއްދަތުގައި 27.02 ބިލިއަންގައި ހުރި ރިކަރެންޓު ހަރަދުތައްވަނީ މި އަހަރު 28.22 ބިލިއަން ރުފިޔާއަށް އަރާފައެވެ. އެހެންކަމުން ރިކަރެންޓު ހަރަދަށް 1.02 ބިލިއަންގެ އިތުރުވުމެއް އައިސްފައިވާކަން ފެނިގެންދެއެވެ.
މި އަހަރުގެ ނޮވެމްބަރު މަހުގެ 14 ވަނަ ދުވަހުގެ ނިޔަލަށް ބަޖެޓުން ކޮށްފައިވާ ކެޕިޓަލް ހަރަދުތައްވަނީ ކޮންމެވެސް ވަރަކަށް ދަށްވެފައެވެ. ނިމިދިޔަ އަހަރު މި މުއްދަތުގައި ހުރީ 12.77 ބިލިއަންގައިކަމަށްވާއިރު މި އަހަރު 12.15 ބިލިއަނަށް ދަށްކުރެވިފައިވެއެވެ.
ޓެކްސްގެ ގޮތުގައި ލިބުނު އާމްދަނީ އިތުރުވެފައިވާއިރު ޓެކްސް ނޫން އެހެން ގޮތް ގޮތުން ހޯދާ އާމްދަނީގެ އަދަދުތައް ދަށްވެފައިވާކަންވެސް ހިސާބުތަކުން ހާމަވެއެވެ. މި އަހަރުގެ ތެރޭގައި ޓެކްސްގެ ގޮތުގައި ލިބުނު އާމްދަނީވަނީ 22.59 ބިލިއަނަށް އަރާފައިކަމަށްވާއިރު ނިމިދިޔަ އަަހަރު މިގޮތުން ލިބުނީ 20.91 ބިލިއަންކަން ފާހަގަކުރެވެއެވެ. ނިމިދިޔަ އަހަރުގެ ނޮވެމްބަރު މަހުގެ 14 ވަނަ ދުވަހުގެ ނިޔަލަށް ޓެކްސް ނޫން އާމްދަނީގެ ގޮތުގައި 7.41 ބިލިއަން ލިބިފައިވާއިރު މި އަހަރު ލިބުނީ 6.44 ބިލިއަން ރުފިޔާއެވެ.
މުސާރަ ދިނުމަށާއި އުޖޫރަ އަދި ޕެންޝަންގެ ގޮތުގައި ކޮށްފައިވާ ހޭދަތައްވެސް މި އަހަރު އިތުރުވެފައިވެއެވެ. އެގޮތުން މި އަހަރު 11.24 ބިލިއަން ހަރަދުކޮށްފައިވާއިރު ނިމިދިޔަ އަހަރު މި ހަރަދުތައް ހުރީ 9.98 ބިލިއަންގައިކަން ފާހަގަކުރެވެއެވެ. 2023 ވަނަ އަހަރު މި މުއްދަތުގައި ޕީޢެސްއައިޕީގެ ގޮތުގައި 10.43 ބިލިއަން ހޭދަކޮށްފައިވާއިރު މި އަހަރު ހޭދަކުރީ 8.80 ބިލިއަންއެވެ.
