މަސައްކަތުގެ މާހައުލުގައި އަހުލުވެރިވެ އުޅުމަށް އެންމެ އެކަށީގެންވާ އުމުރުގެ ދިވެހިންނަށްވުރެ ބިދޭސީންގެ އަދަދުތައް ގިނަކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފިއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން މި އަހަރުގެ ނޮވެމްބަރު މަހު އާންމުކޮށްފައިވާ ރާއްޖޭގެ ”ވައިޓަލް ސްޓެޓިސްޓިކްސް“ ރިޕޯޓުން ދައްކާގޮތުން 2014 ވަނަ އަހަރުގެ ބޯހިމެނުމުގެ މަސައްކަތްތަކުގެ މައުލޫމާތުން 2021ގައި ރާއްޖޭގެ ޖުމުލަ އާބާދީ 568،362 މީހުންނަށް އަރައެވެ. މީގެ ތެރޭގައި 385،696 ދިވެހިން ހިމެނޭއިރު 32 އިންސައްތަ ނުވަ 182،666 މީހުންނަކީ ބިދޭސީންކަން ފާހަގަކޮށްފައިވެއެވެ. 2014 ވަނަ އަހަރާއި 2021 ވަނަ އަހަރާއި ދެމެދު ދިވެހިންގެ އަދަދުތައް އަހަރެއްގެ މައްޗަށް 1.6 އިންސައްތައިން އިތުރުވަމުން އައިސްފައިވާއިރު ބިދޭސީންގެ އަދަދުތައް 7.8 އިންސައްތައިން އިތުރުވަމުން އައިކަން ހިއްސާކޮށްފައިވެއެވެ.
ރާއްޖޭގައި ދިރިއުޅޭ ބޭރު ގައުމުތަކުގެ ރައްޔިތުނަކީ އާބާދީގެ ބޮޑު ހިއްސާއެއް ކަމަށްވާއިރު އެ މީހުންނަކީ މައިގަނޑު ގޮތެއްގައި މަސައްކަތްތެރިންގެ ގޮތުގައި ރާއްޖެއަށް ހިޖުރަކޮށްފައިވާ ބައެއްކަން ރިޕޯޓުގައި ބަޔާންކޮށްފައިވެއެވެ. މި މީހުންނަކީ ވަގުތީގޮތުން ރާއްޖެއަށް އައިސް އުޅޭ ބައެއް ކަމަށްވުމުން ދަރިން އުފަންވުން އަދި މީހުން ނިޔާވާ އަދަދުތައްވެސް ހުރީ ދަށުގައިކަމަށެވެ.
ދިވެހިރާއްޖޭގެ އާބާދީ އެކުލެވިފައިވާ ގޮތުގެ ބައެއް މައުލޫމާތުތަކަށްވެސް އަލިއަޅުވާލާފައިވެއެވެ. އެގޮތުން ރާއްޖޭގެ އާބާދީގައި މަސައްކަތްކުރާ އުމުރުގެ މީހުން އިތުރުވެފައިވާކަމަށް ބުނެފައިވާނަމަވެސް މަސައްކަތުގެ މާހައުލުގައި އުޅުމަށް އެންމެ އެކަށީގެންވާ އުމުރުގެ ބީދޭސީންގެ އަދަދުތައް ދިވެހިންނަށް ވުރެ އިތުރުކަންވެސް ފާހަގަކޮށްފައިވެއެވެ. ދިވެހިންގެ އާބާދީގެ 32 އިންސައްތައަކީ 17 އަހަރުން ދަށުގެ ކުޑަކުދިންކަމަށް ބިއުރޯއިން ބުނެފައިވާއިރު މިއީ ތާރީހުގެ ތެރެއަށް ބަލާއިރު ދަށް އަދަދެއްގެ ގޮތުގައި ފެނިގެންދާކަންވެސް ހިއްސާކޮށްފައިވެއެވެ.
