ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ރާއްޖެއަށް އެތަކެތި އެތެރެކުރަން އުޅުނުކަމުގެ ތުހުމަތުގައި ހައްޔަރުކުރި މީހަކު ޝަރީއަތް ނިމެންދެން ބަންދުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 45 އަހަރުގެ ދިވެހި ފިރިހެނެކެވެ. އޭނާގެ މައްޗަށް ކޮށްފައިވަނީ ރާއްޖެއަށް މަސްތުވާތަކެތި އެތެރެކުރުމުގެ ކުށުގެ ތުހުމަތެވެ.
އޭނާ ހައްޔަރު ކުރުމަށްފަހު ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ އޭނާ ޝަރީއަތް ނިމެންދެން ބަންދު ކުރުމަށް އަމުރުކޮށްފައެވެ.
ކޯޓު އަމުރުގައި ބުނެފައިވާ ގޮތުގައި އޭނާގެ މައްޗަށް ތުހުމަތު ކުރެވޭ މިންވަރަށް ހެކި ޤަރީނާ ހުށަހެޅިފައިވެއެވެ. އެގޮތުން ފުލުހެއްގެ ބަޔާނާއި، ހުޅުމާލެ ހޮސްޕިޓަލްގެ ސީޓީ ސްކޭން ލިއުންތަކާއި، ރިޕޯޓާއި އިތުރު ހެކި ޤަރީނާ ހުށަހެޅިފައިވެއެވެ.
އެހެންކަމުން އޭނާ ބަންދު ކުރުމަށް އަމުރުކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށް ބަލާފައެވެ.
ކޯޓު އަމުރުގައި ފާހަގަކޮށްފައިވާ ގޮތުގައި އޭނާއަކީ އެ ބާވަތުގެ ހައްޔަރާއި ބަންދު ލޮގް ހުރި ފަރާތަކަށްވާތީ، ބަންދުން ދޫކޮށްލައިފިނަމަ ކުށް ތަކުރާރު ކުރުމުގެ އިހްތިމާލު އެބައޮތެވެ.
އޭނާ މަސްތުވާތަކެތި އެތެރެކުރަން މަސައްކަތް ކޮށްފައިވަނީ ހަށިގަނޑުގައި އެތަކެތި ފޮރުވައިގެންކަމަށް ކޯޓު އަމުރުގައި ބަޔާންކޮށްފައިވެއެވެ. އެގޮތުން އޭނާގެ ހަށިގަނޑުން ގިނަ އަދަދެއްގެ މަސްތުވާތަކެތި ހުރި ބުލެޓުތަކެއް ފުލުހުން ވަނީ ހޯދާފައެވެ. އަދި އެތަކެތީގެ ބަރުދަނަށް ބަލާއިރު، ޓްރެފިކިންގ ގެ މިންގަނޑަށް ފެތޭކަމަށް ކޯޓު އަމުރުގައި ބުނެފައިވެއެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ އާއިޝަތު ނުޒުހާއެވެ.
