ޕީއެންސީގެ އެތެރޭގެ އިންތިޚާބުގެ ވޯޓުލުން ފެށިގެން ކުރިއަށް

މި އިންތިޚާބުގައި ޕާޓީގެ އެތެރޭގެ 59 ދާއިރާއަކަށް މެންބަރުން އިންތިޚާބުކުރެވޭނެ ކަމަށް ޕީއެންސީން ހާމަކޮށްފައިވެއެވެ. މި އިންތިޚާބުގައި ވޯޓް ލުމުގެ ހައްގު ލިބިފައިވާ މީހުންގެ އަދަދު 33500 އަށް އަރާއިރު، 648 ކެންޑިޑޭޓުން އިންތިިޚާބުގައި ވާދަކުރެއެވެ.

އޭގެ އިތުުރުން، އިންތިޚާބުގެ ދާއިރާތަކަށް ބަލާއިރު، 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ އެ މަޤާމުތަކަށް ވަނީ އިންތިޚާބަކާ ނުލައި މީހުން ހޮވިފައެވެ.

ޕީއެންސީން މައުލޫމާތު ދޭ ގޮތުގައި މާލެއާއި އަތޮޅުތެރޭގެ 88 ރަށެއްގައި ވޯޓުލާއިރު، މާލެ ސަރަހައްދުގައި ބަހައްޓާފައި ހުރި 56 ވޯޓު ފޮއްޓާއި އަތޮޅުތެރޭގައި ބަހައްޓާފައި ހުރި ފޮށިތަކާ އެކު ޖުމުލަ 144 ވޯޓް ފޮށި ބަހައްޓާފައިވެއެވެ.

ވެރިކަމަށް އައިސް އަހަރެއްގެ ތެރޭގައި ކުރެވުނު މަސައްކަތުން ޕާޓީގެ ދަފްތަރުގައި ތިބި މެމްބަރުންގެ އަދަދު 80،000 އަށް އަރާކަމަށް ޕީއެންސީން ވަނީ ހާމަކޮށްފައެވެ.

ސަރުކާރަށް އަހަރެއް ފުރޭއިރު ޕާޓީގައި 75،000 މެމްބަރުން ތިބެން އެދޭކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ. އަދި އެކަމަށް ވާސިލުވުމަށް ޕީއެންސީ ކުރި މަސައްކަތަށް ބޮޑު ކާމިޔާބީއެއް ލިބިފައިވާކަމަށް އެ ޕާޓީން މައުލޫމާތު ދިނެވެ.