އެމްޕޮކްސްއަކީ ބައިނަލްއަގުވާމީ މުޖުތަމައަށް ކުރިމަތިވެފައިވާ ސިއްހީ ކާރިސާއެއްކަމަށް ވޯލްޑް ހެލްތު އޮގަނައިޒޭޝަންއިން ބުނެފިއެވެ.
ބައިނަލްއަގުވާމީ ނޫސްތަކުން ރިޕޯޓުކުރާގޮތުން އެމްޕޮކްސްގެ މައްސަލައިގައި ބައިނަލްއަގުވާމީ މުޖުތަމައިން ކަންބޮޑުވާންޖެހޭކަމަށް އދގެ ސިއްހަތާއި ބެހޭ ޖަމިއްޔާ ޑަބްލިއުއެޗްއޯއިން ބުނެފައިވަނީ އެ ބަލި ދުނިޔޭގެ އެކި ކަންކޮޅުތަކަށް ފެތުރި ކޭސްތަކުގެ އަދަދުތައް އިތުރުވަމުންދިއުމާއި ގުޅިގެންކަމަށެވެ. އެހެންކަމުން މި ބައްޔާއި ގުޅިގެން ނެރިފައިވާ އެލާޓް ލެވަލް އެންމެ މަތީގައި ބަހައްޓާނެކަމަށާއި މި ނިންމުމަކީ މާހިރުންގެ ލަފަޔާއިއެކު ނިންމާފައިވާ ނިންމުމެއްކަމަށެވެ.
މި ބަލި ފެތުރުން ހުއްޓުވަން ދަތިތަކެއް ހުރުމާއިއެކުވެސް ކަންބޮޑުވުންތައް ހުރިކަމަށް ބުނެފައިވާއިރު، މިކަމުގައި ގައުމުތަކާއި ޕާޓުނަރުން ގުޅިގެން މަސައްކަތްތަކެއް ކުރަންޖެހިފައިވާކަމަށެވެ. މި އަހަރު އެންމެ ގިނައިން ކޭސްތައް ފެނިފައިވަނީ ކޮންގޯއިންކަމަށްވާއިރު ވަށައިގެންވާ ގައުމުތަކުގައިވެސް އިތުރުވެފައިވާކަން ފާހަގަކޮށްފައިވެއެވެ.
ނިމިދިޔަ މަހުގެ ތެރޭގައި މި ބަލީގެ ވެކްސިން އުފައްދައި ނެރިފައިވާއިރު ހުއްޓުވުމުގައި ކުރިއެރުންތަކެއް ލިބިފައިވާކަމަށް މީޑިއާތަކުން ބުނާއިރު އދއިން މި ވާހަކަތައް ފުޅާ ދާއިރާއެއްގައި ދައްކާނީ އެ ވިސްނުން ސާބިތުވާ މިންގަނޑަށް ހެކި ފެނުމުންކަންވެސް ރިޕޯޓުތަކުގައިވެއެވެ. އދއަށް މައުލޫމާތު ފޯރުކޮށްދޭ އެފްރިކާގެ ޖަމާއަތަކުންވަނީ އެ ސަރަހައްދުގައި މި މައްސަލައަށް ހައްލެއް އައިސްފައިނުވާކަމަށް ބުނެފައިވެއެވެ. މި ހާލަތު އިތުރަށް ގޯސްވެ ކޮވިޑްއަށްވުރެ ނުރައްކާތެރި ޕެންޑެމިކެއް ދިމާނުވާކަން ކަށަވަރުކުރުމަށްޓަކައި އިތުރު ވަސީލަތްތަކުގެ ބޭނުންވާކަމަށްވެސް ބުނެފައިވެއެވެ.
ބަލި ޖެހިފައިވާ މީހަކާއި ގައިގޯޅިވެ އުޅުމުން ބަލިޖެހުމުގެ ފުރުސަތު އޮންނައިރު، ޖިންސީ މުއާމަލާތްތަކާއި ނޭވާލުމުގެ ނިޒާމުގެ ޒަރިއްޔާއިންވެސް ފެތުރޭކަމަށް ސިއްހީ މައުލޫމާތު ދައުރުކުރާ ފަރާތްތަކުން ބުނެއެވެ.
