ދިވެހި ކުދިބޮޑު އެންމެންގެ މެދުގައި މަގްބޫލު ކެރެކްޓާ ”ރޮބޯމޭން“ ހަރަކާތްތެރިވާ ޚިޔާލީ ވާހަކައެއްގެ މައްވަށް ބިނާކޮށް ތައްޔާރުކޮށްފައިވާ ފިލްމު ”ރޮބޯމޭން – ދަ މޫވީ“ މިހާރު މީޑިއާނެޓުގެ ވީޑިއޯކްލަބް މެދުވެރިކޮށް ބަލާލެވޭނެއެވެ.
މިއަހަރުގެ ސެޕްޓެމްބަރު މަހުގެ 26ވަނަ ދުވަހު އޮލިމްޕަސް ސްކްރީނުގައި އެޅުވި މި ފިލްމަށްވަނީ ގިނަ ބައެއްގެ ލޯބި ލިބިފައެވެ. ޚާއްސަކޮށް ދުވަސްތަކަކަށްފަހު ކުޑަކުދިންނާއި ގުޅޭ އެކުދިންނަށް ޙާއްސަ ފިލްމެއް ސިނަމާގައި ބަލާލުމުގެ ފުރުސަތު ލިބިގެންދިޔައެވެ. އޮލިމްޕަސް ސިނަމާގެ އިތުރުން ބައެއް ރަށްތަކުގައިވެސްވަނީ މި ފިލްމު އަޅުވާފައެވެ.
ސިނަމާއަށް ގޮސް މި ފިލްމު ބަލާލުމުގެ ފުރުސަތު ނުލިބި ތިބި ކުޑަކުދިންނާއި ބޮޑެތި މީހުންނަށް މިއަދުން ފެށިގެން ވީޑިއޯކްލަބް މެދުވެރިކޮށް ގޭ ސިޓިންގް ރޫމްގައި ތިބެ އާއިލާއާއެކު މި ފިލްމު ބަލާލެވޭނެއެވެ.
ރޮބޯމޭން މި ފިލްމަށްވަނީ ގިނަ ބައެއްގެ ތަޢުރީފު ލިބިގެން ގޮއްސައެވެ. ޙާއްސަކޮށް މި ފިލްމުގައި ހަރަކާތްތެރިވާ ދެ ކުޑަކުދިން ކަމުގައިވާ އަމީލިއާ އަދި މިޝާގެ އެކްޓިންގް ފާހަގަކޮށްލެވެއެވެ. މި ދެ ތަރިންނާއި ރޮބޯމޭންގެ އިތުރުން ދިވެހި ފިލްމު އިންޑަސްޓްރީގައި ނަން މަޝްހޫރު ބައެއް ތަރިންކަމުގައިވާ އައްޒަ އަދި ރަވީ ވެސް މި ފިލްމުން ފެނިގެންދާނެއެވެ.
މި ފިލްމަކީ އެމް އޮރިޖިނަލްސް ބެނާރގެ ދަށުން ތައްޔާރުކޮށްފައިވާ އޯރކޭޒް އިންކް އަދި މީޑިއާނެޓުގެ ވީޑިއޯކްލަބްގެ އުފެއްދުމެކެވެ.
މީޑިއާނެޓު އެމް ޓީ ވީ، އެމް އެސް ޓީވީ އަދި އެމް އެސް ލައިޓް ޚިދުމަތް މިހާރުވެސް ގެންގުޅުއްވާ ފަރާތްތަކަށް ވީޑިއޯކްލަބް ކޮންޓެންޓް ބަލާލުމަށް ހަމައެކަނި ޖެހޭނީ ވީޑިއޯކްލަބް ޕެކޭޖު ސަބްސްކްރިޕްޝަނެއް ނަގާށެވެ. ނަމަވެސް މީޑިއާނެޓު ޚިދުމަތް ބޭނުން ނުކުރައްވާ ފަރާތްތަކުން ފުރަތަމަ ޖެހޭނީ ޚިދުމަތައް ރަޖިސްޓަރ ކުރާށެވެ. އެއަށްފަހު ޕެކޭޖު/ސަބްސްކްރިޕްޝަނެއް ނަގާލުމުން ވީޑިއޯކްލަބްގެ ކޮންޓެންޓް ބަލާލެވޭނެއެވެ.
