ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ދަފްތަރުގައި ތިބި މެމްބަރުންގެ އަދަދު އެއްލަކައަށް އަރާކަމަށް އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ސަރުކާރަށް އަހަރެއް ފުރޭއިރު ޕާޓީގައި 75،000 މެމްބަރުން ތިބެން އެދޭކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ. އަދި އެކަމަށް ވާސިލުވުމަށް ޕީއެންސީ ކުރި މަސައްކަތަށް ބޮޑު ކާމިޔާބީއެއް ލިބިފައިވާކަމަށް އެ ޕާޓީން މައުލޫމާތު ދިނެވެ.
މިދިޔަ ދުވަސްތަކުގައި ކުރިޔަށް ގެންދިޔަ މެމްބާޝިޕް ޑްރައިވްގެ މާލޭގެ ސަރަހައްދުގެ ބައެއް ފޯމުތައް ހުށަހެޅުމަށް، ޕާޓީ އޮފީހުގައި ކުރިޔަށް ދިޔަ ބައްދަލުވުމުގައި ވެސް އަބްދުއްރަހީމް ވަނީ ޕާޓީއަށް މިދިޔަ ދޮޅު މަހެއްގެ ތެރޭގައި އެކަނި ވެސް ގިނަ އަދަދެއްގެ ބަޔަކު ގުޅުނުކަން ފާހަގަކުރައްވާފަ އެވެ.
މިއަދު ކުރިޔަށް ދިޔަ ޕީއެންސީގެ އެތެރޭގެ އިންތިހާބުގެ ތެރެއިން، މީޑިއާތަކަށް މައުލޫމާތު ދެއްވަމުން އަބްދުއްރަހީމް ވިދާޅުވީ ޕީއެންސީގެ ދަފްތަރުގައި ހުރި ސައްހަ ފޯމުތަކުގެ ޖުމްލަ މެމްބާޝިޕް މިހާރު 97،000 އަށް އަރާކަމަށެވެ. ލައްކައެއް ހަމަކުރުމަށް ބޭނުން ވަނީ މަދު ފޯމެއްކަމަށްވުމާއި އެކު، މިވަގުތު ޕާޓީން ޕްރޮސެސް ނުކޮށް ހުރި ފޯމުތައް ހިމަނައިގެން އެ އަދަދު ބޮޑުތަނުން އިތުރުވާނެކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ މީގެ ތެރެއިން ދަފްތަރު ކުރެވުނު އަދަދަކީ 75،000 ކަމަށާއި، އިލެކްޝަންސް ކޮމިޝަނުގެ ގަވައިދުގެ ދަށުން އެ މަސައްކަތް ކުރަމުން ދަނީ ހަފްތާއަކު އެއް ދުވަހުކަމަށެވެ. އަދި ޕާޓީގެ ދަފްތަރުގައި މެމްބާޝިޕް ހިމަނަނީ އިލެކްޝަންސް ކޮމިޝަނުން ފޯމުތައް ބެލުމަށް ފަހު ޝަކުވާއަށް ހުޅުވާލައި ހަފްތާއެއް ފަހުންކަން ވެސް ފާހަގަކުރެއްވިއެވެ.
ކުރު މުއްދަތެއްގެ ތެރޭގައި ޕާޓީއަށް ބޮޑު ކާމިޔާބީއެއް ލިބިފައިވާކަން ފާހަގަކުރައްވައި އަބްދުއްރަހީމް ވިދާޅުވީ، ވެރިކަން ފެށުނުއިރު ޕާޓީގެ ދަފްތަރުގައި ތިބީ ތިންހާހެއްހާ މެމްބަރުން ކަމަށެވެ. އަދި މިއަދު ޕާޓީގެ ދަފްތަރު އަހަރެއްގެ ތެރޭގައި ލައްކައަކަށް އަރާފައި ވަނީ ރައީސް މުއިއްޒުގެ ދުރުވިސްނޭ ސިޔާސަތުތަކުގެ ސަބަބުންކަމަށް އަބްދުއްރަހީމް ވިދާޅުވިއެވެ.
ދާދިފަހުން އޮތް ޕާޓީގެ ހަރަކާތެއްގައި އަބްދުއްރަހީމް ވިދާޅުވީ މި ސަރުކާރުގެ މަސައްކަތްތައް ކުރިޔަށް ދަނީ “މުއިއްޒު ސްޕީޑުގައި” ކަމަށެވެ. ޕާޓީތައް ހިންގައި، ސިޔާސީ މަސައްކަތް ކުރުމަށް ފަރިތަ ބަޔަކު ޕީއެންސީ ހިންގާއިރު، އަބްދުއްރަހީމް ވިދާޅުވީ މިއީ ވަގަށް މެމްބަރުން ވައްދަން ޖެހޭ ވަރުގެ ދަށް ޕާޓީއެއް ނޫންކަމަށެވެ.
ވަގު ފޯމުތައް ފުރުމުގެ މަސައްކަތް ކުރާނީ، އެއްވެސް ތާއީދެއް ނެތް ޕާޓީތަކުންކަމަށާއި ޕީއެންސީ އޮފީހުގައި ކޮންމެ ދުވަހަކު ވެސް އެތަައް ސަތޭކަ ފޯމަކާއި ހަވާލުވުމުގެ ގޮތުން ރަސްމިއްޔާތުތައް އޮންނަކަމަށް އަބްދުއްރަހީމް ވިދާޅުވި އެވެ.
ސަރުކާރުގެ އޮފީސްތަކުގެ ރަސްމީ މަސައްކަތު ގަޑީގައި، ޕީއެންސީއަށް މެމްބަރުން ވެއްދުމަށްޓަކައި ހަރަކާތްތައް ކުރިޔަށް ގެންގޮސް ޕާޓީއަށް ސޮއި ކުރުމަށް މުވައްޒަފުންނަށް މަޖުބޫރު ކުރުވާކަމަށް ކުރާ ތުހުމަތުގެ ރައްދުގައި އަބްދުއްރަހީމް ވިދާޅުވީ މި ސަރުކާރުގައި ވަޒީރުކަމުގައި ތިބީ ޕީއެންސީގެ މެމްބަރުން ކަމަށެވެ. އަދި ދައުލަތުގެ އެކި އިދާރާތަކުން ފެށިގެން ގޮސް، ކުންފުނިތަކުގެ މަގާމުތަކުގައި ވެސް ތިބީ ޕީއެންސީގެ މެމްބަރުންކަމަށް ވާތީ ޕާޓީއަށް ކުރިއެރުން ގެނެސްދިނުމަކީ އެބޭފުޅުންގެ ޒިންމާއެއްކަމަށް އަބްދުއްރަހީމް ވިދާޅުވި އެވެ.
