ބަންދުގައި ތިބޭ މީހުންގެ ބަންދު މުރާޖައާ ކުރުމަށް އޮންނަ އުސޫލާއި އެއްގޮތަށް އެކަން ހަރުދަނާ ގޮތެއްގައި ޕްރޮސެކިއުޓަރ ޖެނެރަލްގެ އޮފީހުން ކުރިޔަށް ގެންގޮސްފައި ނުވާކަމަށް އެ އޮފީހުގެ އޮޑިޓު ރިޕޯޓުގައި ބުނެފި އެވެ.
މިއީ 2019 އިން 2023 ވަނަ އަހަރަށް އަމާޒުކޮށްގެން ސަރުކާރުން އެކުލަވާލާފައިވާ ސްޓެރެޓެޖިކް އެކްޝަން ޕްލޭންގެ ދަށުން މިނިވަން މުވައްސަސާތަކުގެ ޕާފޯމަންސް އޮޑިޓު ކުރުމަށް އެކުލަވާލި ރިޕޯޓެކެވެ. މި މުއްދަތުގައި ޕީޖީ އޮފީހުން ދައުވާ ކުރުމާއި ގުޅޭގޮތުން ކުރި މަސައްކަތްތަކަށް ބަލައި، ގިނަ މައްސަލަތައް ފެންމަތިކޮށް ރިޕޯޓުގައި ލަފާދީފައިވެއެވެ.
އޮޑިޓު އޮފީހުގެ ރިޕޯޓުގައި ބުނެފައިވާ ގޮތުގައި ކުށުގެ ތުހުމަތަށް ބަންދުގައި ތިބޭ މީހުންގެ، ބަންދު މުރާޖައާ ކުރުމުގެ އުސޫލާ އެއްގޮތަށް އެކަން ހަރުދަނާކޮށް ޕީޖީ އޮފީހުން ކުރިޔަށް ނުގެންދެއެވެ. އެގޮތުން ޖިނާއީ އަދުލުގެ ނިޒާމަށް 2019 ގައި އަމަލު ކުރަން ފެށީއްސުރެ ޖިނާއީ މައްސަލަތަކުގައި އަމަލު ކުރާ ސިޔާސަތުގެ ދަށުން ބަންދު މުރާޖައާކުރުން ހަރުދަނާ ކުރެވިފައި ނެތްކަމަށް ރިޕޯޓުގައިވެއެވެ.
ޝަރީއަތް ނިމެންދެން ބަންދުކުރުމަށް ފަހު ކޮންމެ 30 ދުވަހަކުން އެ މީހެއްގެ ބަންދު ރިވިއު ކުރަންޖެހޭނެ ކަމަށް ޖިނާއީ އިޖުރާއަތުގެ ޤާނޫނުގައި ވަނީ ކަނޑައަޅާފައެވެ. އެހެން ނަމަވެސް ކުށެއްގެ ތުހުމަތުގެ ބަންދުގައި ހުރި އެ މީހާގެ ބަންދު ރިވިއު ނުކުރުމުން ދެން ވާނެ ގޮތެއް އެ ޤާނޫނުގައި ބަޔާންކޮށްފައި ނެތެވެ.
ރިޕޯޓުގައި ބުނެފައި ވަނީ އިސްތިއުނާފު ކުރާ މައްސަލަތަކާއި ގުޅޭ ފުރިހަމަ މައުލޫމާތު ވެސް ޕީޖީ އޮފީހުން ލިބެން ނެތްކަމަށެވެ. އަދި ލިޔެކިއުންތައް ރަނގަޅަށް ބަލަހައްޓައި މި މައުލޫމާތުތައް ވީހާވެސް ފަސޭހައިން ލިބޭނެ ގޮތަކަށް އިންތިޒާމު ހަމަޖެއްސުމަށް ލަފާދިނެވެ. މިއާއި އެކު ޝަރީއަތް ނިމެންދެން ބަންދުގައި ތިބޭ މީހުންގެ ބަންދު ކޮންމެ 30 ދުވަހަކުން މުރާޖައާ ކުރުމުގެ އުސޫލަށް އަމަލު ކުރުމަށް އިލްތިމާސް ކުރިއެވެ.
ދައުވާ ކުރުމަށް ޕީޖީ އޮފީހަށް ބަލައިގަންނަ މައްސަލަތަކުގެ ތެރެއިން ދައުވާ އުފުލާފައިވާ މައްސަލަތަކުގެ އިންސައްތަ 2018 ގައި 90 އިންސައްތައަށް ވުރެ މަތީގައި ދަމަހައްޓާފައިވީ ނަމަވެސް ބައެއް މައްސަލަތަކަށް ދައުވާ އުފުލަށް ގިނަ ދުވަސްވެފައިވާކަމަށް އޮޑިޓުގައި ވެއެވެ. އަދި ބުނެފައި ވަނީ ޕާފޯމަންސް މެނޭޖްމަންޓް ފްރޭމްވޯކެއް ގާއިމުކޮށްފައި ނުވުމުގެ ސަބަބުންނާއި މައްސަލަތަކާއި ބެހޭ މައުލޫމާތުތައް ބަލަހައްޓަމުންދާ ގޮތުން ޑިއުޓީ ޕްރޮސެކިއުޝަން އަދި ޕްރޮސެކިއުޝަން މަސައްކަތުން ނަތީޖާ ހާސިލުވެފައިވާ މިންވަރު އޮޑިޓުގައި ބެލެހެއްޓިފައި ނުވާކަމަށެވެ.
މީގެ އިތުރުން ޕްރޮސެކިއުޝަނާއި ޑިއުޓީ ޕްރޮސެކިއުޝަނާއި ގުޅޭ ގިނަ ކަންކަން ހަރުދަނާ ކުރަން ޖެހޭ ކަން ވެސް އޮޑިޓުގައި ފާހަގަކޮށްފައިވެ އެވެ. އެގޮތުން ބައެއް މައްސަލަތަކުގެ ފުރަތަމަ ޑިއުޓީ ޝެޑިއުލް ބޭއްވުމަށްފަހު މައްސަލަ ތަހުގީގު ކުރުމަށް ގިނަ ދުވަސްތަކެއް ހޭދަވާ ކަން ފާހަގަކޮށްފައިވެ އެވެ.
ބައެއް މައްސަލަތަކުގައި ގިނަ އަދަދެއްގެ ޑިއުޓީ ޝެޑިއުލް ބާއްވަން ޖެހޭއިރު ބައެއް މައްސަލަތައް ގިނަ ދުވަސް ނެގުމުގެ ސަބަބުން ޑިއުޓީ ޕްރޮސެކިއުޝަނުން ޑިކްލައިންކޮށްފައިވާކަމަށް ރިޕޯޓުގައި ވެއެވެ.
