މަޖިލީހަށް އިންތިހާބުވާ ސިޔާސީ ޕާޓީ ދޫކުރުމުން، މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާއި ގުޅުވައި އެއްވެސް ބަޔަކަށް ސިޔާސީ ވަޒީފާތައް ދީފައި ނުވާނެކަމަށް ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ޕާޓީ އޮފީހުގައި މިރޭ ކުރިޔަށް ގެންދިޔަ ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ އެތެރޭގެ އިންތިހާބު ވަކި ބަޔަކަށް ނަގައިދިނުމަށް އެއްވެސް މަސައްކަތެއްކޮށްފައި ނުވާނެކަމަށެވެ. ނުވަތަ ކެންޑިޑެސީތައް އޮޅުވާލައި، ކެންޑިޑޭޓުންގެ ނަންތައް އެހެން ދާއިރާތަކުގައި ހިމަނައި އޮޅުވާލުމުގެ ނިޔަތުގައި ވެސް ޕާޓީ ހަރަކާތްތެރިވެފައި ނުވާނެކަމަށް އަބްދުއްރަހީމް ވިދާޅުވިއެވެ.
އެތެރޭގެ އިންތިހާބު ދެ ފަހަރެއްގެ މަތީން ފަސް ކުރީ ވެސް އެ ސަބަބާއި ހުރެކަމަށް ވާހަކަ ދެކެވޭތީ، ސަންގުޓީވީން ސުވާލު ކުރުމުން އަބްދުއްރަހީމް ވިދާޅުވީ ވޯޓު ލުން ނޮވެމްބަރަށް ބަދަލު ކުރީ ސަރުކާރުގެ އެތެރޭގެ ބައެއް މަސައްކަތްތަކުގައި ވަގުތުގެ ފުށުއެރުންތަކެއް އައުމުންކަމަށެވެ.
ސަރުކާރަށް އަހަރު ފުރުން ފާހަގަކުރުމަށް ވުޒާރާތަކުން ކެނޑިނޭޅި މަސައްކަތް ކުރަމުން ދިއުމުގެ ސަބަބުން އިންތިހާބަށް ދޭން ޖެހޭ ވަގުތު އޭރު ދެވެން ނެތުމުން ތާރީހަށް ދެފަހަރެއްގެ މަތީން ބަދަލު ގެންނަން ޖެހުނީކަމަށް އަބްދުއްރަހީމް ވިދާޅުވި އެވެ.
އިންތިހާބާއި ދިމާކޮށް އަދި ގާނޫނުއަސާސީއަށް ރައްޔިތުންގެ މަޖިލީހުގެ ތެރެއިން ގެނެވުނު އިސްލާހާއި އެކު ޕީއެންސީގެ އެތެރެއިން ގިނަ ބަޔަކަށް ސިޔާސީ މަގާމު ދިންކަމުގެ އަޑުތައް ފެތުރިފައި ވާތީ މިދިޔަ ދެ ހަފްތާގެ ތެރޭގައި އެފަދަ ސިޔާސީ މަގާމުތައް ޕާޓީގެ ސްލޮޓުގައި ހަމަޖައްސާފައި ވޭތޯ ސުވާލު ކުރުމުން އަބްދުއްރަހީމް ވިދާޅުވީ މަޖިލީހުގެ މަސައްކަތަކާއި ގުޅުވައި ސިޔާސީ މަގާމެއް ދޭން ޖެހޭ ސަބަބެއް ނެތްކަމަށެވެ.
ގާނޫނުއަސާސީއަށް އިސްލާހު ގެންނާކަށް އެއްވެސް ބޭފުޅަކަށް މަގާމެއް ނުދެއްވާ.. އެއީ ގާނޫނުއަސާސީއަށް އިސްލާހު ގެންނަނީ ރައްޔިތުންގެ މަޖިލީހުގެ މެމްބަރުން.. އެހެންވީމަ އިތުރު ބަޔަކަށް، އެއްވެސް ކަމެއްގައި މަގާމެއް ދޭން ޖެހޭ ސަބަބެއް ނޯންނާނެ.. ދެން ސަރުކާރެއް ހިނގަމުންދާއިރު ސަރުކާރުގެ މަގާމުތަކަށް ބޭފުޅުން އައްޔަނު ކުރުމާއި ވަކި ކުރުން އެއީ ހަމަ އާންމު އުސޫލުގެ ތެރެއިން ހިނގަމުން ދާނެ ކަންތައްތައް.. އިއްތިފާގަކުން އޮވެދާނެ ތި ވިދާޅުވި ގޮތަށް މިދިޔަ ދެ ހަފްތާގެ ތެރޭގައި، ބައެއް މަގާމުތަކަށް ބަދަލު ގެނައުން ނޫނީ.. އިތުރު ބޭފުޅަކަށް މަގާމެއް ދެއްވުން.. އެކަހަލަކަމެއް ހިނގާފައި އޮތުމަކީ އެކަށީގެންވާކަމެއް..
އަބްދުއްރަހީމް ވިދާޅުވި ގޮތުގައި ސިޔާސީ މަގާމުތަކަށް މީހުން އައްޔަނުކޮށް ވަކި ކުރުމަކީ ސަރުކާރެއްގެ ތެރޭގައި ހިނގާނެ އާންމުކަމެކެވެ. އެހެންކަމުން ވަކި ކަމަކާއި ނުގުޅުވައި ނަމަވެސް މިދިޔަ ދެ ހަފްތާގައި ސިޔާސީ މަގާމުތައް ދީފައި ހުރުމުގެ ފުރުސަތު ބޮޑުކަމަށް ވިދާޅުވި އެވެ.
ސަރުކާރުގެ ސިޔާސީ ޖުމްލަ މުވައްޒަފުންގެ އަދަދު ސާފު ނުވީ ނަމަވެސް، ރައީސް މުއިއްޒު ވަނީ މަގާމުތައް މަދު ކުރުމަށް ނިންމަވާފައިވާކަން އިއުލާނު ކުރައްވާފަ އެވެ.
