ރާއްޖޭގެ ކުރޫޒު ޝިޕް ރެގިއުލޭޝަންތަކަށް ގެނެވުނު ބަދަލުތަކަށްފަހު، ފުރަތަމަ ފަހަރަށް ކުރޫޒު ޝިޕަކަށް ރާއްޖެއިން މަރުހަބާ ކިޔައިފިއެވެ. މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން މަޢުލޫމާތު ދެއްވާފައިވާ ގޮތުގައި، މި އުފާވެރި މަރުހަބާ ކިޔާފައިވަނީ އިޓަލީގެ ކުރޫޒު ޝިޕެއް ކަމަށްވާ އޭއައިޑީއޭ އަށެވެ.
ޑިސެމްބަރު 8 ވަނަ ދުވަހު އޮމާނުގެ މަސްކަޓުން ފުރައިގެން އައި މި އުޅަނދުގައި 2139 ފަތުރުވެރިން ތިބިކަމަށް ވެއެވެ. މި އުޅަނދަކީ ސްވިޒަލޭންޑް، އޮސްޓްރިއާ އަދި ޖަރުމަނުވިލާތުގެ ފަތުރުވެރިންނަށް ޚާއްޞަކޮށްގެން ހިންގާ ކުރޫޒު ޝިޕެކެވެ.
މި ދާއިރާގެ މަސައްކަތްތައް ކުރުމުގެ އުސޫލަށް އިޞްލާޙުތައް ގެނެސްފައިވަނީ މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް (މާޔާ) ގެ އެދުމުގެ މަތިންކަމަށް އެމްއެމްޕީއާރްސީން ހާމަކޮށްފައިވެއެވެ. މި ބަދަލުތަކާ އެކު، ރާއްޖެއަށް ކުރޫޒު ޝިޕްތައް އައުމުގެ މަގު ފަހިވެގެން ދިޔައީއެވެ.
އޭއައިޑީއޭ ކުރޫޒު ޝިޕުން ރާއްޖެއަށް ކޮށްފައިވާ މި ޒިޔާރަތާއެކު ރާއްޖޭގެ އިޤްތިޞާދަށް ބޮޑެތި ކުރިއެރުންތަކެއް ލިބިގެންދާނެކަމަށް ބެލެވެއެވެ. ޚާއްޞަކޮށް މާލެ ސަރަޙައްދުގެ ފިހާރަތަކާއި ރެސްޓޯރަންޓުތަކަށް މީގެ ހެޔޮ އަސަރު ކުރާނެކަމަށް ލަފާކުރެވެއެވެ. މީގެ އިތުރުން، މި ކަމުގެ ސަބަބުން ދުނިޔޭގެ އެންމެ މަޤްބޫލު ކުރޫޒު މަންޒިލެއްގެ ގޮތުގައި ދިވެހިރާއްޖޭގެ މަޤާމު އިތުރަށް ވަރުގަދަވެގެންދާނެކަމަށް ބެލެވެއެވެ.
ރާއްޖެއަށް މި ކުރޫޒު ލައިނަރު އައުމަކީ ރާއްޖޭގެ ފަތުރުވެރިކަމުގެ ދާއިރާ ސިންދަފާތުކުރުމަށް ކުރަމުންދާ މަސައްކަތްތަކަށް ލިބުނު ބޮޑު ކާމިޔާބީއެއްކަމަށް އެމްއެމްޕީއާރްސީން ފާހަގަކޮށްފައިވެއެވެ. މިއާއެކު ރާއްޖޭގެ އިޤްތިޞާދު ހަރުދަނާވުމުގެ އިތުރުން ބޭރުގެ ރިޒާވްވެސް އިތުރުވެގެންދާނެކަމަށާއި ޤައުމުގެ ޖުމްލަ އިޤްތިޞާދު ކުރިއެރުމަށް ފަހިވެގެންދާނެކަމަށް ބެލެވެއެވެ.
