އެމްޑީޕީގެ ވެރިކަމުގައި ބަނދަރު ތަރައްޤީގެ މަޝްރޫޢުތަކުގެ އެއްބަސްވުންތަކުގައި ސޮއިކުރެވުނީ ރައްޔިތުންގެ މަސްލަހަތަށްވުރެ ޕާޓީގެ އިސްވެރިންގެ މާލީ މަންފާއަށް އިސްކަންދީގެން ކަމަށް ގެމަނަފުށީ ދާއިރާގެ މެންބަރު އަސަދުﷲ ޝިހާބު ވިދާޅުވެއްޖެއެވެ.
ސަންގު ޓީވީގެ ”ހަބަރަށްފަހު“ ޕްރޮގްރާމުގައި ވާހަކަފުޅު ދައްކަވަމުން، މެންބަރު އަސަދުﷲ ވަނީ ފާއިތުވި އަހަރުތަކުގައި ރާއްޖޭގައި ފެށިފައިވާކަމަށް ބުނެވޭ ތަރައްޤީގެ މަޝްރޫޢުތައް ކުރިއަށް ނުގޮސް ހުރި ސަބަބުތަކުގެ މައްޗަށް އަލިއަޅުވާލައްވާފައެވެ. އޭނާ ފާހަގަކުރެއްވި ގޮތުގައި، އެމްޑީޕީގެ ވެރިކަން ފެށުމާ ހަމައަށް، އެމްޓީސީސީއިން އަމިއްލަ އުޅަނދުފަހަރު ބޭނުންކޮށްގެން ބޮޑުހިލަ އެތެރެކޮށް މަޝްރޫޢުތައް ކުރިއަށް ގެންދިޔައެވެ. ނަމަވެސް، އެމްޑީޕީގެ ވެރިކަން ފެށުމާއެކު މި އުޅަނދުފަހަރު ބޭނުން ނުކުރެވޭ ގޮތް ހެދިކަމަށް އޭނާ ވިދާޅުވިއެވެ.
މީގެ އިތުރުން، އެމްޑީޕީގެ ވެރިކަމުގައި މި މަސައްކަތްތައް އައުޓްސޯސް ކުރެވުނީ ޕާޓީއާ ގުޅުންހުރި ފަރާތްތަކަށް ކަމަށާއި، ބޮޑުހިލައިގެ އަގު ބޮޑުތަނުން އިތުރުވެފައިވާކަން އޭނާ ފާހަގަކުރެއްވިއެވެ. އަދި މި ކަންކަމުގެ ސަބަބުން އެމްޓީސީސީ ވަނީ ބޮޑެތި ދަރަނިތަކަކަށް ހުށަހެޅިފައި ކަމަށްވެސް އޭނާ ވިދާޅުވިއެވެ.
މެންބަރު އަސަދުﷲގެ ވާހަކަފުޅުގައި، އެމްޑީޕީއިން ގިނަ އަދަދެއްގެ މަޝްރޫޢުތައް ހިންގާކަމަށް ދެއްކުމަށް މަސައްކަތް ކުރި ނަމަވެސް، ޙަޤީޤަތުގައި ކުރެވުނީ ހަމައެކަނި އެއްބަސްވުންތަކުގައި ސޮއިކުރުން ކަމަށް ވިދާޅުވިއެވެ. އަދި މި ކަންކަމުގެ މަޤްޞަދަކީ ޕާޓީގެ އިސްވެރިންނަށް މާލީ މަންފާ ހޯދައިދިނުން ކަމަށް އޭނާ ތުހުމަތު ކުރެއްވިއެވެ.
