މީހަކަށް އަނިޔާދިނުމަށް ހިތްވަރުދީ ވާހަކަތައް ދެއްކުމަކީ ޓެރަރިޒަމްގެ ގާނޫނުގައި ބަޔާންކޮށްފައިވާ ކުށެއްކަމަށާއި އެ އަމަލު ހިންގި އެމްޑީޕީގެ ޗެއަރޕާސަން ފައްޔާޒް އިސްމާއިލް އަދި އާންމު މެމްބަރުންގެ މައްޗަށް ފިޔަވަޅު އެޅުމަށް ގޮވާލާކަމަށް ޕީއެންސީއިން ބުނެފިއެވެ.
ޕީއެންސީއިން ނެރިފައިވާ ބަޔާނެއްގައި ބުނެފައިވާގޮތުން، ކުރީގެ ރައީސް އަމީން އަވަހާރަށްކޮށްލާފައިވަނީ އެމަނިކުފާނާއިމެދު ބަޔަކު މީހުން އުފެއްދި ނަފުރަތެއްގެ ސަބަބުންނެވެ. އެގޮތުން އެމަނިކުފާނު ބޭރުގައި ހުންނެވުމަށްފަހު ރާއްޖެއަށް ވަޑައިގަތުމުން ރައްޔިތުން ނުކުމެ ޖިސްމާނީ އަނިޔާތަކެއް ދީ އަވަހާރަކޮށްލިކަމަށާއި އެފަދަ ގޮތަކަށް ރައީސް ޑރ މުއިއްޒުއާއިމެދު އަމަލުކުރުމަށް ހިތްވަރުދީ އެމްޑީޕީގެ ލީޑަރޝިޕުން ދައްކާފައިވާ ވާހަކަތައް ޕީއެންސީއިން ކުށްވެރިކުރާކަމަށެވެ.
ރައީސް އަމީން އަވަހާރަކޮށްލުމަކީ ދިވެހިރާއްޖޭގެ ސިޔާސީ ތާރީހުގައި އަނދިރި ދުވަސްތަކެއްކަމަށްވެސް ބުނެފައިވެއެވެ. އަދި މިއަދު ގާއިމުކުރެވިފައިވާ ދުސްތޫރީ ނިޒާމުގެ މަގުސަދަކީ ސިޔާސީ މަސައްކަތްތަކުގެ ތެރެއަށް އަނިޔާވެރިކަމާއި ހަމަނުޖެހުން އަދި ނަފްރަތު ވަނަނުދީ ޑިމޮކްރެޓިކް ހަމަތަކުގެ މަތިން ސިޔާސީ މަސައްކަތްތައް ކުރިއަށް ގެންދެވޭނެ މަގުފަހިކުރުންކަމަށެވެ. އެ ނިޒާމަކީ އިހުޒަމާނުގައި ދިވެހި ސިޔާސީ މަސްރަހުގައި ފެނުނު އަނިޔާވެރި އަމަލުތައް ފެނިގެންނުދާކަން ކަށަވަރުކުރުމަށްޓަކައި ތަރުތީބު ކުރެވިފައިވާ ނިޒާމެއްކަމަށްވެސް ބުނެފައިވެއެވެ.
އެހެންކަމުން އެ ނިޒާމުގެ އަސާސްތަކާއި ހިލާފަށް އަނިޔާވެރިކަމަށް ހިތްވަރުދީ، ޕާޓީގެ އާންމު މެމްބަރަކު ޕާޓީގެ ޕޯޑިއަމްއެއްގައި ދެއްކި ވާހަކައެއް ކުށްވެރިކުރުމުގެ ބަދަލުގައި ޕާޓީގެ ޗެއަރޕާސަން ފައްޔާޒް އިސްމާއިލް އެކަމަށް ހިތްވަރުދީ ވާހަކަތައް ދެއްކުމަކީ އޭނާ ހިންގި ނުރައްކާތެރި އަމަލެއްގެ ގޮތުގައި ދެކޭކަމަށް ބުނެފައިވެއެވެ.
އެފަދަ ގޮތަކަށް މީހަކަށް އަނިޔާތަކެއް ދިނުމަށް ހިތްވަރުދީ ވާހަކަތަކެއް ދެއްކުމަކީ ޓެރަރިޒަމް މަނާކުރުމުގެ ގާނޫނުގެ ދަށުން ކުށެއްގެ ގޮތުގައި ބަޔާންކުރެވިފައިވާ ކަމެއްކަމަށް ބަޔާނުގައި ފާހަގަކޮށްފައިވެއެވެ. އެހެންކަމުން ފައްޔާޒް އާއި އެ ޕާޓީގެ އާންމު މެމްބަރުންތަކެއް ހިންގާފައިވާ މި އަމަލު ތަހުގީގުކޮށް ގާނޫނީ ފިޔަވަޅު އެޅުމަށް ތަންފީޒީ އިދާރާތަކަށް ގޮވާލާކަމަށް ޕީއެންސީއިން ބުނެފައިވެއެވެ.
