ރައްޔިތުންގެ މަސްލަހަތުގައި މަސައްކަތްކުރުމުގެ ސަބަބުން ނުވަތަ އެމްޑީޕީއިން އެ މަގުސަދުގައި ހިންގާ ހަރަކާތަކަށް އެއްބާރުލުން ދިނުމުގެ ސަބަބުން މަޖިލިސް މެމްބަރަކު، މެމްބަރުކަމުން ވަކިކޮށްފި ހާލަތުގައި އެ މީހަކު އަލުން އިންތިހާބުކޮށްދިނުމަށް މަސައްކަތްކޮށްދިނުމަށްޓަކައި އެމްޑީޕީގެ ގައުމީ މަޖިލީހަށް ގަރާރެއް ފާސްކޮށްފިއެވެ.
އެމްޑީޕީން ފާސްކުރި ގަރާރުގައި ބުނެފައިވާގޮތުން، ދިވެހި ދައުލަތުގެ އެންމެހާ ބާރެއް ފެށިގެން އަންނަނީ އަދި ދެމިއޮންނާނީ ރައްޔިތުންގެ ކިބައިންކަމަށް ގާނޫނުއަސާސީގައި ބަޔާންކޮށްފައިވާކަމަށެވެ. އެހެންކަމުން ގާނޫނުއަސާސީއަށް 6 ވަނަ އިސްލާހު ގެނައުމުގެ ގާނޫނު ގާނޫނުއަސާސީގެ 73 ވަނަ މާއްދާއަށް ގެނެސްފައިވާ ބަދަލުގެ ސަބަބުން 4 ވަނަ މާއްދާއިން ރައްޔިތުންނަށް ލިބިދީފައިވާ ބާރުވެރިކަން ނިގުޅިގެންދާކަމަށެވެ.
އެމްޑީޕީގެ ގަރާރުގައިވާގޮތުން ރައްޔިތުންގެ މަޖިލީހުގެ މެމްބަރުންގެ މަސައްކަތްތަކުގެ އަސާސް ބިނާކުރަންވާނީ މުޅި ރާއްޖޭގެ މަސްލަހަތަށް ރިއާޔަތްކުރެވިގެންކަމަށް ގާނޫނުއަސާސީގެ 75 ވަނަ މާއްދާގައި ބުނެފައިވާކަމަށެވެ. އެހެންކަމުން ރައްޔިތުންގެ މަސްލަހަތާއި ހިލާފަށް ސިޔާސީ ޕާޓީން އަންގާ ގޮތަށް އަމަލުނުކުރުމުގެ ސަބަބުން މަޖިލީސް މެމްބަރުންގެ، މެމްބަރުކަން ގެއްލިގެންދާ ހާލަތެއް އުފަަންކޮށްފައިވަނީ އެ މާއްދާއާއި ހިލާފަށްކަމަށެވެ. އަދި ރައްޔިތުންގެ މަޖިލީހުގެ މެމްބަރަކު މަޖިލީހުގައި ދައްކާ ވާހަކައެއްގެ ސަބަބުން ނުވަތަ އަމަލުކުރާ ގޮތެއްގެ ސަބަބުން މެމްބަރެއްގެ މައްޗަށް އެއްވެސް ތަހުގީގެއް ހިންގައިގެން ނުވާނެކަމަށް 90 ވަނަ މާއްދާގައި ބަޔާންކޮށްފައިވާކަންވެސް ފާހަގަކޮށްފައިވެއެވެ.
އެހެންކަމުން ގާނޫނުއަސާސީއަށް މިފަހުން ގެނެސްފައިވާ ބަދަލަކީ ރައްޔިތުންގެ ބާރުވެރިކަން ނިގުޅައިގަނެ ރައްޔިތުންގެ މަޖިލީހުގެ މެމްބަރުން ރައްޔިތުންގެ މަސްލަހަތުގައި މަސައްކަތްކުރަން އޮތް މިނިވަން އިހުތިޔާރުވެސް ނިގުޅައިގަންނަ ގާނޫނުއަސާސީގެ އަސާސީ އޮނިގަނޑާއިވެސް ހިލާފު އިސްލާހެއްކަމަށެވެ.
އެ ޕާޓީއިން ބުނެފައިވާގޮތުން، ދިވެހި ރައްޔިތުންނަށް ބައިވެރިވެވޭ ޑިމޮކްރެސީއެއް ގާއިމުކުރުމާއި އަސާސީ ހައްގުތައް ލިއްބައިދިނުމާއި އެ ހައްގުތައް ހިމާޔަތްކުރުމުގެ ގޮތުން ކުރަންޖެހޭ މަސައްކަތްތައް ކުރުމަކީ ޕާޓީގެ މަގުސަދެއްކަމަށް އަސާސީ ގަވައިދުގައި ބަޔާންކޮށްފައިވާކަމަށެވެ. އެހެންކަމުން ގެނެސްފައިވާ ބަދަލުތައް އިހު އޮތް ގޮތަށް ރުޖޫއަކުރުމަށްޓަކައި ރައްޔިތުންގެ މަޖިލީހަށާއި ސަރުކާރަށް ގޮވާލުމަށާއި ގެނެސްފައިވާ ބަދަލުތައް އިހުއޮތް ގޮތަށް ރުޖޫއަކުރުމާއިހަމައަށް މުޅި ރާއްޖޭގެ އެކި ކަންކޮޅުތަކުގައި އިހުތިޖާޖްކުރުމަށް އެކި އެކި ސިޔާސީ ހަރަކާތްތައް ހިންގަމުން ގެންދިއުމަށާއި ބަދަލުގެ ސަބަބުން ނުކުންނަ ނަތީޖާތަކަށް ރައްޔިތުން ހޭލުންތެރިކުރުމަށްޓަކައި ފުޅާ ދާއިރާއެއްގައި ކެމްޕެއިންތައް ހިންގުމަށް ހުށައެޅިފައިވާ ގަރާރުގައި ގޮވާލާފައިވެއެވެ.
އެމްޑީޕީއިން އިސްނަގައިގެން ހިންގާ މި ހަރަކާތުގައި ބައިވެރިވުމަށް ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީތަކަށާއި މަދަނީ ޖަމިއްޔާތަކުގެ އިތުރުން ފަންނީ ދާއިރާތަކުގެ ބޭފުޅުންނަށް ދައުވަތު ދިނުމަށާއި އެ ދައުވަތު ގަބޫލުކުރާ ޕާޓީތަކާއި ޖަމިއްޔާތަކާއި ވަކިވަކި ފަރުދުންނާއި ގުޅިގެން މުޅި ރާއްޖެއަށް ސިޔާސީ ހަރަކާތް ފުޅާކޮށް ރާއްޖޭގެ ކަންކޮޅުތަކުގައި އެކި އެކި އިހުތިޖާޖްތައް ރާވައި ހިންގުމަށާއި ގާނޫނުއަސާސީއަށް ގެނެސްފައިވާ ބަދަލު ދެމި އޮންނަ މުއްދަތުގައި ރައްޔިތުންގެ މަޖިލީހުގެ މެމްބަރަކު ރައްޔިތުންގެ ހައްގުގައި ވަކާލާތުކުރުމުގެ ގޮތުން ބުނި ބަހެއްގެ ސަބަބުން ނުވަތަ ވޯޓުދިނުމުގައި އަމަލުކުރާ ގޮތެއްގެ ސަބަބުން ނިސްބަތްވާ ސިޔާސީ ޕާޓީއިން ވަކިކުރުމުގެ ސަބަބުން ނުވަތަ ރައްޔިތުންގެ މަސްލަހަތުގައި އެމްޑީޕީއިން ކުރަމުންދާ މަސައްކަތްތަކުގައި ބައިވެރިވުމުގެ ގޮތުން އެ މެމްބަރަކު ނިސްބަތްވާ ޕާޓީން ވަކިވެ އެމްޑީޕީއާއި ގުޅުމުގެ ސަބަބުން އެ މެމްބަރަކު މަޖިލީހުގެ މެމްބަރުކަމުން ވަކިކޮށްފިނަމަ އެ ދާއިރާއަށް މެމްބަރަކު އިންތިހާބުކުރުމަށް ބާއްވާ ބައިއިލެކްޝަންގައި އެ މެމްބަރަކު ވާދަކުރާނަމަ އެމްޑީޕީއިން އެމީހަކަށް ތާއީދުކުރުމަށާއި އަލުން އިންތިހާބުކުރުމަށްޓަކައި މަސައްކަތްކޮށްދިނުމަށްޓަަކައި އެމްޑީޕީއިން އެއްބަސްވެ އިސްވެ ބަޔާންކުރެވުނު އެންމެހައި ކަންކަން ކުރުމަށް ގައުމީ މަޖިލީހުން އިގުރާރުވާކަމަށެވެ.
