މޭ 2012 ގައި ލޮރެންޒޯ ޕާރކް ތެރޭގައި ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލާފައި އޮއްވާ ފެނުނު ހއ. ހޯރަފުށި، ނޫރީގެ މުޙައްމަދު އަރުޙަމް (16އ) ގެ މަރުގެ މައްސަލައިގައި ކުށް ސާބިތުނުވި 3 މީހުންގެ މައްސަލަ ކްރިމިނަލް ކޯޓުގައި އަލުން ފަށައިފިއެވެ.
މިއީ ކްރިމިނަލް ކޯޓަށް ތަހުވީލު ކުރުމުން (އަލުން ބަލަން އެންގުމުން) ބަލަމުންދާ މައްސަލައެކެވެ.
އަރުހަމްގެ މަރުގެ މައްސަލައިގައި ކުށް ސާބިތުވީ އެންމެ މީހެއްގެ މައްޗަށެވެ. އެހެންނަމަވެސް ބާކީ ތިބި 3 މީހުންގެ ބައިވެސް ދަށު ކޯޓުން އަލުން ބެލުމަށް 2023 ވަނަ އަހަރުގެ ޑިސެމްބަރު މަހު ހައިކޯޓުން ވަނީ އަންގާފައެވެ.
އެހެންކަމުން މި މައްސަލަ އަލުން މިވަނީ ބަލަން ފަށާފައެވެ. ނަމަވެސް މި އަޑުއެހުމުގައި ބައިވެރިވެފައިވަނީ ހަމައެކަނި ދައުވާލިބޭ އާތިފްއެވެ. އެކި ސަބަބުތަކާހުރެ ދެން ތިބި ދެމީހުންނަށް އަޑުއެހުމުގައި ބައިވެރިވެވިފައެއް ނުވެއެވެ.
އެހެންވެ މައްސަލަ ބައްލަވާ ގާޒީ ވަނީ އާތިފްއަށް ވަކީލަކު އައްޔަނު ކުރުމުގެ ފުރުސަތު ދެއްވައި، މައްސަލައިގެ އަޑުއެހުން ނިންމަވާލައްވާފައެވެ.
ގާޒީ ވިދާޅުވީ، މި މައްސަލަ ކްރިމިނަލް ކޯޓަށް ލިބިފައިވަނީ މިއަހަރު މެއި މަހުގެ ތެރޭގައި ކަމަށާއި، މައްސަލަ ވީހާވެސް އަވަހަށް ކުރިއަށް ގެންދިއުމަށް މަސައްކަތް ކުރައްވާނެ ކަމަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް ޛިހުނީއެވެ.
އަރުހަމުގެ މަރާގުޅޭގޮތުން ދައުލަތުން ދައުވާކުރި 4 މީހުންގެ ތެރެއިން 3 މީހެއްގެ މައްޗަށް ކުށް ސާބިތުނުވާ ކަމަށް ޙުކުމްކުރީ 2016 ވަނަ އަހަރުއެވެ.
މި މައްސަލައިގައި ކުށް ސާބިތުވީ، ލ. މާވަށު އެވާބްލޫގޭ މުހައްމަދު ވިސާމްގެ މައްޗަށެވެ. ވިސާމް މަރަން ހުކުމް ކުރީ އަރުހަމްގެ ވާރިސުންގެ ގޮތުގައި ތިބި އެންމެން ވެސް މަރަށް މަރު ހިފަން ބޭނުންވާތީ ކަމަށް ހުކުމް އިއްވަވަމުން ގާޒީ އޭރު ވިދާޅުވެފައިވެއެވެ.
