ގައުމުގެ ހާލަތު އޮތީ ސޮއްސާލައިގެން ގޮސްފައިކަމަށާއި، ފެންނަން އޮތީ ނާމާން ބިރުވެރި ދުވަސްތަކެއްކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީއިން ކާނިވާ ސަރަހައްދުގައި ބޭއްވި ޖަލްސާގައި ރައީސް ސާލިހު ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
ރައީސް ސާލިހު ވިދާޅުވީ މާލެއާއި ހުޅުމާލޭގައި ކުއްލިއަކަށް ސްޓޭޖްތަކެއް ބަހައްޓާފައިވާކަމަށާއި، އަދި މި ސަރުކާރުން ބައެއް ކުންފުނިތަކުގެ މުވައްޒަފުންނާއިއެކު މަސް ބާނަންވެސް ފުރާފައިވާކަމަށެވެ. އަދި މިދިޔަ ދެ ތިން ދުވަސް ތެރޭގައި ސަރުކާރުން ވެފައިވާ ވައުދުތައް ފުއްދާނެކަމުގެ ވައުދު އަނެއްކާވެސް ވާން ފަށާފައިވާކަމަށް ވިދާޅުވިއެވެ.
މި ސަރުކާރަށް އަހަރެއްވީއިރު، ހުރިހާ ރައްޔިތުންގެވެސް ވަރަށް ބޮޑެތި ކަންބޮޑުވުންތައް ހުރިކަމަށާއި، ކަންބޮޑުވުމެއް ނެތް ރައްޔިތަކު ނެތްކަމަށް ރައީސް ސާލިހު ވިދާޅުވިއެވެ. އެންމެ ބޮޑު ކަންބޮޑުވުމަކީ ދަތި އުނދަގުލަކާ ކުރިމަތިލާން ނުޖެހި، ވައުދުތައް ފުއްދަމުން ނުދާކަމުގެ ކަންބޮޑުވުންކަމަށް އެމަނިކުފާނު ވިދާޅުވިއެވެ.
އަޅުގަނޑުމެންނަށް ކުރިމަތިން ވިލާގަނޑުން ފެންނަނީ ބަނަ ދުވަސްތަކެއް. ބިރުވެރި ދުވަސްތަކެއް. ނާމާން، ދުވަސްތަކެއް. ދަތި ދުވަސްތަކެއް. މިހާރު މަސައްކަތް ނުކޮށްފި ނަމަ އަނިޔާވެރި ދުވަސްތަކާ ކުރިމަތިލާންޖެހިދާނެ.
މީގެ އިތުރުން ރައީސް ސާލިހު ވަނީ މިހާރު އަމަލު ކުރަމުންދާ ފެހި ގާނޫނު އަސާސީއާއި ގުޅޭގޮތުން ވާހަކަދައްކާވަފައެވެ. ރައީސް ސާލިހު ވިދާޅުވީ މިއީ އެތައް ބައެއްގެ ގުރުބާނީއާއި އެތައް ދަތިތަކެއްގެ ނަތީޖާކަމަށެވެ. ފެހި ގާނޫނު އަސާސީ އެކުލަވާލެވިގެން އައީ، ރައްޔިތުންގެ ވެރިކަމެއް ގާއިމްކޮށް، މިނިވަންކަމާއިއެކު ހައްގުތައް ކަށަވަރުކޮށްދިނުމަށްޓަކައިކަމަށް ފާހަގަކޮށް ރައީސް ސާލިހު ވިދާޅުވީ، މިހާރު އަނެއްކާވެސް ރާއްޖޭގެ ހާލަތު އޮތީ ހުދުމުހުތާރުކަމާއި ދިމާލަށްކަމަށެވެ. ގާނޫނުން ލިބިދީފައިވާ ބާރުތައް ނިގުޅައިގަތުމުގެ މަސައްކަތް ސަރުކާރުން ކުރަމުންދާކަމަށް އެމަނިކުފާނު ވިދާޅުވިއެވެ.
ރައްޔިތުންގެ އަތްމަތި ދަތިކޮށް، ވިޔަފާރިތައް ފުނޑާލައި، މިނިވަން މުއައްސަސާތައް މުށުތެރެއަށް ލާފައިވާކަމަށްވެސް ރައީސް ސާލިހު ވިދާޅުވިއެވެ.
މި ސަރުކާރަށް މިހާރު އެއް އަހަރުވެއްޖެ. އަޅުގަނޑުމެން އެއިރު ވެސް ބުނަމުން ދިޔައީމު، އަޅުގަނޑުމެން އެއް އަހަރު ވަންދެން މަޑުކުރާނަމޭ. ވަގުތު ދޭނަމޭ، މި ސަރުކާރުގެ އަމާޒަކީ ހުދުމުހުތާރު ވެރިކަމެއް އަނެއްކާ ވެސް މި ރާއްޖޭގައި ގާއިމް ކުރުން.
ރައީސް ސާލިހު ވިދާޅުވިއެވެ.
އެހެންކަމުން އެމްޑީޕީއިން ނިކުމެ އެތިބީ މިކަންކަން ދިފާއުކުރުމަށްޓަކައިކަމަށް ރައީސް ސާލިހު ވިދާޅުވިއެވެ. އެއްވެސް ހައްގަކީ ހެޔޮ ހިތުން، ”ތަބަކަކަށް“ ލާފައި ދޭނެ އެއްޗެއް ނޫން ކަމަށާއި، ރައްޔިތުން އެދޭ ގޮތަށް ބާރުތައް ޖެހޭނީ ހޯދަންކަމަށް ފާހަގަކޮށް ރައީސް ސާލިހު ވިދާޅުވީ މި މަސައްކަތް ލަސް ކުރެވޭކަން ނެތްކަމަށެވެ. އެންމެން އެކީގައި ނިކުތުމުން ބާރުތައް ދިނުމަށް މަޖުބޫރުވާނެކަމަށް ރައީސް ސާލިހު ވިދާޅުވިއެވެ.
