ރައްޔިތުންނަށް އޮޅުވާލުމުގެ ބޭނުމުގައި އެމްޑީޕީން ދައްކަމުން ދާ ވާހަކަތައް ރައްޔިތުން ގަބޫލު ނުކުރާނެކަމަށް ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ގާނޫނުއަސާސީގެ ދިފާއުގައި ނަމުގައި އެމްޑީޕީން ރޭ ކާނިވާގައި ބޭއްވި ބޮޑު އެއްވުން ފެށިގެން ދިޔައީ ޕާޓީގެ ގައުމީ މަޖިލިސް ބައްދަލުވުމެއް ބާއްވައި ހުށަހެޅި ގަރާރަކާއި އެކު އެވެ. ރޭ ކުރިޔަށް ގެންގޮސްފައި ވަނީ ރައްޔިތުންގެ މަޖިލީހުގެ މެމްބަރަކު ހިނގަމުން ދާ ދައުރުގައި އެ މެމްބަރަކު އިންތިހާބުވި ސިޔާސީ ޕާޓީ ބަދަލުކޮށްފި ނަމަ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާއި ދެކޮޅަށް ކުރިޔަށް ގެންދިޔަ އިހުތިޖާޖެކެވެ.
އެގޮތުން ޖަލްސާ ފެށުމުގެ ކުރިޔަށް އޮތް ގައުމީ މަޖިލިސް ބައްދަލުވުމަށް ޕާޓީގެ ގާނޫނީ ޓީމުގައި ހިމެނިވަޑައިގަންނަވާ މަހުފޫޒް ސައީދު ހުސަހަޅައި ފާސް ކުރި ގަރާރުގައި ވަނީ ރައްޔިތުންގެ މަސްލަހަތުގައި އެމްޑީޕީ ކުރަމުންދާ މަސައްކަތުގައި ބައިވެރިވުމުގެ ގޮތުން އެ މެމްބަރަކު ނިސްބަތްވާ ޕާޓީން ވަކިވެ އެމްޑީޕީއާއި ގުޅުމުން ގޮނޑި ގެއްލޭ ހާލަތެއްގައި އެ މެމްބަރަކު އަލުން އިންތިހާބު ކުރުމަށް އެމްޑީޕީ އެހީވާން ޖެހޭނެކަމަށެވެ.
ގަރާރުގައި ބުނެފައި ވަނީ ގާނޫނުއަސާސީއަށް ގެނައި ބަދަލަކީ ރައްޔިތުންގެ ބާރުވެރިކަން ނިގުޅައިގަނެ ރައްޔިތުންގެ މަޖިލިސް މެމްބަރުން ރައްޔިތުންގެ މަސްލަހަތުގައި މަސައްކަތް ކުރުމަށް އޮތް މިނިވަން އިހުތިޔާރު ވެސް ނިގުޅައިގަންނަ އަދި ގާނޫނުއަސާސީގެ އޮނިގަނޑާއި ވެސް ހިލާފު ބަދަލެއް ކަމަށެވެ.
މަޖިލިސް މެމްބަރަކު ޕީއެންސީން ވަކިވުމަށް ފަހު ނުވަތަ ވަކިކުރުމުން އަލުން އެ ދާއިރާއަށް ވާދަކުރަން ބޭނުން ވާނަމަ ކެމްޕެއިނުގައި އެހީވުމަށް އެމްޑީޕީ ނިންމުމުން އެކަމަށް ޝުޖާއު ރައްދު ދެއްވީ 12 މެމްބަރުންގެ ގޮނޑީގެ މައްސަލައިން މިސާލު ދެއްކެވުމަށް ފަހު އެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެމަނިކުފާނުގެ ސަރުކާރާއި ދެކޮޅަށް ތެދުވި މެމްބަރުންގެ ގޮނޑި ގެއްލުވާލައި އެންޓި ޑިފެކްޝަންގެ ގާނޫނެއް ގެނެސް ގިނަ މައްސަލަތަކެއް އުފެދިގެން ދިޔައެވެ. އަދި އޭރު އޮތް އިދިކޮޅު ކޯލިޝަނުން އެ މެމްބަރުން އިތުރު ދައުރަކަށް ހޮވައިދޭނެކަމަށް ބުނެ ވާހަކަ ދެކެވުނު ނަމަވެސް ފަހުން އެ މަޝްވަރާ ކުރިޔަށް ގޮސްފައި ނުވެއެވެ.
އެކަން ފާހަގަކޮށް ޝުޖާއު ވިދާޅުވީ 12 މެމްބަރުންނަށް ވެސް އެމްޑީޕީ ހެވެއް އެދިފައި ނުވާކަމަށާއި، އެހެންކަމުން މިއަދު އަނެއްކާވެސް ނިކުމެ ދައްކާ ވަހަކަ ރައްޔިތުން ގަބޫލު ނުކުރާނެކަމަށެވެ.
