މާލެ ސަރަހައްދުގައި ހިނގަމުން ދާ ސެލޫންއާއި، ސްޕާތަކުން ހިދުމަތް ދޭއިރު ހިފަހައްޓަން ޖެހޭ ސާފުހާތާހިރުކަމުގެ މިންގަނޑުތައް ދަމަހައްޓާ ގޮތް ބެލުމަށް އިންސްޕެކްޝަންއެއް ކުރިޔަށް ގެންދިއުމަށް ނިންމާފައިވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
މީޑިއާތަކަށް ފޮނުވި މެސެޖެއްގައި އެޗްޕީއޭ ބުނެފައި ވަނީ، މާލެ ސަރަހައްދުގައި ހިންގަމުންދާ ޒާތީ ހިދުމަތް ދޭ ތަންތަނުން އާންމުންނަށް ހިދުމަތް ދިނުމުގައި ހުންނަން ޖެހޭ ސާފުތާހިރުކަމުގެ މިންގަނޑުތައް ދަމަހައްޓާ ގޮތް ދެނެގަތުމަށްޓަކައި ކުރާ އިންސްޕެކްޝަން ކުރިޔަށް ގެންދާނީ މި މަހުގެ 19 ގެ ނިޔަލަށް ކަމަށެވެ.
އިންސްޕެކްޝަނުގެ މަސައްކަތްތައް ހޯމަ ދުވަހު ފަށާފައިވާކަން ފާހަގަކޮށް އެޗްޕީއޭ ބުނީ ސެލޫން ހިންގާ ފަރާތްތަކާއި، ސްޕާތަކުން އެއްބާރުލުން ދިނުމަށް އެދޭކަމަށެވެ.
އާންމު ހިދުމަތް ދޭ މިފަދަ ތަންތަނުގެ އިންސްޕެކްޝަނެއް އެޗްޕީއޭ ފެށިއިރު ރާއްޖޭގައި އެންމެ ބޮޑުވެފައިވާ މައްސަލައަކީ ވެސް ގާނޫނާއި ގަވައިދާ ހިލާފު އަމަލުތައް ސެލޫންތަކާއި ސްޕާތައް ހިންގުމުގެ ނަމުގައި ކުރުމެވެ. އަދި މި ވިޔަފާރީގައި ދިވެހިންނާއި އެކު ގިނައިން ޝާމިލުވެ އުޅެނީ ގަވައިދާ ހިލާފަށް ރާއްޖޭގައި އުޅޭ ބިދޭސީންކަން ފާހަގަކުރެވެ އެވެ.
މި މައްސަލައިގައި މޯލްޑިވްސް އިމިގްރޭޝަނާއި، ފުލުހުން ވެސް ހާއްސަ އޮޕަރޭޝަންތައް ކުރިޔަށް ގެންދެ އެވެ. އަދި ބައެއް ވިޔަފާރިތައް ހިންގަމުން ދިޔަ މީހުން މުވައްސަސާތަކުގެ ބެލުމުގެ ދަށަށް ގެންގޮސް ބައެއް ބިދޭސީން ވަނީ ޑީޕޯޓުކޮށްލާފަ އެވެ. އެގޮތުން މިފަހުން ވެސް ގަވައިދާ ހިލާފަށް ސްޕާ ހިންގަމުން ދިޔަ ގިނަ އަދަދެއްގެ ބަޔަކު ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފަ އެވެ.
