އަލިފާނުގެ ޙާދިސާއާ ގުޅިގެން ރައްޔިތުންގެ އާންމު ހައުސިންގ އާ ގުޅުންހުރި އެއްވެސް މައުލޫމާތެއް ގެއްލިފައިނުވާ ކަމަށާއި، ހައުސިންގ ލޯނުތަކާ ބެހޭ މައުލޫމާތުތައްވެސް ކްލައުޑްގައި ރައްކާކުުރެވިފައިވާކަމަށް ކޮންސްޓްރަކްޝަން މިނިސްޓަރ ޑރ އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރ އެހެން ވިދާޅުވީ އަލިފާނުގެ ޙާދިސާއާ ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. ނޫސްވެރިންްނާ ބައްދަލު ކުރައްވައި ވާހަކަ ދައްކަވަމުން މިނިސްޓަރ ވިދާޅުވީ، އެންމެ ފުރަތަމަ ޙާދިސާއާ ބެހޭ ގޮތުން މައުލޫމާތު ލިބިލެއްވުމުން އެ ސަރަޙައްދަށް ވަޑައިގެންނެވި ކަމަށާއި، ސަރަޙައްދުގެ ޙާލަތު ފެނިގެން ދިއުމުން ތަފާތު އިހުސާސެއް ކުރުވި ކަމަށެވެ. އިމާރަތް ވެއްޓިގެން ދިޔަތަންވެސް ފެނިވަޑައިގެންނެވިކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އަނދައިގެން އެ ދިިޔައީ އެތައް ބިލިއަން ރުފިޔާއެއްގެ މަޝްރޫއުތަކެއް ހިންގަމުންދިޔަ އޮފީހެއް ކަމަށެވެ.
މިވަގުތު 3 މިނިސްޓްރީގެ މަސައްކަތްތައް ކުރިއަށްދަނީ ދަރުބާރުގޭގައިކަމަށްވެސް މިނިސްޓަރ ވިދާޅުވިއެވެ. އަދި މިހާތަނަށް އައިއިރު އާންމު ޚިދުމަތްތައް އާދިއްތަ ދުވަހުން ފެށިގެން ފެށޭނެ އިންތިޒާމު ހަމަޖެއްސިފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، ރައްޔިތުންނަށް ދަތި ނުވާނެ ގޮތަކަށް މަސައްކަތްތައް އިންތިޒާމު ކުރުމަށް ޚާއްސަ އިސްކަމެއް ދެއްވައިގެން މަސައްކަތް ކުރައްވާނެ ކަމަށެވެ.
އޭގެ އިތުރުން، މިނިސްޓްރީގެ ގިނަ ޑޭޓާތައް ހުރިކަން ފާހަގަ ކުރައްވައި މިނިސްޓަރ ވިދާޅުވީ، ރައްޔިތުންގެ އާންމު ހައުސިންގ އާ ގުޅުންހުރި އެއްވެސް މައުލޫމާތެއް ގެއްލިފައިނުވާ ކަމަށާއި، ހައުސިންގ ލޯނުތަކާ ބެހޭ މައުލޫމާތުތައްވެސް ކްލައުޑްގައި ރައްކާކުުރެވިފައިވާ ކަމަށެ.
