އަލިފާނުގެ ޙާދިސާގެ ތަހުގީގުގައި ބޭރުގެ ތަޖުރިބާކާރުންގެ އެހީ ހޯއްދަވާނެކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
އަލިފާނުގެ ޙާދިސާއާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ސީޕީ ވިދާޅުވީ، އަލިފާން ނިވުމުގައި ފުލުހުންގެ ހުރިހާ ވަސީލަތެއް ބޭނުންކޮށްފައިވާނެ ކަމަށެވެ.
އަލިފާނުގެ ޙާދިސާ ހިނގި ސައިޓް މިހާރު ފުލުހުންނާ ޙަވާލުކޮށްފައިވާކަމަށް ސީޕީ ވިދާޅުވިއެވެ.
އޭގެ އިތުރުން، މި ޙާދިސާ ތަހުގީގެއް ފުލުހުން ކުރާނެ ކަމުގެ ޔަޤީންކަން ދެއްވާކަން ފާހަގަ ކުރައްވައި ސީޕީ ވިދާޅުވީ، މި ތަހުގީގުގައި ރާއްޖެއިން ބޭރުގެ ޓީމެއްގެ އެހީތެރިކަން ހޯއްދަވާނެ ކަމަށެވެ. އަދި ރައްޔިތުންނަށް މިކަންކަމުގެ ފުރިހަމަ މައުލޫމާތު ހިއްސާ ކުރައްވާނެކަމަށްވެސް ސީޕީ ވިދާޅުވިއެވެ.
ސީޕީ ވިދާޅުވީ، ފުލުހުންގެ ފޮރެންސިކް ޓީމުތަކުން އެ ސަރަޙައްދުގައި މަސައްކަތް ކުރަމުންދާ ކަމަށާއި، ސީސީޓީވީ ފުޓޭޖްތައް ހޯދައި އެނަލައިޒް ކުރުމުގެ މަސައްކަތްތައްވެސް ކުރިއަށްދާ ކަމަށެވެ.
އޭގެ އިތުރުން، ޙާދިސާގެ މަންޒަރު އެންމެ ފުރަތަމަ ދުއް މީހުންގެ ބަޔާން ނެގުމުގެ މަސައްކަތާއި އެވަގުތު އެތަނުގައި ތިބި މީހުންގެ އިތުރުން، އިތުރު މީހުންގެ ފަރާތުންވެސް މައުލޫމާތު ހޯދުމަށް މަސައްކަތް ކުރަމުންދާކަމަށް ސީޕީ ވިދާޅުވިއެވެ.
މި ޙާދިސާއާ ގުޅޭ މައުލޫމާތެއް ލިބިފައިވާ ފަރާތެއްވާނަމަ، އެ މައުލޫމާތެއް ހިއްސާ ކުރުމަށް ފަސޭހަ ގޮތްތަކެއް ހަމަޖައްސަވައިދެއްވާނެކަމަށްވެސް ސީޕީ ވިދާޅުވިއެވެ.
