އަންހެނުން އިގްތިސާދީ ގޮތުން ބާރުވެރިކުރުމަކީ ސަރުކާރުން އެންމެ ބޮޑު އިސްކަމެއްދޭ އެއް އަމާޒުކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރ ޑރ. އައިޝަތު ޝިހާމް ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައި ވަނީ، މިނިސްޓްރީގެ އިސްނެގުމުގެ މަތިން، ޔޫއެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިނގް ސެންޓރ ފޮރ އިންފޮމޭޝަން އެނޑް ކޮމިއުނިކޭޝާން ޓެކްނޮލޮޖީ ފޮރ ޑިވަލޮޕްމަންޓް (އޭޕީސީއައިސީޓީ) އާއި ގުޅިގެން ”އެމްޕަވަރިންގް ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޮރމޭޝަން“ ގެ ނަމުގައި ފެށި ތަމްރީން ޕްރޮގްރާމް އިފްތިތާޙުކުރުމަށް ބޭއްވި ރަސްމިއްޔާތުގައެވެ.
އައިޝަތު ޝިހާމް އިތުރަށް ވިދާޅުވީ، އަންހެނުންގެ ކުރިއެރުމަކީ ޢާއިލާތަކުގެ ކުރިއެރުން ކަމަށެވެ. އަދި ޢާއިލާތައް ކުރިއެރުމުން، މުޖުތަމަޢު ކުރިއަރައި، އިޤްތިޞާދު ވަރުގަދަވެގެން ދާނެ ކަމަށެވެ.
އެހެންކަމަށް ވުމާއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ހިންގަވާ މި ސަރުކާރުގެ މަޝްރޫޢުތަކާއި މަސައްކަތްތަކުގައި އަންހެނުންނަށް އިތުރު ފުރުޞަތުތައް ފަހިކޮށްދެއްވުމުގެ ގޮތުން ގިނަ ފިޔަވަޅުތަކެއް އަޅުއްވަމުންދާކަން ވެސް ފާހަގަކުރެއްވިއެވެ.
އަންހެނުން އިސްވެ ހިންގާ ވިޔަފާރިތަކަށް އެހީތެރިވުމަށް މާލީ އެހީތެރިކަން ލިބޭނެ މަގުތައް އިތުރަށް ހަރުދަނާކުރުމުގައި ބޮޑެތި ކުރިއެރުންތަކެއް މި ސަރުކާރުން ހޯދާފައިވާކަން މިނިސްޓަރ ވިދާޅުވިއެވެ. އެގޮތުން އަންހެނުންނާއި އަންހެން ވިޔަފާރިވެރިން ބާރުވެރިކުރުމަށް، އެސް.ޑީ.އެފް.ސީ އާއި ގުޅިގެން ”ފަށާ މަދަދު“ ގެ ނަމުގައި އަންހެނުންނަށް ހާއްސަކޮށްގެން ސްކީމެއް ތަޢާރަފުކޮށް، މި ލޯން ސްކީމްގެ 25 އިންސައްތަ ނުކުޅެދުންތެރިކަން ހުންނަ އަންހެނުންނަށް ހާއްސަ ކުރެވިފައިވާއިރު، ނުކުޅެދުންތެރިކަން ހުންނަ 1 ފަރާތް ހިމެނޭގޮތަށް 60 ފަރާތަކަށް މި ލޯންސްކީމް ހަމަޖައްސައިދިނުމަށް ހޮވިފައިވާކަން ފާހަގަކުރެއްވިއެވެ.
މީގެ އިތުރުން މި މަސައްކަތުބައްދަލުވުމަކީ ވަޒީފާގެ މައިދާނުގައި އަންހެނުންނަށް ހަމަހަމަ ފުރުޞަތުތައް ހޯދައިދިނުމަށް ކުރާ މަސައްކަތުގެ މުހިންމު މައިލްސްޓޯނެއްކަމަށް އައިޝަތު ޝިހާމް ވިދާޅުވިއެވެ. އަދި މި މަސައްކަތުބައްދަލުވުމަކީ އަންހެނުންގެ އިގްތިސާދީ ބާރުވެރިކަން ކުރިއެރުވުމަށް އަމާޒުކޮށްގެން މިހާ ބޮޑު ސްކޭލެއްގައި ބާއްވާ ފުރަތަމަ ޕްރޮގްރާމުކަންވެސް ފާހަގަކުރެއްވިއެވެ.
