ކ. ގުރައިދޫގައި ރޭ ނިޔާވެފައި އޮއްވާ ފެނުނު ހަތަރު މަހުގެ ތުއްތު ކުއްޖެއްގެ މަރުގައި ޝައްކު ކުރެވޭ ކަންތައްތަކެއް ހުރުމުން ފުލުހުން އެ މައްސަލަ ތަހުގީގު ކުރަން ފަށައިފި އެވެ.
ރޭގެ ދަންވަރުގެ ވަގުތެއްގައި ކުއްޖާ އެ ރަށުގެ ސިއްހީ މަރުކަޒަށް ގެންދިޔައިރު ވެސް ނިޔާވެފައިވާކަމަށް މައުލޫމާތު ލިބެއެވެ.
ބައެއް މަސްދަރުތަކުން ރިޕޯޓުކޮށްފައިވާ ގޮތުން ކުއްޖާގެ ހަށިގަނޑުގެ ބޭރުފުށުން އަނިޔާގެ ނިޝާނެއް ނެތް ނަމަވެސް ނޭފަތުން ލޭއައިސްފައި ހުއްޓެވެ.
މި ހާދިސާގެ މައުލޫމާތު މީޑިއާތަކަށް ހިއްސާކޮށް ފުލުހުން ބުނީ، އެފަދަ ޝަކުވާއެއް ލިބި މައްސަލަ ތަހުގީގު ކުރަމުންދާކަމަށެވެ. އަދި ކުއްޖާގެ އޮޓޮޕްސީ ހެދުމަށް ހަށިގަނޑު ރާއްޖެއިން ބޭރަށް ފޮނުވުމަށް ހަމަޖެހިފައިވާކަމަށް ވެސް ބުންޏެވެ.
