މޯލްޑިވްސް މަނިތަރީ އޮތޯރިޓީ (އެމްއެމްއޭ) އިން އިންތިޒާމްކޮށްގެން ބާއްވާ ފުރަތަމަ ރިސާޗް ކޮންފަރެންސެއް ފަށައިފިއެވެ.
ދެ ދުވަހުގެ މުއްދަތަށް ކުރިއަށްދާ އެމްއެމްއޭގެ އެންމެ ފުރަތަމަ ރިސާޗް ކޮންފަރެންސްގައި ކީނޯޓާއި ޕެނަލް ޑިސްކަޝަންތަކާއި ދިރާސީ ކަރުދާސްތައް ހުށަހެޅުމުގެ އިތުރުން ވޯކްޝޮޕްތައް ވެސް ކުރިއަށް ދާނެއެވެ.
އެމްއެމްއޭ ރިސާޗް ކޮންފަރެންސްގެ މި އަހަރުގެ ޝިއާރަކީ ”އިގްތިސާދީ ދިރާސާތައް ފުޅާކުރުމުގައި ދެމެހެއްޓެނިވި ކުރިމަގަކަށް ސިޔާސަތުތައް ބައްޓަންކޮށް އީޖާދުކުރުން“ މެވެ.
މި ރަސްމިއްޔާތުގެ ޝަރަފުވެރި މެހެމާނަކީ އެމްއެންޔޫ ޗާންސެލަރ ޑރ. މަހްމޫދު ޝައުގީ އެވެ.
މި ކޮންފަރެންސްގައި ރާއްޖެއާއި ރާއްޖޭން ބޭރުގެ ދިރާސާވެރިންނާއި މާލީ އިދާރާތަކުގެ ބޭފުޅުންނާއި އިގްތިސާދީ އަދި ފައިނޭންޝަލް ޓެކްނޮލޮޖީ ދާއިރާގައި ހަރަކާތްތެރިވާ ގިނަ ފަރާތްތަކެއް ބައިވެރިވިއެވެ.
ހޮނިހިރު ދުވަހުގެ ފުރަތަމަ ސެޝަންގައި ގަވަރުނަރު އަހްމަދު މުނައްވަރުގެ އިތުރުން، އެމްއެންޔޫ ޗާންސެލަރު ޝައުގީ އަދި ރިޒާވް ބޭންކް އޮފް އިންޑިއާގެ ޑެޕިއުޓީ ގަވަރުނަރު ވަނީ ވާހަކަފުޅު ދައްކަވާފައެވެ.
ގަވަރުނަރު މުނައްވަރުގެ ވާހަކައިގައި ރަނގަޅު ސިޔާސަތުތަކެއް ބައްޓަންކުރުމަށް ހަރުދަނާ ދިރާސާތަކެއް ކުރުމުގެ މުހިންމުކަމަށް އަލިއަޅުވާލެއްވިއެވެ.
ޝަރަފުވެރި މެހެމާންގެ ވާހަކަފުޅުގައި ރާއްޖޭގެ އެކި އިދާރާތަކުން އިގްތިސާދީ ދިރާސީ މަސައްކަތްތައް ކުރުމުގައި ގުޅިގެން އުޅުމަށާއި ބޭނުންވާ ކުރިއެރުން ހޯދުމަށް މަގު ކޮށޭނީ އޭރުން ކަމުގައި ވިދާޅުވިއެވެ.
މި ރިސާޗް ކޮންފަރެންސްގައި ވަނީ އެމްއެމްއޭ ރިސާޗް ފަންޑް އިފްތިތާހުކޮށްފައެވެ. މި ފަންޑް އިފްތިތާހު ކުރެއްވީ އެމްއެންޔޫ ޗާންސެލަރު މަހްމޫދު ޝައުގީއެވެ. އެމްއެމްއޭގެ މި ފަންޑުގެ އަމާޒަކީ ދިރާސާތައް ކުރުމަށް ހިތްވަރުދީ ދިރާސާ ކުރާ ފަރާތްތަކަށް ފަހި މާހައުލެއް ބިނާކުރުމެވެ. މި ފަންޑު އެމްއެމްއޭ އިން ފަށާފައިވަނީ 1 މިލިއަން ރުފިޔާއާއެކުއެވެ. އަދި މި ފަންޑަށް ރާއްޖެއާއި ރާއްޖެއިން ބޭރުގެ އެކި އިދާރާތަކަށް އެހީތެރިކަން ފޯރުކޮށްދިނުމުގެ ފުރުސަތު ވަނީ ހުޅުވާލާފައެވެ.
މިއަދު 2 އެމްއޯޔޫ އެއްގައި ވެސް ސޮއިކުރެވުނު:
- އިގްތިސާދީ ދިރާސާތައް ކުރިއެރުވުމަށާއި ތައުލީމާއި އީޖާދުކުރުމުގެ ދާއިރާއިން އެކުގައި މަސައްކަތްކުރުމަށް މެލޭޝިއާގެ ޔުނިވަސިޓީ އިސްލާމް ސެލަންގޫރާއެކު ފަހުމުނާމާއެއްގައި ސޮއިކުރެވުނު.
- ދެމެހެއްޓެނިވި ކުރިމަގަކަށް ދިރާސާތައް ފުޅާކުރުމާއި އީޖާދީ އުފެއްދުންތައް ކުރިއެރުވުމަށް ދިރާގާއެކު ފަހުމުނާމާ އެއްގައި ސޮއިކުރެވުނު.
2 ޕެނަލް ޑިސްކަޝަން
- މި ޕެނަލްތައް އެމްއެމްއޭގެ ސޯޝަލް މީޑިއާގައި ލައިވްކުރި.
- ރާއްޖެއާއި ބޭރުގެ އިގްތިސާދީ އަދި ފިންޓެކް ތަޖުރިބާކާރުން ޕެނަލްގައި ބައިވެރިވި.
- ފުރަތަމަ ޕެނަލް ޑިސްކަޝަން ޚާއްސަކޮށްފައިވަނީ ފައިނޭންޝަލް ޓެކްނޮލޮޖީ އަށް.
- ދެވަނަ ސެޝަންގައި މޫސުމަށް އަންނަ ބަދަލުތަކާއި ހަކަތަ އުފެއްދުމުގައި ދުނިޔެއަށް އަންނަ ބަދަލުތަކާއެކު ރާއްޖެފަދަ ގައުމުތަކަށް ކުރާ އަސަރުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނު.
3 ދިރާސާ ކަރުދާހެއް ހުށަހެޅުނު.
- ފުރަތަމަ ކަރުދާހުގައި އަލިއަޅުވާލައިފައިވަނީ އާމްދަނީގެ ފަރަގާއި ރާއްޖޭގެ އެކި ހިސާބުތަކުގައި އިންފްލޭޝަންގެ ހުރި ތަފާތަކާ ބެހޭގޮތުން.
- ދެވަނަ ކަރުދާހުގައި ބަލާފައިވަނީ ޖީއެސްޓީގެ ސަބަބުން އަގުތަކަށް އަންނަ ބަދަލުތަކާ ބެހޭގޮތުން
- ތިންވަނަ ކަރުދާހަކީ މާލޭގެ ކުލީގެ އަގުތަކާ ބެހޭގޮތުން އެކުލަވާލައިފައިވާ ދިރާސާ ކަރުދާހެއް.
މި ކޮންފަރެންސްގެ ބައެއް ވޯކްޝޮޕްތައް އާދީއްތަ ދުވަހު ވެސް ކުރިއަށްގެންދާ ގޮތަށް ވެސް ވަނީ ހަމަޖެހިފައެވެ.
