ޑައިމޯފިން ޓްރެފިކް ކުރުމުގެ ކުށް ސާބިތުވި އަންހެނަކު 12 އަހަރަށް ޖަލަށް ލުމަށް ޙުކުމްކޮށްފިއެވެ.
މި މައްސަލައިގައި ދައުވާ އުފުލާފައިވަނީ ސަހާ ވަހީދު ނަމަކަށް ކިޔާ މީހެއްގެ މައްޗަށެވެ. އޭނާގެ މައްޗަށް އުފުލާފައިވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ.
އޭނާގެ މައްޗަށް މި ދައުވާ އުފުލާފައިވަނީ ވެލާނާ އިންޓަނޭޝަނަލް އެއާޕޯޓުގެ ޑޮމެސްޓިކް ޓާމިނަލް ގެ ސެކިއުރިޓީ ޗެކްގައި އޭނާގެ ހަށިގަނޑު ބަލައި ފާސްކުރިއިރު، މަސްތުވާތަކެތި ފެނިފައިވާތީއެވެ.
މި ދައުވާއަށް އޭނާ އިއުތިރާފުވެ، ދައުލަތާއެކު އިއުތިރާފު އެއްބަސްވުމަކަށް އައިސްފައިވެއެވެ. އެގޮތުން ދައުވާގައި ބަޔާންވެފައިވާ ހުރިހާ ކަމަކަށް އިއުތިރާފުވާކަމަށް އޭނާގެ ފަރާތުން ބުނެފައިވެއެވެ.
ޝަރީއަތުންވެސް ވަނީ އެ އިއުތިރާފު އެއްބަސްވުން ބަލައިގެންފައެވެ.
އިއުތިރާފު އެއްބަސްވުމަށް ބަލާއިރު، މި ދައުވާއާ ގުޅިގެން ޕީޖީ އޮފީހާއެކު އެއްބަސްވެފައިވާ އަދަބަކީ 12 އަހަރާއި 6 މަހުގެ މުއްދަތަކަށް ޖަލަށް ލުމާއެކު، ބައިލައްކަ ރުފިޔާއިން ޖޫރިމަނާ ކުރުމެވެ.
ޝަރީއަތުން ވަނީ އެގޮތުގެ މަތިން ޙުކުމްކޮށް، އޭނާ ޖޫރިމަނާއަށް ދައްކަންޖެހޭ ފައިސާ 12 މަސް ދުވަހުގެ ތެރޭގައި މީރާއަށް ދެއްކުމަށް އަންގައި މައްސަލަ ނިންމަވާފައެވެ.
ކްރިމިނަލް ކޯޓުގައި މި މައްސަލަ ނިންމެވީ ގާޒީ އާއިޝަތު ނުޒުހާއެވެ.
