ހައުސިންގ މިނިސްޓްރީގައި ހިނގި އަލިފާނުގެ ޙާދިސާގައި އެންމެ ބޮޑަށް ފެންނަން އޮތީ އެމްއެންޑީއެފްގެ އިހުމާލުކަމަށް އެމްޑީޕީގެ ޕީޖީ ލީޑަރު، ހިތަދޫ އުތުރު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ހޯމަ ދުވަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނާޒިލް ވިދާޅުވީ، އަލިފާނުގެ ޙާދިސާ ހިނގިކަމުގެ މައުލޫމާތު އެ ދުވަހުގެ ފަތިހު 05:30ން ފެށިގެން ލިބެމުން ގޮސްފައިވާ ކަމަށާއި، އެގޮތުން އަލިފާނުގެ އަސަރާއި ދުން ފެންނަން ފެށި ހިސާބުން އަލިފާން ކޮންޓްރޯލް ކުރުމަށް މަސައްކަތް ކުރެވެން ޖެހޭ ކަމަށެވެ. މިކަމުގައި ބޮޑެތި އިހުމާލުތަކެއްވާކަމަށް ނާޒިލް ވިދާޅުވިއެވެ.
ހަމަ ޔަޤީނުންވެސް ބޮޑެތި އިހުމާލުތަކެއް ވާކަން އެއީ އަޅުގަނޑުމެންނަށް ޔަޤީން ކަށަވަރުކަމެއް.
ނާޒިލް ވިދާޅުވީ، 6 ގަޑިއިރު އަލިފާން ކޮންޓްރޯލް ނުވެ ގޮސްފައިވާއިރު، އެކަމުގެ ފަހަތުގައި އޮތީ ކޮން ބައެއްގެ އިހުމާލެއްތޯ ބަލަންޖެހޭނެ ކަމަށެވެ. އަދި އެކަން ދިޔަގޮތް ރައްޔިތުންނަށްވެސް އިތުރަށް ސާފުވާން ޖެހޭނެކަމަށް ނާޒިލް ވިދާޅުވިއެވެ.
ނާޒިލް އިތުރަށް ވިދާޅުވީ، މި މުޅި މައްސަލައަށް ބަލާއިރު، އެންމެ ބޮޑަށް އޮތީ އެމްއެންޑީއެފްގެ އިހުމާލު ކަމަށެވެ. އެގޮތުން ދައުލަތުގެ އިދާރާތަކެއް އަނދާ ހުލިވެގެން ދިޔައިރު، ބަލަހައްޓައިގެން ތިބީތޯވެސް ސުވާލު އުފެދޭކަމަށް ނާޒިލް ވިދާޅުވިއެވެ.
މި ޙާދިސާއާ ގުޅިގެން އެމްއެންޑީއެފުން އަމަލުކޮށްފައިވާ ގޮތް ބަލަން ޖެހޭކަމަށްވެސް ނާޒިލް ވިދާޅުވިއެވެ.
ނާޒިލް ވަނީ މި ދުވަސްވަރު ރައީސް ޑރ މުޙައްމަދު މުއިއްޒު ރަށްރަށަށް ވަޑައިގެން ދަތުރުފުޅު ކުރައްވާތީ އެކަމަށްވެސް ފާޑުވިދާޅުވެފައެވެ.
މި ތަހުގީގުގައި ރާއްޖެއިން ބޭރުގެ ޓީމެއްގެ އެހީތެރިކަން ހޯއްދަވާނެ ކަމަށާއި، އަދި ރައްޔިތުންނަށް މިކަންކަމުގެ ފުރިހަމަ މައުލޫމާތު ހިއްސާ ކުރައްވާނެކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.
އޭގެ އިތުރުން، ޙާދިސާގެ މަންޒަރު އެންމެ ފުރަތަމަ ދުއް މީހުންގެ ބަޔާން ނެގުމުގެ މަސައްކަތާއި އެވަގުތު އެތަނުގައި ތިބި މީހުންގެ އިތުރުން، އިތުރު މީހުންގެ ފަރާތުންވެސް މައުލޫމާތު ހޯދުމަށް މަސައްކަތް ކުރަމުންދާކަމަށް ފުލުހުން ބުނެއެވެ.
