މިފަހުން އާޓިފިޝަލް ބީޗުގައި ބިދޭސީންތަކެއްގެ މެދުގައި ހަމަނުޖެހުން އުފައްދައި، މާރާމާރީ ހިންގި މައްސަލައިގައި އިސްކޮށް ހިމެނޭ އެކަކު ޑީޕޯޓުކޮށްލުމުގެ މަސައްކަތް ކުރަމުންދާކަމަށް އިމިގްރޭޝަނުން ބުނެފި އެވެ.
ކޮންމެ ހުކުރު ދުވަހެއްގެ ހަވީރާއި، ރޭގަނޑު ވަގުތު ގިނަ އަދަދެއްގެ ބިދޭސީން ވެސް ބީޗު ސަރަހައްދަށް އެއްވާއިރު މިފަހަކަށް އައިސް ބޮޑެތި މާރާމާރީތަކާއި ހަމަނުޖެހުން އެތަނުގައި ހިނގަ އެވެ. އާންމުކޮށް ދިވެހިން ވެސް އާއިލާއާއި އެކު ހަވީރު އެއްވާ ބީޗުގައި ބިދޭސީންތައް މަސްތުގެ ހާލަތުގައި ތިބޭކަމަށް ވެސް ބައެއް މީހުން ތުހުމަތު ކުރެ އެވެ.
މީގެ ހަފްތާއެއް ކުރިން ހިނގި މި ހާދިސާގެ މައުލޫމާތު މީޑިއާތަކަށް ދެމުން އިމިގްރޭޝަނުން ބުނެފައި ވަނީ މި މަހުގެ ހަވަނަ ދުވަހު އާންމު މަސްލަހަތަށް ގެއްލުންވެ ނުރައްކާވާ ގޮތަށް އެ ސަރަހައްދުގައި މާރާމާރީ ހިންގައި އިސްކޮށް އުޅުނު މީހާ ހޯދައި ފުލުހުންގެ ބެލުމުގެ ދަށުން އިމިގްރޭޝަނުގެ ޑިޓެންޝަން ސެންޓަރަށް ގެނެވުނު ކަމަށެވެ. އަދި މިވަގުތު އެ އިދާރާގެ ބެލުމުގެ ދަށުގައި ހުރި އުމުރުން 25 އަހަރުގެ އަމްރިތް ސިން ފުރުވާލުމުގެ މަސައްކަތް ކުރަމުންދާކަމަށް ބުންޏެވެ.
މާރާމާރީގެ ތެރެއިން އެވަގުތު އެތަނުގައި ހުރި ކުޑަކުއްޖަކަށް ވެސް ބިދޭސީ މީހާ ހަމަލާ ދިނެވެ.
އާޓިފިޝަލް ބީޗުގައި ހަމަނުޖެހުން ހިނގާފައި ވަނީ އިންޑިއާއަށް ނިސްބަތްވާ ބައެއްގެ މެދުގަ އެވެ. އަދި އެ މީހުންގެ މެދުގައި އެކަކު އަނެކަކަށް ޒުވާބުކޮށް ހަމަލާ ދީ މުޅި ތަނުގެ މަސްލަހަތު ގެއްލިގެން ދިޔައެވެ.
މި ހާދިސާއާއި ގުޅޭގޮތުން އިމިގްރޭޝަން ކޮންޓްރޯލަރ ޝަމްއާން ވަހީދު ވިދާޅުވީ އާޓިފިޝަލް ބީޗުގައި މާރާމާރީ ހިންގައި އާންމު މަސްލަހަތު ނަގާލުމަށް ބައިވެރިވި ބިދޭސީންގެ މައްސަލަ ބަލަމުންދާކަމަށެވެ. އަދި ގާނޫނާއި ގަވައިދާއި ހިލާފުވާ ބިދޭސީންނާއި މެދު ފިޔަވަޅު އެޅުމުގެ ބާރު އިމިގްރޭޝަނަށް ލިބިފައިވާކަމަށް ވެސް ވިދާޅުވި އެވެ.
މި މައްސަލަ ފެންމަތިވެފައި ވަނިކޮށް މުސާރައިގެ މައްސަލައެއްގައި ގްރީން ޒޯން ސަރަހައްދެއްގައި މުޒާހަރާ ކުރަމުން ދިޔަ ބިދޭސީންތަކެއް ވެސް ވަނީ އިމިގްރޭޝަންގެ ބެލުމުގެ ދަށަށް ގެންގޮސްފަ އެވެ. މި މައްސަލައިގައި ހިމެނޭ 55 ބިދޭސީން ވެސް ފުލުހުންގެ ބެލުމުގެ ދަށުން ވަނީ އިމިގްރޭޝަނާއި ހަވާލުކޮށްފަ އެވެ.
