ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ ދަށުން ކުޅުއްދުފުށި ސިޓީގައި ހުންނަ ހދ. އަތޮޅު ތަޢުލީމީ މަރުކަޒުގެ ސްޕެޝަލް އެޑިއުކޭޝަން ނީޑްސް (ސެން) ޔުނިޓްކަމަށްވާ ސަންޝައިން ކްލާހަށް އެކުނުފުނިން އެހީތެރިކަން ފޯރުކޮށްދީފިއެވެ.
މިގޮތުން ހދ. އަތޮޅު ތަޢުލީމީ މަރުކަޒުގައި ބޭއްވި ހާއްސަ ރަސްމިއްޔާތެއްގައި ދިރާގުން ވަނީ ސަންޝައިން ކްލާހަށް ބޭނުންވާ ވަސީލަތްތައް ހަދިޔާކޮށްފައެވެ. މީގެ ތެރޭގައި އޮޓޮމެޓިކް ގޮނޑިއާއި ލޮކިންގް ގޮނޑީގެ އިތުރުން ކުލާހުގެ ސެންސަރީ އަދި އެކްޓިވިޓީ ޔުނިޓަށް ބޭނުންވާ ވަސީލަތް ހިމެނެއެވެ.
މި އެހީތެރިކަމުގެ ސަބަބުން ތަފާތު ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ހދ. އަތޮޅު ތަޢުލީމީ މަރުކަޒުގެ މި ސްޕެޝަލް އެޑިއުކޭޝަން ޔުނިޓްގެ ކްލާސްރޫމް ސެޓަޕް އިތުރަށް ފުރިހަމަވެގެންދާނެއެވެ.
މި އިވެންޓްގައި ވާހަކަދައްކަވަމުން، ދިރާގުގެ ކުޅުދުއްފުށި އޮޕަރޭޝަންސް ސެންޓަރގެ އެސިސްޓަންޓް މެނޭޖަރ އޮޕަރޭޝަންސް، މުޙައްމަދު އަލީ ވަނީ އެއްވެސް ކުއްޖަކު ބާކީނުވާނޭހެން މުޖުތަމަޢުގައި ޝާމިލުކުރުމަށް އެއްބާރުލުންދިނުމަކީ ދިރާގުން ހާއްސަ އަހަންމިއްޔަތުކަމެއް ދޭކަމެކަމަށް ވިދާޅުވެފައެވެ. އަދި އުއްމީދަކީ މި ވަސީލަތްތަކުގެ ސަބަބުން ސްކޫލުގެ ތީޗަރުން ކުރަމުން އަންނަ މިންނެތް މަސައްކަތަށް އިތުރު އެހީތެރިކަމެއް ލިބި، ހުރިހާ ކުދިންނަށް ވެސް ކުރިއެރުމާއި އުނގެނުމުގެ ފުރުސަތުތައް ތަނަވަސްވެގެންދިޔުން ކަމަށް ވެސް ވަނީ ވިދާޅުވެފައެވެ.
ހދ. އަތޮޅު ތައުލީމީ މަރުކަޒުގެ ޕްރިންސިޕަލް، މުޙައްމަދު މަތީން ވަނީ ސަންޝައިން ކްލާހަށް ދިރާގުން ފޯރުކޮށްދިން އެހީތެރިކަމަށް އެކުންފުންޏަށް ޝުކުރު އަދާކުރައްވާފައެވެ. އަދި ސަންޝައިން ކުލާހަށް ލިބިގެން މިދިޔަ ވަސީލްތްތަކުގެ ސަބަބުން، އިންކްލޫސިވް އެޑިއުކޭޝަން ފޯރުކޮށްދިނުމަށް ސްކޫލުން ކުރަމުންދާ މަސައްކަތަށް ބޮޑު ކުރިއެރުމެއް ލިބިގެންދާނެކަމަށް ވެސް ޕްރިންސިޕަލް މަތީން ވަނީ ފާހަގަކުރައްވާފައެވެ.
ދިރާގުން ބުނީ އެ ކުންފުނިން އަބަދުވެސް މަސައްކަތް ކުރަމުންދަނީ މުވާސަލާތީ ގުޅުމުގެ އިތުރުން މުޖުތަމަޢުއަށް ބޭނުންވާ ކަންކަމުގައި އެހީތެރިކަން ފޯރުކޮށްދިނުމަށް ކަމަށެވެ. އެގޮތުން ދިރާގުން މިހާރުވެސް ދަނީ ކުޑަކުދިންނަށް އެހީތެރިވުމާއި މުޖުތަމަޢުގެ ޒުވާނުން ބާރުވެރިކުރުވުމުގެ ގިނަ މަސައްކަތްތަކެއް ކުރަމުންކަން ފާހަގަކުރި އެވެ.
