ރާއްޖޭގެ ވައިގެ ކޮލިޓީއަކީ މުސްތަގުބަލުގައި ފަތުރުވެރިކަމުގެ ދާއިރާއަށް އަސަރު ކޮށްފާނެކަމެއްކަމަށް ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެެވެ.
އެމަނިކުފާނު މިހެން ވިދާޅުވީ އެކްސްގައި ހިއްސާކުރެއްވި ޕޯސްޓެއްގައެވެ.
ރައީސް ނަޝީދު ވިދާޅުވީ މިއީ އެންމެން ގުޅިގެން ހައްލުކުރުމަށް މަސައްކަތް ކުރަންޖެހޭކަމެއްކަމަށެވެ.
މި ދުވަސްވަރަކީ އާންމު ގޮތެއްގައި ރާއްޖޭގައި ވައިގެ ކޮލިޓީ ކޮންމެ އަހަރަކުވެސް ގޯސްވާ މޫސުންކަމަށް ފާހަގަކޮށް ރައީސް ނަޝީދު ވިދާޅުވީ މިއީވެސް ފަތުރުވެރިކަމުގެ ޕީކް ސީޒަންކަމަށެވެ. މިކަން މުސްތަގުބަލުގައި ހިނގާނަމަ މިކަމުގެ އަސަރު ފަތުރުވެރިކަމަށްވެސް ކުރާނެކަމަށާއި، މި ހުރިހާ ތަޣައްޔަރުކަމެއްވެސް ގާތްގަނޑަކަށް މި އަންނަނީ އެހެން ގައުމުތަކުންކަމަށް އެމަނިކުފާނު ވިދާޅުވިއެވެ.
މިހާރު މާލެ ސަރަހައްދުގެ ވައިގެ ކޮލެޓީ ހުރީ 55 ގައެވެ.
މިކަމާއި ގުޅޭ ގޮތުން ސަމާލުވާން ޖެހޭ ކަންތައްތައް މޫސުމާއި ބެހޭ ގައުމީ އިދާރާއިން ވަނީ ހިއްސާކޮށްފައެވެ.
- ފުއްޕާމޭގެ ބަލިތަކާއި ހިތުގެ ބަލި، އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުން.
- ބޭރަށް ނިކުންނަން ޖެހޭ ހާލަތްތަކުގައި ރައްކާތެރި މާސްކު އެޅުން.
- ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަ ނުކުރުން.
- ތުއްތު ކުދިން ބޭރަށް ނުނެރުން.
- ގޭގެ ދޮރުތައް ލައްޕާފައި ބެހެއްޓުން.
- ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންތައްތައް މަޑު ޖައްސާލުން
