”ރޯދަ ސާފު“ ހަރަކާތުގައި އެތައް ސަތޭކަ ބަޔަކު ބައިވެރިވުމުން ދިވެހިންގެ ގުޅުން ހާމަވެގެންދިޔަކަމަށް މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ މި ހަރަކާތް ފައްޓަވައިދެއްވާ ވާހަކަދައްކަވަމުންނެވެ.
“ރޯދަ ސާފު“ ހަރަކާތުގައި އެތައް ބަޔަކު ބައިވެރިވެފައިވާތީ މިނިސްޓަރު ވަނީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ނަންފުޅުގައިއާއި އަމިއްލަ ނަންފުޅުގައި އެ ހުރިހައި ފަރާތްތަކަށް ޝުކުރު އަދާކުރައްވާފައެވެ.
ސާފުތާހިރުކަމުގެ ރީތި އާދަތައް އަށަގެންނެވުމަކީ މުހިންމުކަމެއްކަމަށް މިނިސްޓަރު ވިދާޅުވިއެވެ. އަދި ޖެހުނު ކޮންމެ ތަނަކަށް ކުނި އުކާލުމުގެ ބަދަލުގައި ޑަސްބިންތަކަށާއި، ކުނި އަޅަން ޚާއްޞަ ތަންތަނަށް ކުނި އެޅުމުގެ އާދަ އަށަގަންނަވަން ޚާއްޞަ ސަމާލުކަމެއް ދޭންޖެހޭކަމަށްވެސް މިނިސްޓަރު ވިދާޅުވިއެވެ.
މި ހަރަކާތުގައި ރަށްރަށުގެ ކައުންސިލްތަކުންވެސް ބައިވެރިވަމުންދާކަން މިނިސްޓަރު އެކްސްގައި ހިއްސާ ކުރެއްވި ޕޯސްޓެއްގައި ފާހަގަކުރެއްވިއެވެ.
”ރޯދަ ސާފު“ ގެ ނަމުގައި މާލެ ސާފުކުރުމުގެ ޚާއްޞަ ޙަރަކާތެއް ބާއްވަނީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއާއި، ދިވެހިބަހާއި ސަޤާފަތާއި ތަރިކައާ ބެހޭ ވުޒާރާއިން ގުޅިގެންނެވެ. ރޯދައަށް މާލެ ސާފުކުރުމުގެ މަޤްޞަދުގައި ބޭއްވި މި ޙަރަކާތުގައި، ހަރަކާތް އިންތިޒާމްކުރާ ދެ ވުޒާރާގެ އިތުރުން އެހެން ވުޒާރާތަކާއި، މުއައްސަސާތަކުންވެސް މުވައްޒަފުން ބައިވެރިވިއެވެ.
އެގޮތުން އިތުރު 20 އޮފީހަކުން ބައިވެރިވިއެވެ.
މި ޙަރަކާތުގައި މާލެތެރެއާއި، މާލޭގެ މުހިންމު ސަރަޙައްދުތަކެއް ސާފުކުރެވޭނެކަމަށް މައުލޫމާތު ދިނެވެ.
އެގޮތުން އިންޑަސްޓްރިއަލް ޒޯނާއި، އުސްފަސްގަނޑު ސަރަޙައްދާއި، ލޮނުޒިޔާރަތް ޕާކު ސަރަޙައްދާއި، ހެދިގޮނޑުދޮށު ސަރަޙައްދާއި، އަލިމަސް ކާނިވާ ސަރަޙައްދާއި، މަސްވެރިންގެ ޕާކު ސަރަޙައްދާއި، އެމްޕީއެލް ސަރަޙައްދާއި، އަދި ރަސްފަންނު ސަރަޙައްދު ސާފުކުރެވޭނެކަމަށް ބުންޏެވެ. މި ހަރަކާތުގެ ތެރެއިން އެކި ސަރަހައްދުތައް ސާފުކުރަނީ، އެކި ގުރޫޕުތައް ބަހާލައިގެންނެވެ.
