ފަނޑިޔާރުންގެ އެންމެ ބޮޑު އެއް ޒިންމާއަކީ ދިވެހި ދައުލަތުގެ މަސްލަހަތު ހިމާޔަތްކުރުންކަމަށް އުއްތަމަފަނޑިޔާރު ޑރ މުއުތަސިމް އަދުނާނު ވިދާޅުވިއެވެ.
ރާއްޖޭގެ ކޯޓުތަކަށް މެޖިސްޓްރޭޓުން އައްޔަނު ކުރުމުގެ ރަސްމިއްޔާތުގައި ވާހަކަ ދައްކަވަމުން އުއްތަމަފަނޑިޔާރު ވިދާޅުވީ، އިޚުލާސްތެރިވުމަކީ ފަނޑިޔާރުންނަށްވެސް ވަރަށް މުހިއްމު ސިފައެއްކަމަށެވެ. އެގޮތުން އަމިއްލަ ނަފްސަށާއި، ދީނާއި، ޤައުމަށްވެސް އިޚުލާސްތެރިކަން އިސްކުރައްވަންޖެހޭނެކަމަށް އުއްތަމަފަނޑިޔާރު ވިދާޅުވިއެވެ.
ފަނޑިޔާރުންގެ އެންމެ ބޮޑު ޒިންމާއަކީ ދިވެހި ދައުލަތުގެ މަސްލަހަތު ހިމާޔަތްކުރުންކަމަށްވެސް އުއްތަމަފަނޑިޔާރު ވިދާޅުވިއެވެ. އެކަން ކުރެވޭނީ ޤާނޫނުގެ ވެރިކަން ދަމަހައްޓައިގެންކަމަށްވެސް އެމަނިކުފާނު ވިދާޅުވިއެވެ.
ދިވެހި ދައުލަތުގެ މަސްލަޙަތަކީ ދިވެހި ރައްޔިތުންގެ މަސްލަޙަތު، ޤާނޫނުއަސާސީ އެބަ ބުނޭ ބާރުތައް ފެށެނީ އަދި ދެމި އޮންނަނީ ރައްޔިތުންގެ ކިބައިގައޭ، ދިވެހި ދައުލަތުގެ މަސްލަޙަތަކީ ވަކި މީހެއްގެ މަސްލަހަތެއް ނޫން،
އުއްތަމަފަނޑިޔާރު ވަނީ ކޯޓުގެ ތެރޭގައި އަދި ކޯޓުން ބޭރުގައިވެސް ފަނޑިޔާރުންގެ އަހުލާޤު އިސްކުރެއްވުމަށް އެދިވަޑައިގެންފައެވެ.
ފަނޑީޔާރުކަން ކުރުމަކީ ބުރަ ކަމެއް، އެކަން އަޅުގަނޑުމެން ޤަބޫލުކުރަން ޖެހޭނެ، ވިސްނަން ޖެހޭނެ، އަޅުގަނޑުމެން މި މަސައްކަތް ކުރުމުގައި ކޯޓު ތެރޭގައި އަދި ކޯޓުން ބޭރުގައި އަޅުގަނޑުމެންގެ އުޅުމާއި ގުޅުން ބަހައްޓަން ޖެހޭ ގޮތް ވަރަށް މުހިއްމު
އުއްތަމަފަނޑިޔާރު ވިދާޅުވީ، ކޯޓަށް ހުށަހެޅޭ މައްސަލަތައް އަބަދުވެސް ބިނާވަނީ ކޮންމެވެސް ޚުސޫމާތެއްގެ މައްޗަށް ކަމަށާއި، އެންމެންގެ ހިތްހަމަޖެހޭ ގޮތަށް މައްސަލަ ނިންމޭނީ މަދު ފަހަރެއްގައި ކަމަށެވެ. ކޮންމެ ޙާލަތެއްގައިވެސް ފަނޑިޔާރުން މަސައްކަތް ކުރަން ޖެހޭނީ ޤާނޫނާ އެއްގޮތަށް އަދުލުވެރިކަމާއެކުކަމަށް އުއްތަމަފަނޑިޔާރު ވިދާޅުވިއެވެ.
އަބަދުވެސް މައްސަލަ ނިންމަންޖެހޭނީ ވަކި ފަރާތަކަށް ނުޖެހި، އިންސާފުގެ ތަރާދުން ކިރައިގެން
މީގެ އިތުރުން، މައްސަލަތައް ކުރިއަށް ގެންދިއުމުގައި މަދަނީ އަދި ޖިނާއީ އިޖުރާއަތުގެ ޤާނޫނާއި، އެއާ ގުޅޭ ނިންމުންތަކަށް ރަނގަޅަށް އަހުލުވެރިވުމަށްވެސް އަލަށް ހުވާކުރެއްވި މެޖިސްޓްރޭޓުންނަށް އުއްތަމަފަނޑިޔާރު ވަނީ ނަސޭޙަތްތެރިވެވަޑައިގެންފައެވެ.
ހަމައެއާއެކު، ޖަޒުބާތުގައި ނުޖެހި، ޤާނޫނީ ތަރަހައިގެ ތެރެއިން މައްސަލަތައް ނިންމުމުގެ މުހިއްމުކަމުގެ މައްޗަށްވެސް އުއްތަމަފަނޑިޔާރު ވަނީ އަލިއަޅުވާލައްވާފައެވެ.
